رتبها

مساء الخير ....
📷 أخبار الكوكب أبو أوزون مخروم 📷
ولو إنتوا مش متابعين أخبار الكوكب أبو ولمؤاخذة أوزون مخروم ....
بسرعة هاتوا كوباية السحلب بالنعناع من اللي بيهدي .... الأعصاب يعني
وتعالوا ناخد لفة ف آخبار الكوكب...
ومطولش عليكوا ... وإيييه !!!؟؟
وقولولي لاء طول....

،📷وع الناحية التانية من الكوكب....
،📷 الامم المتحدة
طلع ولمؤاخذة أنتوني جوتيرش السكرتير العام للأمم المتحدة تعليقا على موجة الحر اللي بتجتاح العالم اليومين دول وقال
لو إنتوا فاكرين إن دي موجة حر وهتعدي
لا إنسو دا الأسوء لسه مجااش
آه والله قال كدا على عرة الكواكب ابو أوزون مخروم

،📷 وع الناحية التانية من الكوكب...
،📷 إنجلترا
لاء ثانية واحدة ... إحنا حنتكلم عن الشعب ولمؤاخذة الإنجليزي اللي هما يعني كريم شانتيه الكوكب
طلع علماء إنجليز إمبارح وقالوا إن إجراءات الحكومة تجاه تغير المناخ وموجة الحر اللي بتجتاح البلاد بلح
اه والله قالوا بلح بس بالإنجليزي يعني

وان درجة الحرارة وصلت ل ٤٠ درجة مؤية ومات ٨٠٠ انجليزي بسبب موجة الحر اللي بتجتاح البلاد
لاء ثانية واحدة دول مفهمنا ان النظام الصحي ف انجلترا دا اعظم نظام صحي فالكوكب
وان المواطن الإنجليزي لو قال أح...
مممممم أقصد قال اح من الحر يعني
بتتحرك الأساطيل علشان تبرد.... مممم واتيفر يعني

بس العلماء الانجليز مسكتوش على كدا...
وقالوا كمان ان درجات الحرارة العالية دي بوظت قضبان السكك الحديدية هناك وممكن دا يتسبب فكوارث
والحكومة الانجليزية عاملة ودن من طين وودن من عجين
اه والله كتبوا كدا فالتقرير

،📷 كمان ف إنجلترا...
الأمير وليام عنده حتة بيت صغير كدا مبني على مساحة ١٩ فدان ف مقاطعة ويلز
والأمير وليام عامل البيت ده وموضبة لمزاجة ...
موكنة يعني
ف قالك انا جاتني فكرة فظل الأزمة الإقتصادية دي....
أنا ممكن أستثمره وأأجره لأي حد بالاسبوع

المهم يعني الملك تشارلز ملك انجلترا اللي هو ابوه يعني حس إن نفسيته تعبانه شوية اليومين دول ومحتاج يغير جو ف قالك أحسن مكان اروح اريح اعصابي فيه فين....!!
قالك بس مفيش غير بيت إبني وهو الراجل مننا بيتعب ويشقى و يعصر على نفسه لمونة علشان يتجوز ويخلف ويربي ليه ...!!

علشان يخلف حتة عيل يبقا ضهره وسنده فالحياه
الملك تشارلز بقا ملك إنجلترا لم الهدمتين بتوعه وراح بيت إبنه اللي فمقاطعة ويلز ولسه بيقوله... إبني وليام حبيب ألبي وحشني..
دا انا جاي اقعد معاك يومين أريح فيهم أعصابي.
رد عليه وليام وقاله بص يا بابا هلا هالله ع الجد. والجد هلاهالله عليه

البيت ده انا بأجره بالاسبوع زي أي شقة فشارع خالد ابن الوليد ف إسكندرية
واللي يتكسف من بنت عمه .... ميجبش منها خضار
ف لو هتقعد فيه يبقا تدفع الإيجار الأول يا معلم علشان منخسرش بعض
على فكرة الخبر ده بجد والله مش ألش مني

،📷 وع الناحية التانية من الكوكب....
،📷 روسيا...
فاكرين لما رجب طيب أردوغان عمل فيها عنتر فجلة لما السويد حرقت المصحف وطلع قال من النهاردة مفيش سويد ومفيش نيتو وكلمتي مش هتنزل الأرض
وطلعت امريكا قالتله ....حنفي

قالهم خلاص تنزل المرادي ... بس المرة اللي جاية إعملوا حسابكوا انها لايمكن تنزل الارض ابدا
ووافق اردوغان على دخول السويد النيتو
وساعتها قولتلكوا يا ترى بوتين هيعمل معاه إيه....!!!
أهو إمبارح يادوب روسيا ردت على تركيا
ولافروف وزير خارجية روسيا إتصل ب أردوغان وقاله....

بص ياض يا أردوغان... إنت طلعت عيل هتيا وخبوء كمان وجبان
و علشان كدا إتفاق الحبوب اللي كانت بتشرف عليه تركيا بح
وضمانات روسيا بحماية السفن فالبحر الميت ومضيق البيسفور.... بح
واللجنة المشكلة بين روسيا وتركيا حليناها خلاص
مش كدا وبس

و لو روسيا لمحت سفينة بتعدي مضيق البيسفور هتعمل من فخادك بطاطس محمرة.... آمين يا اسطى ؟؟
رجب طيب أردوغان منطقش بولا كلمة
وبيقولوا إن بعد المكالمة دي جاله إسهال ومخرجش من الحمام لحد النهاردة
حتطلعلي واحدة إسكندرانية الله يرحمها ويطول فعمرها وحتقولي ....

طب يا كونت إتفاق الحبوب ده كان بين روسيا وأوكرانيا لتصدير القمح الاوكراني عن طريق البحر الاسود
ايه دخل تركيا فالموضوع وإستفادت إيه ؟؟
شوفي رغم إنك إسكندرانية .... وحد الله بيني وبينكوا بس حفهمك...
شوفي يا ستي...

روسيا حبت تكافئ تركيا على موقفها الاول اللي كانت رافضة فيه دخول السويد حلف النيتو وخليتها تشرف على إتفاق الحبوب بين روسيا وأوكرانيا
وأي سفينة حبوب اوكرانية تعدي من مضيق البيسفور تركيا ليها التلت
يعني المعلم أردوغان لا بيبيع ولا بيشتري ولا بيزرع قمح وكان بياخد التلت إتاوة

يعني بالصلاة ع النبي كدا القمح اللي كان بيأكل نص الكرة الارضية من أوكرانيا كانت تركيا بتاخد إتاوة عليه ومتعشية معاها أوووي
بس طبعا أمريكا زغللت عين اردوغان وقالتله لو إنضميت لينا هنرجع مفاوضات انضمامك للاتحاد الاوروبي وحنديك ال F16

طبعا اردوغان ريل على نفسه و طلع بعدها وقال السويد اصلا فحلف النيتو من ايام الفراعنة
انا بقا عايز اقولك يا اردوغان اللي متغطي بالامريكان عريان .... حتى أسأل دول الخليج

،📷 وع الناحية التانية من الكوكب...
،📷 فرنسا...
طلع الرئيس ماكرون رئيس فرنسا تعليقا على إلغاء روسيا لإتفاق الحبوب وقال...
روسيا بالقرار ده غلطت غلطة حياتها....!!

وماكرون إستكمل كلامه وقال...
يا جاي على قوتي...... يا ناوي على موتي
ف هل هو يقصد إن كدا إتقرت الفاتحة على روح روسيا
ولا دا حيكون سبب لإعلان الحرب العالمية التالتة على روسيا

،📷 وع الناحية التانية من الكوكب...
،📷 أمريكا....
ف امريكا بقا في جندي أمريكي من القوات الامريكية اللي فكوريا الجنوبية عدى المنطقة الآمنة وعدى الحدود ودخل كوريا الشمالية
والامريكان لحد دلوقتي ميعرفوش عنه أي حاجة
طبعا الجندي الامريكي ده زمان الكوريين عاملين من فخاده بطاطس محمرة

بس الصراحة الامريكان مش ساكتين من إمبارح
والخارجية الامريكية عمالة تتصل بكوريا الشمالية كل شوية وتقولهم في جندي امريكي عدى الحدود وجالكم
تقوم ترد عليهم كوريا الشمالية وتقولهم النمرة غلط يا عماد

،📷 وع الناحية التانية من الكوكب
،📷 الجزائر
الرئيس الجزائري ف الصين ودي اول زيارة ليه للصين والصراحة يعني عامل عظمة هناك
واتفق مع الصينيين على عمل أكبر مصنع لصناعة السيارات الكهربائية ف أفريقيا

الصراحة انا عجبني الجزائريين ودماغهم وماشيين بخطوات ثابته وعارفين هما عايزين ايه
غير تونس وغير المغرب

،📷 وع الناحية التانية من الكوكب....
📷 كوكب تحيا مصر 📷
،📷 وفكوكب تحيا مصر.....
الخبر الاول من كوكب تحيا مصر.... فاكرين زمان لما كنا بنسمع عن المشاريع اللي بيعملها صندوق السعودية السيادي وصندوق الإمارات السيادي وكنا بنتمنى مصر تعمل زيهم بس للاسف

معندناش بترول علشان نغرف منه ونحوش زيهم
آه دا كان زمان .... بقا
طب فاكرين سنة ٢٠١٨ لما السيسي طلع وقال بيعيرونا بفقرنا بس انا مش هسكت و هنعمل صندوق مصر السيادي....!!
وساعتها الشعب كله و العالم كله قعد يتريق ويقولك وهي مصر حيلتها إيه علشان تعمل صندوق سيادي...؟؟

أهه يا برنس ....وبعد خمس سنين من وعد السيسي ....
النهاردة صندوق "مصر السيادي" بقا ف قائمة أكبر 50 صندوق سيادي ف العالم
ودا مش كلامي ولمؤاخذة ...
دا التحديث الأخير لصناديق الثروة السيادية العالمي اللي نشرته
"SWF institute".

وبتقول كمان إن الصندوق السيادي المصري اللي تأسس سنة 2018 إحتل المرتبة 47 عالمياً
مش كدا وبس...
والـ 12 عربياً بحجم أصول مدارة يبلغ 12 مليار دولار
خد بالك ال١٢ مليار دولار دول مش محسوبين من الإحتياطي النقدي اللي فالبنك المركزي اللي هما ٣٧ مليار
لا يا حبيبي دول غيرهم خالص

دول شغالين فمشاريع الطاقة والغاز والهيدروجين الاخضر والأصول التابعة للدولة
السيسي وعد وقال.....
بيعيرونا بفقرنا...... بس أنا مش هسكت
علشان كدا أنا بقولك ...
مع السيسي ..... مش حتقدر تغمض عنيك

،📷 وفكوكب تحيا مصر....
مجموعة البريكس هتجتمع فجنوب إفريقيا ودا إجتماع مهم جدا ل مصر...
وطبعا بوتين هيحضر ...
بس المحكمة الجنائية الدولية بتطالب جنوب إفريقيا بتوقيف بوتين والقبض عليه بتهم جرائم حرب ف اوكرانيا...

طبعا رئيس جنوب إفريقيا خبطلهم حتة دين ضحكة رقيعة مع شخرة وقالهم إنتوا عارفين دا معناه إيه .....؟؟
دا معناه إعلان حرب
ورفض طبعا الهجص ده
بس إحنا ملناش دعوة بكل الهري ده وخلينا نسأل السؤال المهم....!!
ليه بقا دي أهم قمة بالنسبة لمصر؟؟

علشان مجموعة "بريكس" قررت التوسع ف عدد أعضائها بعد ما قدمت 9 دول بشكل رسمي طلب للانضمام للتحالف اللي بيضم "الصين"، و"الهند"، و"البرازيل"، و"روسيا"، و"جنوب إفريقيا".
مين بقا الدول اللي مقدمة طلب إنضمام .....

"السعودية"، و"مصر"، و"البحرين"، وإيران"، و"إندونيسيا"، و"الأرجنتين"، و"بنغلاديش"، و"الجزائر"، و"الإمارات"،
طب تخيل كدا لو الدول دي كلها إتقبلت فالإجتماع اللي جاي فجنوب إفريقيا....!!
هيكون الناتج المحلي للدول الأعضاء دول
32.66 تريليون دولار
لا ومش كدا وبس...

دا هيكون التعامل بينهم بالعملات المحلية لحد ما يعملوا عملة خاصة بالبريكس
أقعد بقا كدا وتخيل لما السيسي قال إن الدولار هيكون تاريخ...
كفاية كدا..... وتقعدوا بالعافية
ويارب اللي ياخد البوست منغير ما يكتب إسمي عليه يعمل ببيي على نفسه وهو نايم بالليل

#كونت_ديمونت_كريستو
📷 يديمك 📷
بيعيرونا بفقرنا....... بس أنا مش هسكت
عبدالفتاح السيسي
والسلام عليكم ورحمة الله وبركاته
تحيا مصر
تحيا مصر
تحيا مصر

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد