ما هو الـــــ (Finance Transformation) أو التحول المالي
مفيش شك أنك سمعت المصطلح ده كتير جدًا في الفترة اللي فاتت … ولو شركتك لم تُطبق تحول مالي صريح فهتحس إنه موضوع كبير …
لكن ممكن تكون بتطبق تحول مالي في شغلك وأنت مش واخد بالك …. تعال أقولك إزاي …
مفيش شك أنك سمعت المصطلح ده كتير جدًا في الفترة اللي فاتت … ولو شركتك لم تُطبق تحول مالي صريح فهتحس إنه موضوع كبير …
لكن ممكن تكون بتطبق تحول مالي في شغلك وأنت مش واخد بالك …. تعال أقولك إزاي …
بص يا سيدي التحول المالي هو باختصار إعادة تصميم وهندسة النظام والهيكل المالي في شركتك عشان كل وظيفة روتينة إما أنها تكون مُعتمدة على التكنولوجيا المالية (FinTech) أو/و بتم بشكل أتوماتيك من خلال أتمتة كل العمليات (Automation).
وبالمثال يتضح البيان … فتعال معي ناخد شركة أمازون ونطبق عليها الكلام ده ….
ومن أهم وأول المراحل في التحول المالي هو الرقمنة والأتمتة (Automation and Digitization)، واللي هي تحويل أي مهمة كانت بتم بشكل ورقي أو يدوي روتيني عشان تتم بشكل رقمي أو ديجيتال من خلال الأجهزة الإلكترونية والبرامج التي يتم التحكم فيها بواسطة الكمبيوتر.
فمثلًا أنت اشتريت مُنتج من أمازون، فبدل ما كانت أمازون تطلع لك فواتير يدوية ورقية، جابت سوفت وير أو برنامج أول ما تطلب الأوردر وتدفع الفلوس تلاقي الفاتورة جاتلك بشكل أتوماتيك على الإيميل بدون تدخل بشري.
وطبعًا مش محتاج أقولك إن الفاتورة بشكل أتوماتيك بتلاقيها سمعت في حسابات الشركة المالية، وبالتالي البرامج تقدر بشكل أتوماتيك تسجل العمليه وتُخرج لك ميزان مراجعة بالقوائم بتاعته وتقدر تعمل كل المُطابقات والمُصدقات والاختبارات اللازمة لضمان دقة السجلات.
وهنا أمازون عندها فواتير كتيرة محتاج يتم معالجتها بشكل متكرر وعشان عملية التكرار دي، فالسوفت وير بيعتمد علي التشغيل الروبوتي للعمليات (Robotic Process Automation - RPA)
ودي روبوتات ذكية تستطيع محاكاة البشر وتنفذ الأعمال والمهام المُتكررة الروتينية من خلال استخدام قواعد العمل (Bussiness Rules) وتسلسل الإجراءات (Workflow) لإنهاء العمليات أوتوماتيكياً.
وهنا أنت خليت الموضوع ماشي بشكل أتوماتيك وبالتالي الإدارة المالية تقدر تركز على القرارات الاستراتيجية بدل وجع الدماغ اللي بييجي من الفواتير.
طبعًا الكلام ده بيتم في كل إدارة وبالتالي بقى عندي كمية كبيرة من البيانات والناس بتوع الــ (FP&A) عاوزين يستخدموا البيانات دي في مساعدة الإدارة العليا في اتخاذ القرار، يبقي لازم يكون عندي سوفت وير تاني يجمع كل البيانات دي عشان يحللوها ويستخدموها في إعداد الموازنة والتنبؤات
وهنا أنت عملت تكامل أو (Integration) ما بين الإدارات وبعضها والأنظمة أو البرامج وبعضها من خلال ما يسمى بالأنترفيس أو (Application Programming Interfaces - API) … ودي معناها بالبلدي أن سيستم بيدخل يقرأ أو ياخد حاجة من على سيستم تاني.
وخد بالك لحد دلوقتي الموضوع كله ماشي رقمي وبشكل أتوماتيك من خلال استخدام بعض البدامج زي مثلًا (SAP S/4HANA) و (UiPath) و (Oracle Financials Cloud) و (Oracle Hyperion Planning) و (Adaptive Planning) و (SAP BPC)
نيجي بقى لمرحلة تانية مهمة جدًا من التحول المالي ألا وهي ذكاء العمليات والتحليل أو (Business Intelligence and Analytics)، وهنا أنت قبل ما تاخد قرار الشراء لفيت شوية في الموقع وشوفت كذا منتج،
وشوف بقى في كام عميل زيك وبالتالي بقى في كم مهول من البيانات الخاصة بسلوك العميل في الشراء، الترندات اللي في السوق، أداء المُنتجات في البيع وغيرها من البيانات، واللي بنسميها (Big Data).
ومش منطقي إن الشركة تجيب ناس عشان تتبع المعلومات دي وتحللها، فاللي بيحصل أن أمازون من خلال استخدام أدوات تحليل البيانات المُتقدمة اللي بتعتمد على الذكاء الاصطناعي وتعلم الآلة،
تقدر تاخد البيانات المهولة دي وتحدد الأنماط الشرائية ليك والتنبؤ بالطلب واتجاهات السوق وأداء المنتجات، وبالتالي أمازون تقدر تحسن إدارة المخزون واستراتيجيات التسعير والحملات التسويقية الخاصة بيها.
كل ده ممكن يحصل من خلال برامج زي دي (Google Analytics) و (SAS Business Intelligence) و (Tableau) و (Power BI).
تعال بقى نشوف الدفع …. وأنت بتشتري المنتج من أمازون بيكون عندك كذا خيار للدفع أهم الدفع نقدًا عند الاستلام (Cash on Delivery) والدفع عن طريق الكريدت كارد، فالطريقة الأولى هي الطريقة التقليدية القديمة اللي بيتم التعامل فيها بالكاش حقيقًا.
أما الطريقة الثانية فمفيش حد من الطريفين شايف الكاش …. الكاش هنا عبارة عن أرقام في الحسابات والعمليات تمت من خلال خوادم وانترنت، ودي برده أحد أشكال التحول المالي واللي أسمها (FinTech)
ومعناه استخدام التكنلوجيا لمعالجة المدفوعات، وده كان أول هدف ظهرت عشانه التكنلوجيا المالية، وبعد كده دخلت في خدمات كتير منها المحافظ الالكترونية (Wallet) والقروض والتمويل الاستهلاكي (Consumer Financing).
طيب أمازون دلوقتي عندها إدارة للمشتريات وإدارة للخدمات اللوجستية زي الشحن والنقل وخلافة، ودي تكاليف باهظة جدًا، فتقدر أمازون تستخدم برامج وتكنولوجيا تحول بيها الأنشطة دي لشكل رقمي وتكون بيانات تقدر تستخدمها في تحسين العلاقات مع الموردين، أو التفاوض على شروط أفضل للشراء،
وكمان تقدر تجمع بيانات عن الشحن وتسليم المُنتجات ومن خلال برامج تحليل البيانات تقدر تسخدم البيانات دي في تحديد أفضل وأسرع طرق لتسليم المُنتجات، وكل ده هيخفض التكاليف.
ومن أمثلة البرامج دي (SAP Cost Management) و (Oracle Cost Management Cloud) و (SAP Ariba).
ومن أمثلة البرامج دي (SAP Cost Management) و (Oracle Cost Management Cloud) و (SAP Ariba).
طيب دلوقتي بياناتك وبيانات أمازون وكل عملائها موجود على خوادم ومراكز بيانات كبيرة، وبالتالي أمازون عندها مخاطر سيبرانية (Cybersecurity) وممكن البيانات دي تتهكر …
يبقى عشان نحافظ على البيانات دي وخصوصية العملاء ممكن نستخدم التكنلوجيا … فعندك مثلًا تكنلوجيا سلاسل الكتل أو (Blockchain) واللي بتحافظ على سرية وشفافية البيانات بشكل لا تتخيله…. تقدر تشوف شرح عنها من هنا.
youtube.com
youtube.com
بس كده هو ده يا سيدي التحول المالي … حول أي حاجة لشكل رقمي أتوماتيكي … ولو لسه الموضوع مش واضح بالنسبة لك فتخيل كده إنك طلعت مأمورية للشغل وصرفت فلوس من جيبك، فالعادي إنك تملئ فورمة ورقية ومرفق مع المستندات وتلف وراء مدير في المكاتب عشان يعتمد المصروف،
وبعد كده تروح لموظف الخزنة أو العهدة عشان يراجع ويصرفلك الفلوس … كل ده بيحصل عشان تستعيض أو تسترد مبلغ مثلًا 100 جنيه.
التحول المالي بقى بيقولك أنا هريحك من كل ده … هعملك تطبيق تدخل عليها تسجل المأمورية والمصروف وترفع المستندات عليه … وفي لحظة يروح لمديرك عشان يعتمده ….
وفي لحظة يروح لموظف الخزنه عشان يعملك تحويل للمبلغ على حسابك في البنك …. كل ده حصل أتوماتيك وباستخدام التكنلوجيا المالية بدون ما يكون في أي ورق أو معالجات يدوية.
اعتقد دلوقتي بتقول طب حلو ده … كده التحول المالي هيريحني من دوشة الورق والإمضاءات والتقفيل وكل الأعمال الحسابية الروتينبة هتخلص بسهولة …. هقولك فعلًا … بس أنت المفروض مترتحاش …. لأنك لو ارتحت الآلة والشركة هتستبدلك …
فأنت دلوقتي مش المفروض تكون محاسب تقليدي المفروض تكون شريك أعمال واستشاري (Business Partner)…. وده هيتطلب من مهارات لازم تشتغل عليها في الفترة اللي جايه زي مثلًا
١- المهارات التحليلية (Analytics Skills): البرامج هتخرج بيانات وتقارير مهولة بس مش هتقدر تقرأها أو تستنبط منها منها توصيات … فدورك أنت هيكون تحليل البيانات دي واستنباط الرؤى (Insights) اللي تساعد الإدارة العليا.
٢- مهارة الدراية الكافية بالبزنس (Business Acumen): عشان يكون عندك مهارات تحليلية وقدرة على الاستنباط والاجتهاد … لازم تكون مُلم بكل كبيرة وصغيرة في شركتك وعارف كل إدارة بتشتغل ازاي وكمان البرامج دي بتشتغل ازاي ومين بيودي على فين.
٣- مهارة الاجتهاد والاستباط (Judgment): ودي هتكون من خلال اكتساب المهارات السابقة بالاضافة للمعرفة ودراساتك والخبرات اللي اكتسبتها، فتاخد كله ده وتحطه في الخلاط عشان تطلع باجتهاد في الأمور التي لا يوجد فيها نص صريح يقولك تعمل أيه.
٤- مهارات التواصل مع البشر (People Skills): دولوقتي دورك مبقاش محجمك داخل مكتبك … جو إنك تروح تفضل مكفي على المكتب عمال تعمل قيود وتطبع في تقارير مش هيستمر …. وكونك أصبحت شريك أعمال ده هيحتاج منك الاحتكاك بالناس وطبعًا دي محتاجة مهارات مش محتاج اتكلم عليها …
٥- مهارات القيادة (Leadership): لأنك لو نجحت في كونك شريك أعمال من السهل جدًا إنك تكون عضو من الإدارة التنفيذية العليا … فلازم تكون جاهز
طيب تتعلم المهارات دي ازاي ؟ ….. مش محتاج منك غير إنك تقرأ وتطبق اللي بتقرأه سواء في شغلك أو تشاركه مع غيرك … ودائمًا خليك شخص مُتعلم طوال حياتك وتوقف عن التعلم عندما تعلم أنك تعلم كل شيء …
اللهم بلغت … اللهم فاشهد …
اللهم بلغت … اللهم فاشهد …
استفدت من الثريد ؟ تابعني @walidyassinacca وريتويت أول تغريدة
جاري تحميل الاقتراحات...