رتبها

بسم الله الرحمن الرحيم
بناءا على رغبة الكثير ححاول قدر الامكان في الثريد دا انو اتكلم عن طريقة التسجيل في البورد الالماني. ارجو من الزملاء الموجودين في المانيا اذا في اي معلومة جديدة او تغييرات حاصلة ينبهني عليها

قبل ما اتكلم عن طريقة التسجيل حتكلم عن الايجابيات و السلبيات للبورد الالماني
الايجابيات هي
١- القدرة انك تبدا الاختصاص الرغبتك فيهو مهما كان شنو .. ماف شي اسمو انتظار او تعدل الCV او الخ .. بتقدم لوظيفة في الاختصاص العايزو في اي مستشفى بالذات في المجالات الجراحية

٢- ما بهتمو بال Clinical Gap ابدا … لو وقفت الطب ٥ ولا ٢٠ سنة بتعمل تعديلك و تشتغل زي كانو ماف حاجة حصلت
٣- البحث عن العمل اذا اتوفرت كل الشروط ساهل جدا و صراحة ابدا ما تعبت انو القا وظيفة

٤- عندك اجازة سنوية ٣١ يوم مدفوعة طبعا … كمان عندك فرص لا محدودة تاخد اجازة مرضية ( لغاية يومين ماف داعي لشهادة طبيه … اكتر من يومين بتمشي اي عيادة بطلعو ليك شهادة طبية بكل سهولة )

الكورسات وين ما انت عايزها بتكون مدفوعة في كل المستشفيات بس في مستشفيات بتخت ليك حد بتاع عدد كورسات في السنة
٥- الجواز الالماني الاستلام بعد ٦ سنين و في قانون حيطلع جديد حيكون بعد ٣ سنين بس

٦- سهولة استخراج الفيزا للزوجة او الزوج بعد البدء في العمل
٧- الراتب لكل الأطبة هو واحد ولا بتفرق اذا الماني و لا مغترب او اختصاصك هو شنو … و بزيد الراتب على عدد سنين الخبرة عندك

٨- الشغل عندو ساعات معينة مفروض ما تزيد عليها، لو اضطريت انك تزيدها بتاخد بدالها اجازات او مال بدل الovertime ( اياك تجامل في الساعات الزيادة ، اذا عملت دقيقة بس زيادة لازم تكتبها )
في ايجابيات تانية لكن ما حقدر اتذكرها طوالي بس اسالوني في اي لحظة

الايجابيات مع انها كثيرة و جميلة لكن في سلبيات طبعا
١- اللغة 🙃
٢- الحياة الاجتماعية صعبة جدا و لو ما لميت ليك في مجتمع سوداني او عربي ممكن تصاب بالاكتئاب

٣- التعليم هنا اكثر المستشفيات معتمدة اسلوب تعليم الذات بس تقرا براك و تعافر براك الا تكون محظوظ و تلقا اخصائي قلبو عليك يعلمك او تكون انسان بيدخل روحو في اي عملية رجالة ( دا بالنسبة للجراحة ، باقي الاختصاصات التعليم فيها ممتاز و بالذات التخدير)

٤- الضرائب عاليا جدا ، المرتب مع انو بكفي في اكتر الاوقات لكن اذا كنت متجوز و عندك اولاد ما بيديك اكتر من البكفيك لحياة كريمة صراحة ( لو عزابي بتلم براحة قروش

٥- اللغة 🙉

طيب اسي كدا عرفت الايجابيات و السلبيات و قلت خلاص انا حاقدم للبورد الالماني . انا حقول اول شي المختصر المفيد بالزبط كدا و بعدها الكلام في شرح اكثر

١- تبدا تتعلم اللغة الالمانية ( انت ممكن تجي بدون اي مستوى لغة لكن كل ما انت كنت متعلم و متمرس في اللغة كلما قصرت الفترة حتقعدها بدون شغل في المانيا …في المانيا ما بهتمو بمستواك الطبي او شهادات خبرتك او اي شي بهتمو بس بلغتك )

٢- تختار الولاية الناوي تنزل فيها و تتعلم فيها ( المانيا عندها ١٦ ولاية و كل واحدة فيهم عندها ايجابياتها و سلبياتها و دا محتاج صراحة كدا ثريد لوحدو لانو كدا المعلومات حتكون كتيرة شديد ) .. انا حتكلم حاليا عن الولاية القدمت فيها Niedersachsen

٣- تسجل في معهد لغة و في نقابة الاطبه في الولاية الاخترتها
٤- تقدم للفيزا

٥- تنزل في المانيا و تنتظر لين ما تجيك مواعيد امتحان Fachsprache Prüfung الهو باعتبارو اذن مزاولة مهنة مؤقت و بيهو بتبدا الشغل

٦- تمتحن Kentnisseprüfung و كدا رسميا عندك اذن مزاولة دائم و الروتيشن كدا ببدا يتحسب من يوم نجاحك

طيب نبدا بسم الله
تقوم تجهز الورق الاتي :
١- صورة من الجواز
٢- صورة من الشهادة الجامعية
٣- صورة من اكمال الامتياز
٤- صورة من شهادة الميلاد
٥- حساب ادخار ( تقريبا لازم يكون عندك ١٢ الف يورو بس انا ما متاكد تماما من الرقم حاليا )

٦- شهادة اللغة الالمانية و زي ما قلت هي ما ضرورية لكن كل ما كان عندك مستوى اعلى بيكون احسن
٧- تسجيل في معهد لغة ( بتراسل اي معهد لغة و تبدي رغبتك في تعلم اللغة و هم بدوك المواعيد - اي معهد لغة و الارخص بكون افضل لانو اللغة بتتعلمها في الشارع اكتر من المعاهد )

٨- اذا عندك شهادات خبرة او لوجبوك بتاع روتيشن بنصح انك تجهزو لانو لقدام لمن تخلص الامتحانات ممكن يحسبو ليك الخبرة و الروتيشن العملتو)
٩- شهادة حسن سير و سلوك و الفيش

الشهادات الذكرتها دي تعتبر الStandard المطلوب في معظم الولايات . قد تكون في اوراق مطلوبة اكثر او ممكن حتى اقل و دا زي ما قلت بعتمد على الولاية ( كل ولاية عندها صفحة رسمية بكون مكتوب المطلوب فيها )
الاوراق دي لازم تترجم وتتوثق في السفارة الالمانية ( نسختين)

طيب اولا بترسل الورق المتجرم دا في ظرف لنقابة الاطبه مثلا في حالتي انا Niedersachsen Ärztekammer - بعد فترة ي عن طريق البريد او الايميل حيصلك Eingang اللي هو معناتا دخول الورق … اذا وصلت الورقة دي ممكن تمشي تقدم في السفارة الالمانية للفيزا

قدم للفيزا و المطلوب منك حاول تجيبو و بسرعة .. حاليا الفيزا بتاخد من شهر لي شهرين اذا كل الاوراق كاملة … لمن تصل المانيا تمشي للنقابة و تديهم خبر انك وصلت و هنا حيبدا يدخلو اسمك في الانتظار للامتحان

ادرس اللغة و اتعمق فيها جيدا .. احتسيها ما تتذوقها و في كورسات بتكون موجهة للاطبة الحكومة بتدعمها و بتدفعها ليك ( في حالة نجحت في المستوى الB2 من اللغة الالمانية )
في الفترة دي بتكون جاتك الفاتورة للامتحان على حسب انت جاهز كيف ممكن تدفع او تنتظر اول

طيب هو الامتحان الاول عبارة عن شنو Fachsprachprüfung
هو امتحان لغوي بحت حيث هم بيقيمو قدرتك انك تاخد History من العيان و تعمل Documentation و في Discussion زي ٥ دقايق عن الحالة الاخدتها
الامتحان كConcept ساهل بس اتذكر هم مركزين في لغتك اكثر من العلم

و انا شخصيا كنت شايفو اصعب من الامتحان الثاني حيث كنت لسع مبتدئ في اللغة بس على الاقل عدد المحاولات لا نهائية …. تعتبر Niedersachsen فيها اسوء امتحان لغة طبي لانهم بستخدمو بروفسرات لغة و انا شخصيا رسبت مرتين 🤣

بعد ما تنجح باذن الله هنا ممكن تشتغل وين ما عايز بس في حدود الولاية الانتا فيها بس .. في حالتي انا Niedersachsen فقط و فعليا بديت شغل في Rehabilitation ٦ شهور لين ما جات مواعيد الامتحان الاخير

Kentnisseprüfung هو الامتحان الكبير و هو امتحان نقطة تحولك في المانيا .. بعد الامتحان دا تاني ما عندك اي هم امتحان تاني ( ايوا امتحان الاختصاص بيكون في النهاية لكن من تجارب الشباب السودانيين فهو اسهل و اقصر من اي امتحان في المانيا)

هنا بكون عبارة عن oral exam مدته ساعتين بتاخد في البداية History و تعمل examination و بعدها بتبدا ٣ راوندات فيها بتتسال عن اي شيء ممكن .. بس ما تشيل هم دا امتحان لزول في مستوى طالب ما اخصائي يعني الاسئلة بتكون سطحية جدا و بس دايرين يتاكدو انك طبيب امن جدا ..

بالنسبة لي كان اسهل امتحان مر علي في المانيا بس برضو الواحد ما يستهين بيهو لانو عندك ٣ فرص بس لو ما نجحت ماف طريقة تعدل ..

و كذا انت نجحت و تحمد ربك و تقدر تبدا الروتيشن بتاعك في المجال الراغب فيهو .. الكلام طبعا ساهل لكن الفعل صعب الدرب دا مع انو واضح لكن حيتطلب منك اجتهاد و عزيمة و فوق دا كلو صبر كبير جدا

في النهاية عايز اقول حبة نصايح لو قررت تخش للبورد الالماني .
١- اتاكد انو الدرب ما ساهل جدا و المفتاح ليهو هو اللغة اللغة ثم اللغة
٢- اختار الرفيق قبل الطريق .. الدعم النفسي مهم جدا في المانيا بالذات الفترة انت ما شغال فيها بعتبروك انسان بلا قيمة
٣-ما تتسرع في اختيار الولاية

انا لمن اخترت Niedersachsen في الوقت داك للاسف ما كنت بعرف عنها اي معلومة ولو كنت عارف سوء الامتحان الاول هناك كان اخترت ولاية تانية و تقريبا اختصرت على روحي ٨ شهور لكن دا قدر ربنا و ما عندنا اعتراض فيهو

و اخر نصيحة بقولها هو استثمر في نفسك و في الوقت العندك … الزمن ما بيرجع و حتندم على اي لحظة انت قعدتها بدون ما تخطط او على الاقل تسعى انك تطور من نفسك

غايتو دا نهاية الثريد اذا في اي معلومة نسيتها او غلطت فيها و الغلطات المطبعية كمان 🙉 اعفو لي و اذا في اي سؤال او استفسار انا موجود
بس طالب منكم الدعوات و ادعو ل@dr92semos كمان لو ما البوست الكتبو ما كان فكرت اكتب الثريد دا
✌🏽

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد