حصل موقف رائع انهاردة في السجل المدني، بجملت العبث اللي بيحصل في حياتي يعني..
مقدم على قيد عائلي من حوالي 15 يوم عشان الجيش والتأجيل،والمفروض خلاص استلمه، ورايح لا بيا ولا عليا عادي،بقول للموظفة ليا قيد عائلي مقدمه يوم كذا ،فضلت تدور، وقالتلي أه،في زوجة تانية للأب هات بياناتها 😂

قولتلها : نعم؟ زوجة تانية لمين؟ 😂
قالتلي للأب يا أستاذ وقالتلي اسمها كمان! وعايزة شهادة ميلادها وقسيمة الجواز..
أنا حصلي إيرور، ورجعت أتأكد من اسمي، انتي متأكدة يا ولية، حسن عبدالعليم حسن؟ قالتلي أه..
قعدت خمس دقايق أستوعب الصدمة وبفكر في حسين أخويا اللي هيظهر وأخش الجيش..

روحت لقيت أبويا وأمي قاعدين، فقلت أعمل ايه طب دلوقتي أفضحه قصاد أمي ولا ايه، استنيتها تغفل كدة وقلتله عاوزك برة يا بابا..
خرجت وقلتله ،مين فلانة يا بابا، قالي فلانة مين، قلتله أنت متجوز واحدة تانية؟ طب قولي، أنت بتلبسني؟
قالي أنت عبيط يلا ولا ايه؟ وريته الاسم كامل..

قالي يابني ده من 33 سنة كتبنا الكتاب، وحلفلي إنه مدخلش عليها ، ومحصلش نصيب قبل الدخلة، وأمك عارفة 😂
قلتله طب حللي الحوار عاوزين شهادة ميلادها ،قالي شهادة ايه يابني هو أنا أعرف عايشة ولا ماتت أساساً قولتله اتصرف يا عم هيدخلوني الجيش 😂
خدته وطلعنا على السجل، دخل للست جوا..

قالها جرا ايه يا جدعان أنتوا بتفضحوني مع مراتي وعيالي؟
قلتلها لا معلش دوري كويس كدة ليكون متجوز بجد، قالتلي متخفش دي بس..
والعجيب إننا روحنا طلعنا شهادة ميلاد وجواز وطلاق عادي وطلع فعلاً طلاق من 33 سنة..
أنا عيشت أكثر ساعتين عبثاً في حياتي على الإطلاق، كان هيجرالي حاجة 😂