رتبها

زينات صدقي، في يوم حلمت إن في بيتها مصاحف من الحجم الكبير، الصبح راحت اشترت زيها من حي الأزهر، وكانت بتعجب ضيوفها فبيطلبوها منها فبتديهالهم، ومفضلش منها غير مصحف صغير تقرأ فيه وبعد كل قراءة تكتب ورقة صغيرة فيها رسالة لربنا زي"يارب افتحها في وشي، وهات لي شغل، يوأسدد ديوني" (1)..

وكان منها برضه:" يارب توب عليّ من الشاي والسجاير، يارب تكرم نادرة، وتهدي لها عيالها طارق وعزة، يارب تحنن عليّ قلب صاحب البيت وتخليه يصبر علىّ في دفع الإيجار المتأخر..يارب ساعدني ووفقني واكرمني في صحتي وابعتلي شغل"(2)

قعدت زينات صدقي 16 سنة في بيتها من غير شغل، ماظهرتش إلا في "السراب"، و"بنت اسمها محمود" 1975 وده أعلى فيلم اخدت فيه فلوس 500جنيه؛ وأول م الحال يضيق بيها كانت تروح تشتغل في مسارح الشركات والجامعات بمقابل زهيد(3)

ورغم ظروف الحال الصعبة، كانت في العيد، الناس كلها بتشتري لحمة ، وزينات صدقي في بيتها بتاكل باذنجان، وكانت بتاكل راضية ومبسوطة، وتجري ع الأوضه تجيب الصاجات وتغني: راح المال وراس المال وقرايبها يرددوا وراها: ومبسوطين وممنونين.(4)

بنت اختها بتقول "في حوار مع الأستاذ أيمن الحكيم": كنت دايمًا أشوفها بتهزر وتضحك، وعمرها ما بكت قُدامنا، مع اني كنت عارفة إنها بتبكي، تدخل أوضتها وتقفل على نفسها وتقعد تعيط على حالها من غير م حد ياخد باله خالص.(5)

بتقول في مرة قولتلها: ياطنط ما تروحي نقابة الممثلين ولا مبني التليفزيون وتوريهم وشّك عشان يفتكروكِ ويشغلوكِ، فكانت تزعل قوي وتقولي: أنتِ ترضي لي أهين نفسي بعد العمر ده والمكانة دي؟!، اسم زينات صدقي ده أنا عملته بدمي وأعصابي وعمري ولا يمكن أفرط فيه..أنا مش ندمانة (6)

ولا زعلانة إني عيطت ..الفن عندي كل حاجة حتى لو ما أخدتش منه أي حاجة..الناس عارفة تليفوني وعنواني واللي عاوزني يطلبني، إنما انا عمري ما أنزل أتسول دور ولا اقولهم انا اهه! (7)

في مرة عبد السلام النابلسي بيقولها بهزار: يا زينات مش معقول كلنا ورحنا الزمالك وجاردن سيتي ومصرالجديدة، وأنتِ لسه قاعدة في عماد الدين، لازم تشوفِ شقة تليق باسمك ، فردت عليه : وأجيب منين عشرين جنيه كل شهر إيجار شقة في الزمالك؟! خليني في عماد الدين على قدي..أهي عيشة والسلام(8)

كانت بتعمل الأكل بإيديها، وفي مرة في فيلم شارع الحب، كانت حاطّة عمود الأكل قدامها، وعدّى عليها حليم حافظ، نادتله: اقعد كُل معايا، ده أكل مسلوق خفيف ع المعدة، فقالها: ياماما زينات ياريت كنت أقدر، انا أكلي اهه وطلع من جيبه علبة دوا، فعيطت ونزل يبوس راسها ويواسيها وأصرت متاكلش(9)

زينات كانت بتعطف على كومبارس اسمه إبراهيم فوزي، وفي مره كان واقف ع المسرح ووقع ع الأرض نقلوه المستشفى ..ومات، تكفلت هي بمصاريف جنازته، وكلمت ناس كتير عشان يحضروا جنازته، وكل ما تعدي الجنازة على قهوة تروح للناس اللى قاعدة تستعطفهم: الميت ده غلبان ينوبكم ثواب تعالوا امشوا وراه(10)

.. وراحت المسرح بعدها ودبت خناقة مع بديع خيري وسراج منير وعباس فارس، لأنهم تكاسلوا عن تشييع الجنازة وقالتلهم: يعني ده لو كان يوسف وهبي ولا محمد عبد الوهاب مش كان زمانكم بتجروا ع الجنازة عشان تطلعوا في الصور..

يمر الزمن وتموت الست زينات ومحدش يمشي في جنازتها غير أهلها.. عشان تودع الدنيا في سلام وبطريقة أفل شأنًا من الكومبارس إياه.. رحمة الله على زينة الفنانات.. زينات صدقي.