رتبها

انا عايز اغطس .. اعمل ايه و فين و ازاي؟ 🤿
الثريد ده اول ثريد للدليل الكامل الشامل لعالم الغطس في مصر 🌊🇪🇬
الاول خلونا نقسم الغطس ل ٣ انواع:
١. الفري دايفينج
٢. سكوبا دايفينج
٣. الغطس التجاري
الفري دايفينج هو الغطس على نفس واحد .. حنتكلم عليه مره ثانيه .. و كذلك الغطس التجاري

الثريد ده بس عن ال سكوبا دايفينج .. و ده مقدمه فقط .. الموضوع "عميق" شويه انه يتغطى في ثريد واحد
نكمل

لو انت بس عايز تجرب الغطس .. اللي بتعمله انك بتحجز حاجه اسمها intro dive مع اي diving center محترم .. سعرها مش غالي و امان تماما .. اللي بيعمله ال dive master انه بياخدك لعمق ٦ متر لحد ١٢ متر لو لقاك مرتاح ..
اللي شغالين على المركب او في السنتر حرفيا بيعملوا و بيعلموك كل حاجه

بيعلموك اشارات الايد المهمه و بيجهزوك و يركبوا لك العده و يلبسوهالك و ينزلوك المياه كمان .. طبعا قد ايه التجربه حلوه بتقف على شطارتهم و روحهم .. علشان كده دائما بارشح تروح مع ترشيح حد ثقه .. خصوصا لو انت بتقلق من المياه علشان حرفيا التجربه حتتغير تماما حسب تعاملهم معاك

طيب جربت و الموضوع عجبك و شايف تحت بشويه كده سمك و reefs تهبل 😍و مراكب غرقانه و حوارات و عايز تنزل لهم بقى .. اهلا بيك في عالم شهادات الغطس .. السكوبا دايفينج يحكمه منظمات دوليه كثير دي padi و CMAS و TDI و هكذا .. مش حارشح حاجه هنا( حاعمل ثريد ثاني ) بس حادي امثله ب كورسات PADI

كل مستوى في الغطس .. كل شهاده .. بتفتح لك عمق جديد او حاجه جديده
اول شهاده هي ال open water .. و دي بتعلمك بقى كل اساسيات الغطس و اجرائات الامان و بتفهمك كل حاجه و بتتدرب على حاجات كثير ..
الشهاده دي بتاخد ٣ ايام في المتوسط بمذاكرتها 📚 بامتحانها بكله
الصوره ليا في اخر الكورس💙

و بتسمح لك تنزل ل ١٨ متر .. حضرتك بقى نزلت و كده و لقيت الموضوع جامد .. بس تقول عايز انزل اكثر علشان اشوف الفيل الغرقان في دهب 🐘يقول لك لا .. طيب البلو هول .. لا .. طيب مراكب غرقانه wrecks🚢 ..مفيش ..ليه يا عم؟ اصل كل ده تحت ال ١٨ و لازم تبقى advanced ..
الصوره لصديقي مع الفيل

طيب يا سيدي .. هات الكورس اللي وراه ..ال advanced و ده بقى بيسمح لك تنزل لحد ال ٣٠ متر و كمان تنزل بالليل لو اخترت ال night dive ك واحده من الغطسات الاختيارية في الكورس
الكورس ده احلى بكثير بقى .. مفهوش مذاكره كثير و كله عملي ..
ممتع لانك بدئت ترتاح تحت المياه
الصوره من مرسى علم

و بتحس انك بتغطس for fun كده مش بتاخد كورس .. و ده بقى بيفتح لك كل اللي كان مقفول فوق ده و اكثر لان اغلب ال wrecks و الحاجات الجامده في مصر تحت ال ١٨ متر
طيب .. آخد الكورسات فين؟
كترتيب: الارخص الغردقه .. ثم دهب .. ثم مرسى علم
و كلهم حلوين … هي اصلا باللي بيديك الكورس مش

المكان .. تجربتك كلها بيحكمها ال instructor .. لو لذيذ و خبره و شاطر بتبقى تجربه رائعه .. و العكس صحيح .. الحمدلله دائما كان حظي مع مدربين جامدين جدا .. و في ناس في مصر رهيبه بجد

طيب الاسعار؟ بصوا يا جماعه الاسعار بتتغير كل شويه .. انا حابدء الفتره الجايه اتابع مع حبايبي اللي بيدوا كورسات و ابقى updated .. وقت ما تنوي تبدء ابعت لي حارشح مكان و اقولك عالاسعار و اظبطك يعني
و لو رايح تجرب ابعت لي برضه حاظبطك 😘😘
الصوره من نطة زودياك في مرسى علم

طيب بعد ال advanced .. ندخل في ال technical diving بقى و يلا بينا اعماق بجد و ميكسات هوا و تانكات كثير و حوارات .. كل اللي فات ده كان اسمه recreational diving .. الغطس الترفيهي .. خلونا نتكلم عن ال technical مره ثانيه

خليني اقولكم ان الغطس في مصر من اجمد تجارب الغطس في العالم بدون مبالغه .. و دائما بازعل اما نبقى على مركب غطس اغلبها اجانب و المصريين ميعرفوش حتى مدخل العالم ده منين .. و حقيقي الغطس هو مدخلك لعالم ثاني سااااحر فعلا .. جربوه و ريتويت و كده و وصلوا المعلومه و خلوا الناس تستمتع

الثريد ده طول قوي و خد وقت اوي في كتابته و مكتبتش كل اللي كنت ناوي اكتبه حتى 😂😂 يا رب يطلع مفيد في الاخر 😅

كل ما اكتب ثريد ثاني عن الغطس حازود اللينك هنا ف اعملوله bookmark بقى
كل اللي عنده اسئله يسال هنا و ح quote retweet بالاجابات بقى 😘

اه صح .. و شرم 😂😂 شرح فيها دايفينج رهيب ( بس مش زي مرسى علم برضه ) بس هي غاليه و انا لسه مروحتش هناك ف مقدرش ارشح اماكن هناك .. لو انت في شرم اخطف نفسك ساعه و تبقى في دهب و خد الكورسات هناك برضه 😂😂

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد