باحلم لما تغور الغمة ويسقط الفاشل ويحكم مصر ناس وطنية ويرجع اصحابنا لثكناتهم ان نغير التركيبة البنيانية وتوزيع السكان تماما فى مصر بحيث نعيش على مساحة اكبر من الوادى الضيق ونلغى تماما فكرة المبانى العالية والبلوكات السكنية المعمولة من مسلح ومصر اساسا دولة غير زلزالية ولا تتعرض
لامطار غزيرة او عواصف عاتية وجوها جاف جدا يبقى لية نعمل بيوت خرسانة وتكلفتها كبيرة والفكرة فى دماغى من مشروع اتعمل بمصر هوا ابنى بيتك وكمان فكرة البيوت الامريكية والغربية الى بتكون معمولة من دور واحد وفيها حديقة وورشة وعشة فراخ بحيث كل بيت يكون بيت منتج حتى الست فى بيتها منتجة
ازاى طيب ، عاوز نعمل مدن صغيرة على شكل خلية النحل يعنى الدولة تعمل مناقصة عامة بين بيوت الخبرة والمهندسين بعمل تصميم لافضل بيت يمكن بناءة والفايز هاياخد مبلغ كبير ويعمل لنا ٤ تصامبم مختلفة بشرط الاقل تكلفة فى التصميم والتنفيذ هوا الفايز باسنخدام مواد معاد تدويرها معظمها
البيت يكون على مساحة ٤٠٠ متر كل بيت مشترك مع التانى بالظهر فقط والبيت فية ورشة ٥٠ متر يقدر ينتج فيها صاحب البيت اى حاجه و٥٠ متر يتربى فيها طيور و٥٠ متر حديقة امامية وباقى المساحة المنزل نفسة على غرار المنازل الامريكية دور واحد فقط باقل المواد تكلفة
والحكومة تمنح الناس التصميم والافكار مجانية وتمنحهم قطعة الارض ببلاش بشرط البناء خلال مدة معينة وخصوصا الشباب والمتزوجين حديثا والحكومة تعمل فقط الطرق العامة وتمد كل قطعة ارض بالصرف الصحى والمية والكهرباء والنت وتبقى البيوت فى صفوف متوازية لتشكل بالنهاية كل مجموعة بيوت صف طويل
ينتهى بميدان وكل ميدان بيطل علية ٦ خطوط من دى وهكذا بحيث تبقى مجموعة مثلا من الف بيت بكل تجمع ومنطقة وسط المدينة كلها بتصب فيها وبها مجمع خدمات حكومية وصحية ومدرسة واهم حاجة بالقصة ان البيوت دى كل بيت يختار المنتج الى هايعملة ويكون وسط المدينة كبير بحيث يكون منطقة تجميع المصنوعات
يعنى مثلا ناس هاتختار لعب الاطفال يبقى كل بيت بيعمل جزء العجلة او الهيكل البلاستيك وهكذا ومستودعات كبيرة تجمع دة وتتولى مسؤلية التوزيع والبيع والتصدير وكل حاجة الناس هاتعملها الدولة مش هاتعمل اى حاجة سوى توفير الافكار وتسهيل العمل وتقدم بس خدمات الصحة والتعليم والشرطة والمطافى
زى الصين مابتعمل كدة وقامت على قصة الصناعات الصغيرة دى ونعمل كل شىء بنستهلكة من منتجات صغيرة وفراخ وبيض ولبن ويبقى كل مدينة منهم او تجمع بيعمل حاجة مثلا تجمع منهم ينتج الفراخ البلدى وناس تنتج ارانب او حمام وهكذا بحيث كل تجمع منهم يكون بقدر الامكان بيكفى نفسة وبينتج وبيصدر كمان
يمكن هوا نواة حلم تحتاج لتطوير ( على راى ويكيبيديا ) والمتخصصين من الشباب والناس الخبرة هاتقدر تطور الافكار دى وتخليها حقيقة والناس تبنى لنفسها بنفسها يستعينو بخدمات بعض بقى ونعمل مناطق صناعية صغيرة ونشغل فيها الاف الصنايعية والحرفيين يبنو للناس دى بيوتهم ويكون ليهم هما كمان
بيوت بالتجمعات دى ومافيش حاجة اسمها علشان تتجوز عاوز شقة بمليون لا انت تاخد الارض وعندك النموذج البنائى وبسيط وعندك منطقة صناعية ومستودعات ومواصلات وهاتلاقى جنبك كل حاجة الصنايعى والمواد المعاد تدويرها وتبنى براحتك خلال مدة زمنية معينة وممنوع تبيع البيت خالص لانة لك ولابنائك
يبقى انا وفرت للاسرة مكان سكن بارض مجانية ووفرت كمان مصدر دخل للاسرة وفرصة عمل مش واحدة بل ٢ على الاقل الزوح بالورشة والزوحة بانتاج شىء بسيط بالبيت فراخ او حمام او ارانب هيا حرة وعملت مدينة سكنية انتاجية صناعية مع بعض مش اعمل مدينة اشباح بها ابراج وفيلات ولا احد ينتج شىء منهم
اتمنى لو فية مهندسين مبتكرين كل واحد يقول راية ويحسن الفكرة بمقترحاته وخبرتة سواء معمارى او مدنى او مهندس انتاج او طبيب بيطرى او مهندس زراعى او حتى شخص حرفى يقول راية وازاى يساهم وينجح الفكرة خلينا نحلم طالما الحلم ببلاش يمكن ييجى ناس بعدنا او احنا نقدر نعملها
جاري تحميل الاقتراحات...