أهلاً ، في الثريد دا حابي أشارك تجربتي الشخصية عن طريق السفر بي ارتريا من كسلا، حأكتب فيهو كل التفاصيل و التكاليف و أرقام ناس ممكن تساعدكم في الرحلة :
أيًا كان موقعك في السودان حتتجه على كسلا، أول ما تصل كسلا بالسلامة أتأكد انك تكون عامل print out للڤيزا او الإقامة + مصور الجواز، لو وصلت كسلا لحدي ٣ عصر ممكن تمشي المعبر طوالي ، لو وصلت بعد ٣ أحسن تبيت لأنو آخر بص بيتحرك من المعبر الأرتري ٤ و لو فاتك الا تبيت في المعبر
اول ما تصل حتأجر عربية توديك اللفة ( المعبر السوداني)، الجوازات السودانية ما شغالة فما فيها إجراء، دا رقم عبدالرحمن 0912963757 ممكن تتفقوا معاهو يوصلكم ،و حيساعدكم في المعبر و بيوصلك لحدي المعبر الأرتري، اول ما وصلت في واحد قال لي بوديك بي ٥٠، و المشوار أصلاً حقه ١٥ ألف
لمن تصل المعبر السوداني حيقولوا ليك مقفول و في النهاية بيمرروك لو عندك ڤيزا او إقامة، بتخش تصل المعبر الأرتري بيشيلوا منك الجواز بيدوك ڤيزا شهر (مجان) و يختموا ليك الدخول ، بتنتظر البص البيوديك تيساناي، في بص ٩ صباحاً و في بص ٤ عصر، فحاول ظبط زمنك يكون قريب من واحد من الباصات
بالنسبة للعملة ال ١٠٠٠ نكفة عاملة ٤٠ الف سوداني تقريباً ، غير قروشك في كسلا او لمن تصل تيساناي( ما تغير في الحدود) ممكن تخلي معاك ١٠٠٠ نكفة في الأول ممتازة و ممكن تقضيك لحدي ما تسافر
اول ما تصل تيساناي حتلقى فنادق كتيرة ( عادية ) الليلة بي ٥٠ نكفة ( ٢ الف سوداني ) ، عندك خيارين عشان تصل أسمرا ، تبيت و تصحى الصباح الساعة ٥ تشوف تذكرة لي بص متحرك ( بي ١٠٠ نكفة) احتمال تلقى طوالي او تلقى اليوم البعده، او لو مستعجل تركب في عربية خاصة بي ٥٠٠ نكفة ( ٢٠ الف سوداني)
تيساناي ما فيها إنترنت لكن زين بتشتغل مكالمات في بعض الأماكن فممكن تطمن ناسك، طبعاً قبل ما تبيت في الفندق حتمشي قسم الشرطة قريب يسجلوك و يدوك كرت أمني كدا تديهو لي صاحب الفندق، بالنسبة للأكل طلب الفول بي ٢٠ او ٢٥ نكفة ما مكلف يعني، دا كل ما يخص تيساناي
بعد ما ركبت و وصلت أسمرا، حتمشي تسكن في شارع الحرية او Harnet street , لأن فيهو وكالات السفر و المطاعم و السوق و كل الخدمات، في فندق اسمه vittoria ، دا رخيص و كويس، الغرفة لشخصين بي ٢٠٠ نكفة( ٨ الف سوداني) و لو براك ١٥٠ نكفة( ٦ الف )
الكنيسة دي معلم بارز قدام الفندق
الكنيسة دي معلم بارز قدام الفندق
اول ما تخت حاجاتك تطلع على فلاي دبي طوالي و تحجز تذكرتك لأنو السعر بيفرق كل ما اتأخرت، لو ماشي السعودية بي ڤيزا ، في وكالة اسمها الوادي في نفس الشارع بتشتغل ليك الإجراءات و تدخل ليك الجواز لكن ما عندي فكرة دقيقة عن تكلفتها يقال ١٦٥ دولار
المشاوير دي كلها بالأقدام في نفس الشارع، حبيت تتفسح شوية ، الطرحة بي ١٠ نكفة، و لو داير تأجر التاكسي براك بي ٧٠ نكفة ( دا سعر ثابت اي مشوار )، المطاعم في الشارع كله، البيرقر مثلاً بي ٤٠ لي ٥٠ نكفة ( ١٦٠٠ - ٢٠٠٠ ) سوداني، و لو أكلت أكل شعبي حيطلع نفس الشير تقريباً، دا البي ٥٠ نكفة
عموماً الحاجات اسعارها مناسبة ، بالنسبة للإنترنت في محلات مخصصة، الساعة بي ١٥ نكفة و صالحة لمدة اسبوع ، بتشتريها و يدوك باسوورد ترسل لي ناسك و انت في المحل، و تقفل و ترجع في وقتك العايزه، ما تشتري شريحة اتصال لأنها غالية و ما منها فايدة
في نفس الشارع في WU و صرافة تحول قروشك، معظم الفنادق ما فيها كوبس ثلاثي فيا ريت تسافر بالمشترك بتاع الكهرباء بتاعك، التاكسي للمطار من شارع الحرية بيقولوا ١٥٠ - ٢٠٠، انا مشيت مع موس 07282270 بي ١٢٠ و إنسان محترم و مواعيده دقيقة و بيعرف عربي و إنجليزي كويس قول ليهو من طرف طلال بس
معلومات عامة:
ارتريا أمان شديد من الحدود لحدي المطار ، ما في نهب او اجرام
الشعب جميل و بيحترم السودانيين لي درجة لا توصف، حتى الأولوية لي السودانيين في تذاكر البص و
في صاحب سوبرماركت ادانا فواكه هدية لأننا سودانيين بس، فقدر ما أكتب ما بقدر أوصل ليكم التعامل الجميل حقهم و احترامهم
ارتريا أمان شديد من الحدود لحدي المطار ، ما في نهب او اجرام
الشعب جميل و بيحترم السودانيين لي درجة لا توصف، حتى الأولوية لي السودانيين في تذاكر البص و
في صاحب سوبرماركت ادانا فواكه هدية لأننا سودانيين بس، فقدر ما أكتب ما بقدر أوصل ليكم التعامل الجميل حقهم و احترامهم
لو شايل معاك عملة ما مشكلة ، شخصياً من دخلت لحدي ما وصلت المطار ما في زول سألني ، الا في المطار و سقفك ١٠ ألف دولار زي ما معروف
طيب لو انت ماشي بلد الڤيزا بتاعتها on arrival لمن تصل المعبر الأرتري بتكلمهم و هم بيتصلوا يتأكدوا و بيدخلوك عادي، معلومة تانية لو حابي تطول في ارتريا ممكن تمشي يمددوا ليك الڤيزا شهر لي ٦ شهور و مجان برضو، بأكد تاني انوا مافي اي رسوم بتدفعها في ارتريا من تدخل و حتى تسافر إلى وجهتك
أتمنى أكون قدرت أساعد و أغطي كل الجوانب المهمة ، اذا في زول عنده اي استفسار يتفضل يكتب و حأرد ليهو طوالي ان شاء الله و شكراً
أخر نقطة ، الرحلة من كسلا لي اللفة نصف ساعة ، و من المعبر الأرتري لي تيساناي نصف ساعة برضو،و من تيساناي إلى أسمرا ٨ ساعات
جاري تحميل الاقتراحات...