رتبها

قصة مش قصيرة
مُر السكر
مشبكين إيديهم ورايحين يقدموا لحسام الصغير، ايده الشمال في ايد حسام وايد حسام اليمين في ايديها.
في ايده دفتر المحاضرات ومعلقة على كتفها شنطة المدرسة،وحسام بينط بين ايديهم ويرفع نفسه ومصطفى وحنان يشدوه لفوق لفوق
حسام بالنسبة لهم حجة وخيط وصال
#شيرين_هلال
١-👇

شارع أمين عبده يشهد على جيرتهم من زمن.
دخلوا مدرسة شبرا الابتدائية يوصلوا حسام المدرسة اول يوم سوا. بالنسبة لهم حسام الربطة المشروعة ادام الاهل والجيران، وحسام الولد الشقي بيحب وجودهم معاه. وكل يوم نفس المشوار الصبح بيوصلوا حسام لحد ما قربت تخلص السنة و هى بطلت تنزل كل يوم
-٢تابع

دي في ثانوية عامة مذاكرة ودروس.
بس السطوح مقصرش معاهم،
عارفين ١١:٣٠ تمام يطلعوا عند الحمام يطمئنوا على بعض وينزلوا جري اوام.
وفي ليلة العمارة اتملت اصوات غريبة وناس عياط وصويت ، والد مصطفى اتوفى وسابله مها و ايمان وحسام وامهم!
خلصت الامتحانات و خلص العزاء
-٣تابع

وراحت حنان تزور الجيران بحجة تشوف حسام وتواسي مها وايمان اخوات مصطفى
وطبعا كان في لقاء في السطوح الليلة دي
بكى مصطفى ادام حنان واشتكى جامد وكتير وقالها مفيش نصيب يا بنت الناس ابويا كان مريض وملوش معاش، انا اللي هصرف واجوز اخواتي البنات، شوفي حالك يا حنان
اتحايلت عليه ميسبهاش
-٤👇

وبعد محايلة كتير برضو مرضيش
جريت على تحت تبكي من غير دموع ايام وليالي طويلة دخلت كلية تجارة عشان تبقى زميلة مصطفى في اخر سنة له في الجامعة واتعمدت تحتاج له يعرفها كل حاجة حتى لو عارفاها، عشان توسع الطريق لمصطفى، ومحدش رجع مصطفى الا رحلة الجامعة لما قالت له طالعة مع زمايلي.
-٥تابع

اتخيل هو : دا يقولها كلمتين و دا يشوفها حلوة و التاني يحاول يتعرف عليها.
-رحلة ايه مفيش رحلات
•ليه هما لغوها
-لا انا قلت مفيش رحلات
•يعني ايه قلت؟ لو شايف حاجة غلط انصحني
-مش محتاج انصحك انتي طول عمرك بتسمعي كلامي. اسمعي الكلام ،اشمعنى دلوقتي؟!
-٦تابع

•عايزة اروح الرحلة يا مصطفى فيها ايه اغير جو مع زمايلي و زميلاتي.
- الله لا يسيئك متفوريش الدم في نافوخي.
•هى تحكمات وخلاص!
-معنديش فلوس اطلعك الرحلة دي و مش هعرف اطمن عليكي وانتي معاهم يا بني آدمة.
•يعنى انا اللي هعرف اتبسط من غيرك؟!
-يعني مش هتروحي صح؟
•بشرط واحد بس
-٧تابع

-امر مش شرط
•نيجي كل يوم الصبح مع بعض الكلية توصلني لحد المدرج وتيجي تاخدني
-يا حنان انا بتمنى دا، بس عشان تعرفي تكملي حياتك انا مش عايز اكون ..
•قلت لي بيحجزوا الرحلة منين؟
-خلاص يا نور عيني حاضر
وكملوا السنة كلها رايحين جايين ومصطفى كمان بيذاكر لحنان عشان هو من الشاطرين
-٨👇

خلص مصطفى اخر السنة واشتغل مندوب مبيعات اسرع حاجة يقدر يجيب منها فلوس وحنان كل سنة بتنجح هى كمان بس كان من غير مصطفى لانه كان بيشتغل كتير وشغلانته فيها سفر بالايام.
واتخرجت حنان ….
وبدأت فقرة العرسان ، عريس داخل والتاني خارج، ما هى حنان اصلها بنت حلال ،
-٩تابع

عيلة طيبة ، أب كتير العيال متوسط الحال و ربك مبارك في الاحوال ، أم طيبة قليلة الكلام وكتيرة الحنان، أصلها أم حنان . ومع العرسان خرجوا من البيت كمان واحد واحد وواحدة واحدة اخوات حنان وكل دا وأخينا مش دريان. وحنان بترفض العرسان وابوها نفسه يجوزها وامها كمان،
-١٠تابع

لكن مستحيل تشوف نفسها في حضن حد غير مصطفى. في يوم اتقدم لها ابن صاحب العمارة مهندس بترول في النرويج ، وسيم وشيك وعربيته بتقفل الشارع لمًا بيوصل والده يلم الايجار ، عريس لوقطة ميترفضش.
-يا بنتي طيب اقعدي معاه مرة
•يا بابا مفيش قبول
-نجرب منقطعش النصيب
-١١تابع

•انا هجيب العريس بنفسي لما اعوز اجوز لحد عندك يا حبيبي ، متقلقش عليا.
-العمر بيعدي وانا مش هعيش لك العمر كله والراجل ظروفه كويسة .
~سيبها يا حاج متضغطش عليها عشان مترجعش تقول انتو دبستوني
-انتي أم انتي، الواحد بيشوف الامهات ملهوفة انما انتي على قلبك مراوح يا ستي
-١٢تابع

~كل شيءٍ قسمة ونصيب وحنان عارفة مصلحتها دي اعقل واحدة في ولادي
-العقل دا ساعة الجواز بيروح منها فين؟
•يا بابا انا بفكر في مستقبلي اهم والجواز يجيي على مهله
-انا سايب لكم البيت وماشي اعملوا اللي انتو عايزينه ، أنا عملت واجبي وهو النصيحة ، بكرة تندمي يا حنان أنتي وأمك.
-١٣تابع

مشي ورزع الباب والأم مسكت حنان من ايدها
~أبوكي بيتكلم صح ، بس عشان أنا عارفة إن قلبك مش خالي سايباكي لحد ما تيجي إنتي تقولي أنا كنت غالطانة
•يا ماما مش هجوز دلوقتي
~انتي متعلقة في حبال دايبة ومفيش ضمانة والعمر مبيتعوضش، ومقدرش اقول لابوكي الحدوتة دي ساعدتك تضيعي العريس
-١٤تابع

وانا جوايا مقهورة عليكي،كنت في سنك وفاهمة مشاعرك، عيشي تجربتك لاخرها بس يا رب تبقى عاقلة ومتضيعيش من عمرك أكتر من اللازم
•ماما أنتي عارفة مصطفى راجل ومش لعبي،بس ظروفه مش مساعدة
~أنا عارفة إن بنتي بتضيع عمرها مع واحد مش هيجوزها الا لما شعرها يبيض،ويضيع عليها أحلى سنين
-١٥تابع

•دا اختياري ومعرفش اكون لحد غيره.
~انتي حرة بس أنا وأبوكي مش عايشين لك العمر كله وبكرة ترجعي ندمانة بس يا ريت تلاقيني ساعتها حتى أطبطب عليكي مكونش موت بحسرتي عليكي.
•بعد الشر عليكي يا حبيبتي ربنا يطول لي في عمرك.
-١٦تابع

ويجي المعاد الاسبوعي بتاع السطوح ، يتقابلوا ويحكوا وينسوا تعب الاسبوع في الكلمتين الحنيين، في ضمة الايد والسلام ، ونظرة حنينة من مصطفى تعيش عليها حنان للاسبوع اللي جاي وتمر الاسابيع ومعاها لقاء السطوح
-حنان خلاص انا تممت جهاز مها و الفرح بعد اعدادية حسام خلاص يا حبيبتي
-١٧تابع

مشوارنا بيقرب
•ياه أنا مستنية فرحها كأني مستنية فرحي أنا
-عارف يا حبيبتي ما هى أختك برضو،أنا مش عارف لولا وجودك جنبي أنا كنت أعيش ازاي إنتي الصاحبة والحبيبة والأخت، أنتي كل حاجة حلوة في حياتي
تتوه حنان في كلام الحنان ويجي بعدها سيل الحكاوي عن مصاعب واهوال مشوار البطل المغوار
-١٨

مصطفى وحنان يكبر في عينيها الانجاز و يزيد ادامها حجم ظل مصفى في ضلام ليلهم على السطوح وهو بيحكي بالاشارات و يشوح بالايدين ويبرق بيعينه ازاي تخطى الصعب وهو بيسَتر أخته ويدفع مصاريف البيت وهو بيشق الطريق للفتح العظيم تمهيدا للوصول إلى حبيبة العمر حنان.
-١٩تابع

وفي الشغل حنان شاطرة في الحسابات مرتب ضعيف لكن الشركة مريحة وزمايلها مجموعة لطيفة . ٦سنين زميلة لأحمد من يوم التعيين وهو معجب و بيحبها ووراها في كل مكان شايفها بنت حلال ومش عارف ليه لا بتتجوز ولا بتوافق عليه. آخر مرة قالت له أنا ممكن اسيب الشركة لو عرضت عليا الجواز تاني.
-٢٠تابع

استسلم لطلبها وفضلت ادامه كفاية بيقدر يشوفها كل يوم، حتى لو مفيش كلام بس على الاقل ادامه
بيتوفى والد حنان وبيكون مصطفى هو الحارس الهمام لشؤون الصوان. صوان العزاء كان هينقصه كتير بدون وقفة مصطفى،هو اللي جري اتفق مع الفراشين وهو اللي كان بيدخل الناس ويخرجها، أصله بيحب حنان أوي
-٢١

خلص العزاء والكل كان بيتكلم عن وقفة مصطفى في العزاء ودخوله البيت يسال على طلبات الحاجة أم حنان وازاي راجل مع الكل ومؤدب وخدوم.
•شايفة يا ماما مصطفى اللي مكانش عاجبك.
~شايفة يا بنتي هو حد اتكلم في اخلاقه!
•امال مش عايزة تصبري على ظروفه ليه
-٢٢تابع

~حنان أنا ست فقدت جوزي من كام يوم مش فايقة يا بنتي للمناهدة ، سيبني لحالي الله يهديلك الحال.
وبعد موت الأب شافت حنان في مصطفى الأب البديل سنيين وقلدته كل المناصب و الالقاب بالاضافة طبعا لدولاب الحبيب الوحيد و الانسان الفريد والزوج البطل المنتظر.
ويجي معاد السطح الجميل
-٢٣تابع

ويبلغها مصطفى برغبة الشركة فتح فرع في الخليج وعنده اعارة لمدة سنتين، تحضر كل حاجة للجواز بعد السنتين هيكون حوش له قرشين ويجوزوا على طول
-بصي يا حنونة انتي تستغلي فرصة سفري و تختاري كل فرش شقتنا ، وتشتري الحاجات الغالية اوعي يا حبيبتي تسترخصي احنا صبرنا كتير
-٢٤تابع

وربنا بيعوضنا حتى فستان الفرح متأجريش انا عايزك تلبسي فستان متلبسش قبل كدةوحياتك هجيب لك شبكة معايا من هناك من راسك لحد وسطك
•حيلك حيلك دول هما سنتين هتلحق تعمل دا كله امتى اكيد مرتبك مش هيكفي مصاريف جوازة ايمان ومصاريف البيت وعلاج طنط ومصاريف حسام وكمان تجيب كل اللي بتقوله
-٢٥

-سيبيني احلم يا حنونة إنتي تستاهلي أكتر من كدة بكتير وربنا هيقدرني عشان خاطرك يا حبيبتي
اخدها حضن لف بيها الكون والجو كان برد بس جسمه لفها بحنان ، الدفا مع الاحلام كان لهم طعم اتسرسب في احاسيسها اوام. في أمل خلاص .
جريت على أمها اوام تفرحها بالخبر خلاص مصطفى مسافر يجمع فلوس
-٢٦👇

جوازنا و حدد المعاد .
~حنان أنا بس نسيت اقولك أختك محتاجة لي أراعي ولادها ، انتي عارفة جايبة توأم ولازم تنزل الشغل وظروفها هى وجوزها متتحملش مصاريف دادة ولا حضانة فأنا لحد ما الدنيا تتعدل هروح اقعد عندها في اسكندرية.
•ماما بقولك مصطفى حدد معاد الجواز ، إنتي مش سامعاني؟
-٢٧تابع

~كفاية إنتي سامعة نفسك يا حنان ويا رب يا بنتي تسمعي. أختك اللي جايبة التوأم عندها ٣٣ سنة وانتي أكبر منها ب٣ سنين.
•هو أنتي هتسيبني لوحدي أد ايه
~أنتي لوحدك على طول بس انتي مش دريانة
•ماما تقصدي إيه مبلاش كلامك اللي يحرق الدم
~حنان يا حبيبتي ولزومه ايه الكلام
-٢٨تابع

اما اختك تعرف تتصرف بالعيال هجيلك او ابقى تعالي في الاجازات اسالي عليا
سافرت أم حنان وخلاص هيسافر مصطفى بس كان لازم يكون في سطوح جديد يربط صواميل الدماغ و يتبت على الحبال وشد المفكوك واستعدال المعوج.
-بتعيطي ليه بس مفيش داعي أنا هبقى معاكي أونلاين على طول يعني هنتواصل اكتر
-٢٩👇

من الاول
-إنتي بس امسكي نفسك واوعي تبصي لغيري سامعة
مسك معصمها جامد اول مرة يكون عنيف معاها ونظرة التهديد خوفتها جدا وردت بسرعة
•مستحيل يا حبيبي حتى وإنت بعيد مستحيل هكون غير ليك وهى جريت على حضنه كمان اوام(بعدين يخاف او يقلق انها تشوف غيره في الغياب،لازم تطمنه ان كله تمام
-٣٠👇

مصطفى حساس وقماص وكرامته فوق كل اعتبار- لكن مضحى وحنين ووسيم وعظيم وبيحبها طبعا)
وانت كمان اوعى تبص لواحدة غيري هناك يكون احلى مني والجو يخلى لكم هناك
-هو في غيرك ستات اصلا؟ ومين في الدنيا احلى من حنونة بس يا شيخة بلاش كلام فارغ!
-٣١تابع

وعشان يمضي العقد قرر يبوسها لاول مرة بوسة تعلق في ذاكرتها ، تربطها بحبل متين من المشاعر ياخده معاه وهو مسافر ومطمن.
الغريب إن اللي كان مخططه كان صح اوى ومدروس علميا اوى لكن كان في شعور هو محسبلوش حساب:
"هو ازاي كل السنين دي مقربليش ؟
هو دا عينة من اللي أنا اتحرمت منه سنين؟
-٣٢👇

هى شكل الحياة إيه في حضن الحب والبيت والمشاعر والجواز والخلفة؟"
وسافر مصطفى وزادت المكالمات والاتصالات واتعلقت بيه حنان اكتر من الاول وبقت بتعد الايام والليالي للرجوع ، ابتدت تخاف من عقارب الساعة وعداد الايام، ارجع يا مصطفى انا تعبانة اوى من غيرك
-٣٣تابع

، ارجع متخلينيش اخسر رهان العمر والايام دا صوت الصفارات في دماغ حنان اما اترجم لكلام
-انتي من امتى اتعلمتي الكلام الكبير دا يا حنان؟ مالك يا حبيبتي ما انا معاكي طول الوقت تقريبا !
•من وقت ما بقيت لوحدي خالص.
-ما تروحي تزوري طنط واختك في اسكندرية
-٣٤👇

•هو انت مش بتغير عليا من اجوازات اخواتي مالك؟
-انا بغير من هدومك بس لو مضايقة انك لوحدك يعني.
•أنا لو رحت مش هعرف اكلمك خلينا مع بعض.
وتمر الاسابيع وينشغل مصطفى في الشغل وتقل المكالمات لحد ما تقريبا تختفي وتبقى معدلها مرة كل اسبوع.
-٣٥تابع

وتطلع حنان وأحمد ومجموعة من الشغل مراجعة لحسابات فروع المجموعة في اسكندرية و مطروح.
بتروح في اسكندرية عند اختها و مامتها وتكتشف جو العيلة من جديد ، بتلعب مع الصغيرين وتسمع لقب خالتو وتتونس بحواديت اختها وجوزها وازاي بيحكوا مواقف مشتركة!
بالنسبة لحنان دي اكتشافات
-٣٦تابع

بيعاد اكتشافها اه دا بالنسبة لكردون العلاقات اللي فرضه مصطفى بخوفه وغيرته من ناحية ومن اندماجها النفسي مع بطولاته وحياته وتضحياته من ناحية تانية اللي فرضته على نفسها، اكتشاف طبعا
بيروحوا اماكن هى وزمايلها في الشغل وبتشوف الناس ازاي بتتواصل عادي والعلاقات ممكن تدي الانسان طاقة
-٣٧

*حنان تعالى اتصوري معانا
-اه طبعا جاية
وبقى على تليفونها صور جميلة وذكريات مع بشر برة المكتب والاجتماعات.
خلص اسبوع مراجعة اسكندرية وطالعة هى وأحمد ولوحدها مطروح بما إنهم الاقدم في الفريق ومش محتاجين باقي العدد لفرع صغير. كل دا ومصطفى غايب ومش موجود بيبعت رسايل يطمنها عليه
-٣٨👇

كل كام يوم ، كتر خيره.
اشتغلوا كتير وجمعتهم فرص للكلام كتير: فطار و غدا وعشا مشي وحكايات ، عرفت منه انه اتجوز وطلق من سكات وعايش مع والده ومرات والده اللي بيحبوه لانه وحيد من بعد وفاة والدته وهو صغير
•إنت إمتى اتجوزت عشان تطلق؟!
-٣٩تابع

=ياه يا حنان هو أنا شفاف أوى كدة ، ما انا عزمتك على الفرح واعتذرتي عن الحضور، الطلاق مكانش فيه عزومة.
•بطل هزار انت عارف اني مبروحش افراح يعني اعتذرت للناس كلها
في وسط كل القعدات برز السؤال:
"هو ليه مصطفى كان مانع عنهم الخروج حتى لو يتمشوا على الكورنيش؟"
-٤٠تابع

دائما كان عنده اعتراض:
لا عشان نحافظ على خصوصية جو السطوح ومحدش يشوفنا ويروح يقول ويعيب عليكي عند الناس
لا عشان أنا محبش الناس تشوفنا مع بعض خلينا بعيد عن عيون الناس
لا عشان مش معايا فلوس اوديكي حتة تليق بيكي مش هخرجك في وسط الزحمة وعيون الناس
-٤١تابع

لا عشان علاقتنا متبقاش متكررة زي كل الناس
كانت دائما ال"لأ"موجودة ومعاها بعبع"الناس"
وهى كانت دائما وأبدا بتقوله"حاضر"يفرح وينتشي ويقولها كلمة حاضر منك بتخليني اسعد واحد
لما بتكون مع أحمد بتكون مشغولة بمصطفى واحساس رهيب بالذنب،وبرضو اول ما تسيب أحمد مخها يروح في مصطفى
-٤٢تابع

والاسئلة بتظهر!!
وفي آخر يوم لهم في مطروح
=اعملي حسابك بالليل أنا عازمك على فسحة وبعدها عشوة حلو ومفيش لأ لو منزلتيش من الأوضة هطلعلك ونتعشى فوق-اعتبريه أمر يا فندم
استغربت أوي من اسلوبه ازاي يؤمرها بالخفة دي وتكون فرحانة كدة؟ محدش قبل كدة عمل لها مفاجاة حتى مصطفى
-٤٣تابع

مكانش بيؤمرها بالعكس كان كلامه بلهجة عادية فيها تمني .
بس هى ليه مبسوطة من اسلوب أحمد الآمر وجرأته عليها بعكس كل السنين دي؟
هو أكيد اتجرأ لما لقى معاها فرصة برة الشغل.
خلص اليوم اللي كان طويل وجاء الموعد المنتظر ولأول مرة تتشيك عشان نازلة مع راجل مخصوص،
-٤٤تابع

حبت الشعور ودورت على ميكب في شنطتها لكن مكنش في كتير والموجود ناشف وتقيل من قلة الاستخدام ! حتى الهدوم هى مجابتش حاجة تصلح للاجازات وكل هدومها شافها قبل كدة- لا دا في فستان امها كانت شارياه عشانها واخدته معاها من اسكندرية.
بس هو مصطفى مختفي فين بقاله تقريبا اسبوع؟ مردش
-٤٥تابع

على رسالتها ليه؟دا ظاهر اونلاين اكتر من مرة، يمكن مشافهاش؟وازاي هى مش قلقانة عليه ونازلة عادي وبتتشيك مع حد تاني؟
لدقايق قعدت على حرف السرير محتارة،هتعمل ايه!
وأنقذها تليفون أحمد وقبل الألو
=ادامك نص ساعة وأكون ادام الاوضة لو منزلتيش8و10لو انتي مش ادامي،متسألنيش هعمل إيه!
-٤٦تابع

طاقة غريبة مشيت في عروقها ، شعور بالسعادة ورغبة جامحة في الاستمتاع بالفرصة ، وزي الطفلة اللي رايحة تتفسح في العيد جريت تلبس وتتشيك والفستان كان أجمل اختيار ومن جواها "الامهات دول عليهم حاجات غريبة يا ناس"
انبهر أحمد بيها جدا كان باين في عينيه قبل ما يقول بلسانه
-٤٧تابع

=الحلاوة دي كلها من حنان؟
•هو أنا مش حلوة يا سي أحمد ولا إيه؟
=إنتي الستات في عيني يا حنان من زمان بس إنتي اللي مش عايزة تشوفي
•هى عزومة مراكبية ولا ايه إنت ناسي إننا متغديناش؟
=مش إنتي اللي مرضيتيش ناكل في الشغل وقلتي خلينا للعشا؟
-٤٨تابع

•وإنت ليه مأكلتش؟ أنا مكنتش جعانة ، بتجوع نفسك جنبي ليه؟
=اديكي قلتيها "جنبي" أنا ممكن أعمل أي حاجة عشان ابقى "جنبي" دي، حتى لو كانت الجوع!
•ايه الكلام دا؟
=مش هتتفضلي العربية في انتظار الهانم!
وخرجت لقت عربية فعلا منتظراهم وركبت جنبه وهو سايق.
-٤٩👇

ركن ادام سوق ليبيا. و هى مكلمتش
=مش قلتي مامتك قالت لك متنسيش تزوري سوق ليبيا في مطروح. اتفضلي والمطعم كمان جنب السوق اتمشي واتفرجي.
•انت ازاي فاكر اذا كنت أنا نسيت!
=أنا فاكر كتير يا حنان إنتي بس اللي مش واحدة بالك.
اتمشت في السوق وشاورت على حاجات بس مشترتش حاجة لانها
-٥٠تابع

مكانتش عاملة حسابها في الفلوس وطبعا مش هتسيبه يدفع لها.
وصلها للمطعم وقالها هروح أغسل ايدي و راجع لك اوعى تطلبي حاجة الا لما ارجع.
•اطلب ايه هو انت يا ابني مش قلت عازمني شكلك بتخلع والاكل هنا غالي وبتدبسني
=اخر فكرتك عني؟ ولا دي فكرتك عن الرجالة انهم بيخلعوا؟
-٥١تابع

قال الجملة وطار من ادامها محسبش حساب الكلام دا دا ممكن يوصلها لفين !
يخلعوا وفكرتها عن الرجالة؟
مصطفى بالنسبة لها كل الرجالة بس مصطفى مخلعش دا مسافر يكون نفسه ويعمل لها بيت حلو. معرفتش ليه الدموع نزلت من عينيها وليه جريت فتحت التليفون تدور على رسالة من مصطفى اللي مخلعش ،
-٥٢تابع

لكن مصطفى كان اونلاين ومفيش برضو رسايل!
رجع أحمد شايل لفة وحطها على الترابيزة، قالها افتحيها
فتحت اللفة لقت فيها كل حاجة شاورت عليها في السوق . برقت في استغراب وحطت ايديها على بوقها وبصت لتحت اووووووي
=متتكلميش ولا كلمة ومتكسفينيش أنا كدة فرحان ومبسوط,
-٥٣تابع

عارفة كام سنة كان نفسي اجيب لك فيهم هدية؟ وطبعا مكنتيش هتقبلي؟! اعتبريني أنا جايب الحاجات دي عشان افرحني أنا مش افرحك إنتي.
ولما رفعت وشها كانت نزلت الدموع من عينيها زي السيل و احمد جه جنبها يمسح دموعها وكان هو كمان بيدمع مش عارف هو السبب إنها بتعيط ولا إيه،
-٥٤تابع

نفسه ياخدها في حضنه بس مش عارف خايف تزعل اكتر هو غلط ولا ايه
عمر ما حد جاب لها هدية برة دايرتها الضيقة أوي،او حد اهتم بيها للدرجة دي
الاوجع من دا كله هى ليه حرمت نفسها من كل دا وليه سابت عمرها يعدي جاف اوي كدة
لكن اخيرا أتجرأ ومسك ايديها بس كانت الدموع غالباها مش حاسة بلمسته
-٥٥

راحت تعوم على امواج الجفاف وكل موجة تشيلها تهبدها من العالي تقع جامد على مساطب الحرمان وكل واقعة منهم اجمد من التانية ، للدرجة دي هزمتها الحنية؟!
١٥ سنة مستنية العيشة ومش عارفة انها من جوا بتموت الحياة وهى عايشة!
مخها عايز الدموع تقف ، أحمد مش فاهم حاجة ومش معقول تنكد عليه
-٥٦👇

وهو جاي يفرحها.
=أنا عارف إن مفيش قبلي حد عمل معاكي كدة ولا كان في حياتك حد عشان مكنتيش سامحة لحد بكدة ، معرفش ليه ومش عايز اعرف يا حنان
•وعرفت دا ازاي مش جايز يكون في، جايب الثقة دي منين؟
=ما هو انتي برضو مش شايفاني،لكن أنا كنت شايفك لدرجة اني بوصلك كل يوم تقريبا بعربيتي
-٥٧👇

ورا المواصلات لحد شارعكم سنين.
ضحكت ومسحت الدموع وابتدت تفوق لكلام احمد العجيب
=متستغربيش احنا زملاء من عمر طويل ، وكنت هجنن ليه بترفضي كل اللي اتقدموا لك وليه مش اجتماعية وليه بتتخطبي او تتجوزي! كان الفضول هيجنني البنت دي ايه قصتها؟ يا ترى في حد كان في حياتها هو السبب
-٥٨تابع

او في حد معشمها ولا في ايه الحكاية؟
هو بيحكي وهى سرحانة و مذهولة ومجننة من روحها ، هو كل السنين دي ازاي مكانتش حاسة بالدنيا من حواليها، بحب زي حب أحمد ، بحزن امها عليها بزمايلها بعمرها باحتياجاتها، صداع كبير ضرب دماغها.
فجأة انتبهت لايدها اللي مريحة في ايد أحمد،
-٥٩تابع

سحبتها خطف وبعدت عن مجال الحرارة من قرب أحمد،وانكسفت جدا من نفسها
حس بالتأكيد بكسوفها وراح على الكرسي اللي ادامها عشان ميضايقهاش ولا يحرجها
=فضلت اروح وراكي سنين ولا مرة تخرجي تقابلي واحد ولا مرة تروحي سينما مع اصحابك ولا مرة يا ظالمة تقعدي في مكان وواحد يديكي بومبة وميجيش!
-٦٠👇

غريبة انتي يا بنتي جدا ايه عندك توحد؟
اخيرا ضحكت ونزل الاكل قطع الكلام
•هو احنا طلبنا حاجة؟
=أنا طالب من زمان بس محدش واخد باله!
•بطل هزار امتى؟!
نزل الاكل باصناف هى بتحبها كتير
•انت عرفت ازاي إني بحب الاصناف دي؟!
=ما أنا بشتغل ظابط مباحث في الفترة المسائية
-٦١تابع

•أنا جعانة بجد ، بس مفاجاءتك سحبت الاحساس بالجوع
=سديت نفسك من أول مفاجأة معقول؟!
•لا بس حسيت جسمي مش قادر على الاكل.
=لا أنا صارف ومكلف وهمشي اشحت لاخر السنة المالية وتقولي مش هاكل ، لا دا انا اوكلك واوكل الفستان القمر دا واوكل افكارك كمان
-٦٢تابع

بتضحك وتستغرب ازاي طلع دمه خفيف وهى منكدة عليه ، وازاي ممكن يكون في حد شافته أكتر ما شافت مصطفى ومتعرفوش نهائي. أخ راح فين مصطفى؟!
شيء في عقلها فعل مخدر لاحساسها بالذنب ، مش عايزة سيرة مصطفى تعكر متعتها باللحظة!
أكلت أكتر من طاقتها بكتير فضلوا يتكلموا لحد ما حست بالتعب
-٦٣تابع

بتبص في الساعة كانت 2صباحا ، نطت مفزوعة
•هو أنا ازاي معاك لحد دلوقتي في الشارع يا نهار اسود…ايه اللي خلى الوقت يجري كدة؟ شكلي ايه ادام الناس
=اهدي يا مجنونة ، هحاسب ونمشي
•انت ناسي الاتوبيس هيعدي علينا 8 الصبح؟
=لو عليا أنا ممكن افضل مطبق ادامك كدة لصبحين كمان!
-٦٤تابع

رجعت الفندق ومفيش دقيقة نوم راضية تيجي ، بكا وضحك ، دموع وسرحان ، حسرة وفرحة ، كل حاجة وعكسها ، دوامة من الافكار .
طول الطريق هى بتتفادى الكلام معاه لدرجة انها نامت في اغلب السكة عشان تهرب من عينيه. خايفة يطلب منها طلب هى مش مستعدة له.
أحمد مكانش شاغل باله بطلب ،
-٦٥تابع

كان كل خياله في الليلة اللي سرقها معاها، في اللحظات الحلوة اللي عرف يخطفها ادام عينيها ، في ابتسامتها وطريقة كلامها ، حركة شفايفها وهى بتكلمه هو، هو بس، بتكلمه عشان هو بيكلمها بعيد عن الشغل، صوت ضحكتها اللي بتطلع بسببه. حسبته: إنها محبتوش ولو كان الحب هيحصل كان حصل من زمان
-٦٦👇

غاية أمله يكون جنبها . حتى وهى مغمضة ونايمة حابب يبص لوشها ، ايه سر حبه ليها ويا ترى غلط إنه لسة بيحبها؟ أسئلة كان بيحاول يوقفها من دماغه عشان يستسلم للحظة صعب اوى تتكرر. الليلة دي هتفضل تعذب في خياله ، لكنها كانت أمنية واتحققت. كأنه بيشوفها لأول مرة،
-٦٧تابع

عنده فرصة يدقق في تفاصيلها ، ملامحها هادية مريحة روحه بشكل غريب، راحة في كل بصة لوشها ، ايديها كانت ناعمة اوي وهى في حضن ايده، ياه يا أحمد واخيرا مسكت إيدها وحسيت بيها ولو مرة واحدة بس. ايه طفولة الافكار اللي كانت في راسك وانت بتتكلم معاها امبارح دي،
-٦٨تابع

لسة بتحبها بنفس الرغبة ونفس الحنية ونفس الشوق؟!
ريح رموشك يا أحمد اللي اتثبتت على وشها ، ضم الرمش على الرمش وخلي بياض عيونك ياخد حقه من البربشة، كل دا سرحان فيها وهى نايمة؟
هتعمل ايه لو صحيت ولقيتك متسمر كدة ؟
ممكن تزعل او تتحرج، وأحمد ابدا، ظابط حرس باكينجهام على وش حنان
-٦٩تابع

محدش ممكن يزعزعه!
رجعوا القاهرة واتعمدت حنان تتعامل على أن كل شيء كما كان وكل حاجة اتنسيت كإنها ما كانت، لكن جواها عارفة ومتأكدة إن الدنيا كان فيها شقلاباظات في الحتة الشمال. أحمد كان حاسب نفس الحساب وعارف إن الليلة دي نصيبه من الذكريات مع حنان، وكانت كافية جدا بالنسبة له!
-٧٠👇

رجع مصطفى يكلم حنان، وطلع انه كان بيمر بأزمة في الشغل يا حرام وخايف يترحل وفضل يحكي عن ازماته وصراعاته وكفاحه كالعادة ومطلوب منها تتعاطف تاني مع مصطفى المغوار اللي الكون كله ضده ، هنا ظروفه دايسة عليه وهناك ظروفه تعباه! بس هى كان في قلبها لسة من العطف حبة ، حبة مش زي الاول
-٧١👇

لكن لسة موجودين،مصطفى اللي فتحت عينيها عليه مش هيتلغي الحب من قلبها له مش معقولة، وبعدين دي حنان حبيبة مصطفى
وفي ليلة خبط عليها حسام افتحي يا ابلة حنان الحقيني
•في ايه يا حسام مالك
_ماما تعبانة اوي يا ابلة ونازل اجيب دكتور ميخائيل يكشف عليها هو اللي ممكن يلحقنا في الوقت دا
-٧٢

•طيب روح وانا نازلة اقعد مع طنط
نزلت حنان ولقت الست تقريبا شبه غايبة عن الوعي وجه الدكتور كشف عليها وطلع شوية ضغط واطي مش حاجة خطيرة، وطلبت محدش يبلغ ولادها طالما طلعت كويسة، كدة كدة مصطفى نازل قريب، اخدت حنان اجازة من الشغل تاني يوم عشان تفضل مع طنط وتراعيها متبقاش لوحدها
-٧٣👇

وفعلا الست كانت في حالة اجهاد كبيرة . روقت حنان الشقة في اليوم دا ومنها اوضة مصطفى وحسام ، بالصدفة وهى بترتب الاوراق وقع ملف باسم مصطفى في ايديها ، خدها الفضول تقلب في الملف وشافت جواب اشعارات البنك بتاع مصطفى والجواب كان مفتوح وبتاريخ قديم ، فتحته لقت
-٧٤تابع

رقم مقرب على الست اصفار في حساب مصطفى ، سابت الجواب ورجعت على الملف تقلب تاني ، وطلع الملف فيه صندوق مصطفى تقريبا !
ورق وعقود اراضي وڤلل وعمارات واسمه مذكور و مرات لاء!
ايصالات صرف نقدية وشيكات بنكية!
ايصالات صرف معاش والده ووالدته؟!!!
همًا مش كان ملهمش معاش؟!
-٧٥تابع

روشتات دكاترة بإسم مصطفى ، هو مصطفى كان بيتعالج؟ دا عمره ما اشتكى؟! يمكن كان عيان ومحبش يخوفها!؟
حاجات مفهمتهاش كانت صدمة الحساب البنكي اكبر بكتير من اي شيء
اعتذرت حنان لطنط ومشيت مشيت مشيت تقريبا بعيد اوى!
ازاي حسابه في البنك ضخم اوى كدة وهدومه كانت باهتة وقديمة ؟!
-٧٦👇

ازاي كان بيشتكي الفقر وميقوليش على فلوسه في البنك؟!
واذا كانت فلوسه قبل السفر بزمان كتيرة كدة و مخطبهاش ليه قبل السفر؟
هو اصلا اصلا اصلا ليه مخطبهاش؟!
دخلت حنان في حالة توهان ليوم رجوع مصطفى اللي كان غريب ، دا منزلش عشان فرح ايمان اخته !!
-٧٧تابع

و رجع مصطفى ورجع السطوح و قابل حنان من غير هدية ولا كلمة ندية، كل كلامه عن الكفاح والعزيمة وازاي اهل البلد هناك صعبين والغربة مرة ومصاريف علاج والدته اللي واكلة تعبه وشقاه وحسام كمان مش راحمه في الطلبات.
بس مسك ايديها وقال
-وحشتيني اوي يا حبيبتي ، صورتك مفارقتش خيالي
-٧٨تابع

انتي معايا في كل مكان عارفة يا حنان انتي الحاجة الوحيدة اللي بتهون عليا الحال
•مكنتش بترد وبتغيب عليا كتير ليه يا مصطفى؟
-الشغل كان قارفنى وانتي عارفة مبحبش اشيلك همي
انفجرت من الضحك بصوت عالي لدرجة انه كان هيحط ايده على بوقها وفضل يسكتها
-بس يا حنان في ايه هتفضحينا يابنتي
-٧٩

•هو ضحكي معاك فضيحة؟
-مالك فيكي ايه دا انا جاي افرحك، انا نازل اخطب لحسام ، خلاص يا حبيبتي هنجوز حسام ونفوق لنفسنا بقى وتنزلي تشتري الشقة وتشترى الفرش
طلعت الاوراق من جيبها وحطتتها في وشه
•ايه دا يا مصطفى؟ شقة ايه اللي هشتريها وانت سمسار عقارات اد الدنيا، معقولة يا راجل؟
-٨٠👇

-دي فلوس الشغل القديم مش فلوسي، امال أنا متغرب ليه يا حبيبتي؟ إنتي فهمتي غلط خالص، لا بجد اخص عليكي، كدة تشكي فيا؟!
•الظاهر انك مبصتش كفاية في الاوراق شايف ايصالات معاش ابوك وامك؟ امال انت كنت بتصرف على مين لما عندكو معاشين مش واحد؟
-٨١تابع

-انتي على فكرة اعصابك بايظة خالص النهاردة والورق دا مش بتاعي؟ انتي تقريبا حد مسخنك عليا، مين يا هانم اللي ملاكي من ناحيتي؟
قولي انك عايزة تتجوزي واحد جاهز وزهقتي من ظروفي طبعا ما هو الفقير ريحته وحشة!
فضلت تبص له بذهول.
-٨٢تابع

-بصي احنا نتخطب و ندخل في شقتكو طالما والدتك استقرت مع اخواتك وانا هدهن لكم الشقة و اغير السراميك عشان اعصابك تهدى وتطمني
•عايز تجوزني في شقة أهلي ، يعني كمان مش هاين عليك بعد دا كله تجيب لي شقة!
-اجيب منين فلوس لشقق ممعييش بقولك هجوز أخويا الصغير ، بعدين ابقى اجيبلك شقة.
-٨٣👇

•كذبت عليا ليه في معاش أبوك وأمك يا مصطفى؟
-المعاش أخد وقت كبير على ما استخرجناه وبعدين ملاليم مش هيصرف ويجوز. قولي إنتي بجد في حد بيشاغلك؟ في حد عايزك ظروفه أحسن مني؟
•هو دا اللي جاي في بالك؟مش اللي اكتشفته ولا معاملتك ليا ولا بخلك عليا ولا السطوح اللي حبستني فيه 20سنة؟
-٨٤👇

-أنا كنت بحافظ عليكي و على سمعتك .. عايزاني اصيع بيكي في الشوارع زي العيال البايظة ؟ لا يا حبيبتي إنتي أغلى عندي من كدة بكتير. حنان أنا بخاف عليكي بجنون.
•بس اسكت كفاية امراض وقرف كفاية
-قصدك إيه أوعي تكوني بتسيبيني… هتتبهدلي من غيري
•اتبهدل ليه عشان حبك والفراق؟
-٨٥تابع

-لا عشان انتي معدتيش صغيرة و الطمع فيكي من الناس هيوجعك، إنتي مش لسة نوغة ، هيجيلك قاع المجتمع ، محدش هيعرف قيمتك ولا يحافظ عليكي غيري. مبقيتيش تنفعي لغيري
•لا متقلقش انت كرهتني في الصنف
-بس أنا شاكك أنك بتسيبيني عشان واحد تاني. اقتلك واقتله فاهمة، انتي بتاعتي من زمان
-٨٦تابع

•اوعاك اسمع حسك أو اشوفك صدفة في سكتي . اللي بينا خلص خلاص مبروك عليك جوازة اخوك مبروك!
زقته من وشها وهو حاول يرجعها بقوة لحضنه قاومت لحد ما نزلت على وشه بألم بكل قوتها، كان في حالة ذهول كبيرة رجع بجسمه بعيييييد أوى و نزلت جري على السلم تعيط بصوت و قفلت باب البيت
-٨٧تابع

عشان تندم تندم اوىً ، فضلت اسبوع مبتردش على حد لا الشغل ولا أمها ولا حتى أحمد، بعد ما عملت لمصطفى بلوك من كل حاجة .رجعت والدتها من اسكندرية بعد فشل كل محاولات البواب انها تفتح له ، اترمت في حضن امها وانقهرت من العياط ، حكيت لها كل حاجة كل اللي حصل ، كل الكلام وكل العبر ،
-٨٨تابع

كل الغلط وكل الحجج. والأم ساكتة وحزينة لسانها مش قادر يقول انتي السبب. صعبانة عليها البنية .
تاني يوم خبط أحمد الباب ومعاه زميلة من الشغل جايين يطمنوا على حنان.
خرجت تقابله وهى حاسة بوهن شديد واحراج كبير ، محرجة من حب أحمد واهتمامه قصاد غشاوة عينيها وتمسكها بالأذى.
-٨٩تابع

اد ايه مكانتش قادرة تقابله ، زي اللي عاملة عملة!
اتحرج أحمد هو كمان لكن امها و زميلتها وجودهم هون اللقاء.
=معاكي جمعة وسبت والحد الاقيكي ادامي في المكتب مجيتيش هتلاقيني جاي اخدك من البيت اظن كلامي مفهوم عند حضرتك اعتراض يا طنط
~لا يا حبيبي معنديش
•تمام يا فندم
-٩٠تابع

ورجعت لحياتها الطبيعية لكن جواها الندم ممرر كل شيء بتعمله ومع كل تقبل منها لحنية أحمد ، كان بيزيد مرارة الندم. لكن أحمد كان عنده طيف من الأمل!
بس حنان شوية بشوية بدأت تطلب أحمد وتتواصل معاه من غير احساس بالندم لكن باحساس بالمرارة.
-٩١تابع

أحمد كل باله في امتى يطلب الطلب امتى تكون جاهزة ومتقولش لاء ، بيحاول يفرمل مشاعره مش قادر .
لكن في يوم أحمد هو اللي مجاش عشان والده كان في المستشفى وقررت تروح تزوره قابلتها زوجة والده بترحاب شديد، عشان أحمد كان مع الدكاترة. الغريب إن الست كان واضح عليها إنها تعرفها .
-٩٢تابع

أخدت واديت معاها في كلام، فهمت منها إن سر أحمد كله معاها وإنها أمه البديلة وحب أحمد ليها معروف
احساس جميل لكن برضو مر
مصطفى كان بيتعمد يخبيها عن الاهل والصحاب
كان ممنوع عليها تحكي مع اخواته أو اخواتها!
كل حاجة بتعملها حلوة يا أحمد بتخليها تفتكر، بتدوقها طعم مرارة لكن فيها سكر
-٩٣

دخل أحمد الاوضة وفرح بوجودها فرحة طالت السقف تقريبا،لكن ربنا ستر ومجريش حضنها ادام الناس من الفرحة
دي حنان جاية بنفسها عشان أحمد
أول خطوة حلوة أحلى من السكر،لأ هى نفسها سكر
فجأة وبدون مقدمات طلبت مرات أبوه منهم يروحوا الكافيتريا عشان أحمد يضايف حنان والراجل محتاج ينام ويرتاح!
-٩٤

=مش عارف اتكلم تعبتي نفسك بجد.
•متقولش كدة دا واجب.
=يا ريتك ما رديتي
•بتقول ايه
=هتشربي ولا اغديكي؟
•لا انا ماشية على طول
=تمشي ازاي بس تعالي نقعد شوية مبعرفش اشوفك
•عشان بلبس طاقية الاخفاء انا كل يوم في الشغل
=لا انتي لابساني على طول
•همشي بجد
-٩٥تابع

شدها من ايديها و دخلها الكافيتريا طلب حاجة يشربوها وكتب ورقة في الخباثة للجرسون ميجيبش الحاجة دلوقتي!
=ايه بقى اللي مغيرك من ناحيتي من بعد مطروح؟انا زعلتك في حاجة؟
•تقدر تقول جديتي في الشغل بتفرض عليا كدة
=اللهم طولك يا روح يا بنتي انا هرقد كدة على سرير جنب ابويا حرام عليكي
-٩٦

•سلامتك ليه بتقول كدة
=انتي بتهربي عشان أنا سبق لي الجواز صح؟
•دي أحسن حاجة عملتها في كل السنين اللي عدت! قصدي يعني كويس انك مستنتنيش
جواز أحمد كان مبرر كافي انها متشيلش مرارة ازيد من اللي حاساها ، مش مضطرة تمرر حلق أحمد بقصة مصطفى، خليه سعيد ومفيش داعي لتقليب المواجع!
-٩٧تابع

=انتي بتكلمي جد ، يعني القصة دي مش بعداكي عني؟
•لا خالص مفكرتش فيها اصلا
=طبيعي عشان أنا ولا على بالك
•تفتكر كدة!
برقت عيونه وبص في وشها المبتسم وقرب بالكرسي منها جامد
•مكنتش مهتمة اه ، مكنتش معاك اه ، بس دلوقتي ….اه
=حنان أنا بحبك ، قولي لي اعمل ايه عشان نكون مع بعض
-٩٨تابع

•ما احنا مع بعض اهو
=صبرني يا رب،لا انتي طول عمرك حِركةولطيفة وبتفهمي
•لاقول الحقيقة طول عمري جبلة قول قول
=قطع لساني لو اقول عليكي كلمة وحشة
•بعد الشر عليك يا أحمد
=قولي اعمل ايه
•لما السكر يحلو يا أحمد هنكون مع بعض قريب
=يعنى الاول كنتي جبلة ودلوقتي عندك خلط في الحاجات؟
-٩٩

اتعامل معاكي ازاي
•هو إنت جبت الشاي والسكر محلوش؟
=أنا هجيب ابويا من السرير على بيتكو وخلص معايا الكلام ، اللي يحلو يحلو ، والمر ابقي حليه على مهلك يا ماما. قلبي السكر كويس يا حبيبتي في الكوباية ، لكن لو السكر بعيد هتعرفي طعم حلاوته ازاي؟
مُر السكر
بقلم
#شيرين_هلال

@kemo138721 القصة دي مستنياك ليلة العيد كل سنة وانت طيب🌹

@MagdaElnahas مكانك هنا يا هانم🌹

@LolaGorgy هنا يا جميلة 😍

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد