الأسبوع اللي فات عشت أسوء لحظات حياتي:
انسرق جوالي ببرشلونة بآخر ليلة لي هناك وأنا مسافرة لحالي، كنت شارية السلسلة عشان النشّالين وفجأة رفعت الجوال لقيت بس الكڤر 😢
بالبداية قلت عادي، الجوال بداله جوال والحمدلله على قضاءه وقدره، والحين بروح أشتري ثاني، ولكن…
انسرق جوالي ببرشلونة بآخر ليلة لي هناك وأنا مسافرة لحالي، كنت شارية السلسلة عشان النشّالين وفجأة رفعت الجوال لقيت بس الكڤر 😢
بالبداية قلت عادي، الجوال بداله جوال والحمدلله على قضاءه وقدره، والحين بروح أشتري ثاني، ولكن…
استوعبت بعد 10 دقايق من تقبل القدر إني ما جبت معي ولا بطاقة صراف وإني معتمدة على آپل پي، وهنا بدأ الانهيار، لقيت معي ٥٠ يورو كاش قلت زين توصلني للمطار، ثم استوعبت إني ما عندي أدنى فكرة على أي شركة طيران حجزت ولا أعرف اسم الفندق اللي حاجزته بالمدينة الثانية….
استخدمت الكمبيوتر الموجود بالسكن عشان أدخل إيميلي وأوصل للمعلومات لكن طلب مني كود توثيق من رقمي السعودي اللي شريحته e-sim وخلاص الدنيا قفلت بوجهي، وتأخرت عن الموعد وراحت علي الرحلة :)
الحين صار لازم أحجز ليلة زيادة، قلت للفندق بحجز واسحبوا الفلوس من بطاقتي، شيكوا قالوا أنتي حاجزة عن طريق بوكينق ما عندنا معلومات بطاقتك… طبعًا خلال هذا الفلم كله ما جاء على بالي أبد أتواصل مع السفارة كنت أحس إني لحالي وخلاص أبي أقعد بزاوية وأصيح بس
طلبت من شخص جواله عشان أرسل لأي أحد أعرفه وحسابه مفتوح بانستقرام إني أحتاج مساعدة، وسألني عن مشكلتي وعرض علي المساعدة بإنه يحجز تذكرة جديدة وأحول له المبلغ لاحقًا، وفعلًا حجزت تذكرة جديدة بنفس اليوم بالليل، شوي إلا أصدقائي يدقون على الفندق يسألون عني وهنا بدت الأمور تتحسن 🥺
أول شيء حجزوا لي ليلة عن طريق بوكينق الحمدلله فرجعت دخلت غرفتي ونمت أكثر نومة مرهقة، ثم صحيت على الجرس، إلا صديقتي ببرشلونة جايبة لي جوال جديد 🥺 شغلته وحاولت أدخل على الآپل آي دي طلب كود توثيق وحاولت يمين يسار عيّت تضبط فتوكلت على الله وطلعت أطلب سيارة للمطار
بالطريق حاولت أسوي تشيك إن، يطلب مني كود يوصل لإيميل الشخص اللي حجز لي ولا عندي رقم أتواصل معه فيه، قلت خلاص أسوي تشيك إن هناك عادي الأمور مستتبة.
وصلت المطار وكان حساب المشوار 36€، عطيته الـ50 عطاني 10 وجاء يطلع قروش بيعطيني الأربعة الباقي قلت ما يحتاج، ناسية إني على الحديدة😃
وصلت المطار وكان حساب المشوار 36€، عطيته الـ50 عطاني 10 وجاء يطلع قروش بيعطيني الأربعة الباقي قلت ما يحتاج، ناسية إني على الحديدة😃
وصلت الكاونتر عطيتها جوازي، قالت التشيك إن حقك متأخر لازم تدفعين 30€، وأنهار عندها وأقولها وضعي قالت عندك 7 دقايق دبري أحد يدفعها لك ولا بتروح عليك الرحلة، لفيت أسوي سكان على المطار وعيوني تدومع، شفت محجبة مع عيالها رحت أصيح عندها وأقولها والله أحولها لك أول ما أوصل بس هلب بليز
وفزعت لي هي وزوجها، قلت لهم معي 10 يورو بس أحتاج 20، عطوني الفلوس وأخذت معلوماتهم وتشكرت منهم.
رجعت للطابور ويوم جاء دوري قالت ما نقبل كاش لازم كريدت كارد ااااه يا بنت المنب قايلة ما عندي طاقة أشحذ أحد ثاني😭 شوي إلا الزوج كان حولي فرجع يسأل وش المشكلة وساعدني دفع لي بالبطاقة
رجعت للطابور ويوم جاء دوري قالت ما نقبل كاش لازم كريدت كارد ااااه يا بنت المنب قايلة ما عندي طاقة أشحذ أحد ثاني😭 شوي إلا الزوج كان حولي فرجع يسأل وش المشكلة وساعدني دفع لي بالبطاقة
عطيته الكاش وتشكرت منهم كثير، شوي إلا زوجته رجعت لمي عطتني العشرة حقتي قالت خليها معك لو جعتي ولا شيء، آه ما أوصف لكم شعور الانكسار، المضحك إني لابسة أحسن لبس وجوالي أجدد شيء، طول الوقت كنت أفكر كيف ممكن ينقلب حال الإنسان بلحظة ويكون بحاجة الله يكافينا سوء المنقلب
ركبت الطيارة وأنا كأن الدنيا عالكتني وما كان لي خلق نفس، وصار جنبي أم وولدها الصغير، وتنكدت زود، لكن سبرااايز الولد طلع رهيب ويضحك وجلس يسولف معي ويلعب ويوريني قصصه وغيّر مزاجي 180 درجة
وصلت المطار وكان معي رقم صديقتي كاتبته بورقة، طلبت جوال من مكتب المعلومات ودقيت عليها عطتني الآبل آي دي حقتها عشان أقدر أحمل التطبيقات وعطتني معلومات بطاقتها عشان أحطها بآپل پي وهنا زانت الأمور خلاص دام معي فلوس ما راح أضيع إن شاء الله، لكن قس وات؟ الحياة قالت لي توك ما شفتي شيء.
الحمدلله كنت راسلة لصديقتي معلومات السكن حقتي، فأرسلت لي اللوكيشن ووجهت له، كان إير بي إن بي ويوم وصلت طلع وقت التشيك إن منتهي وأدق عليهم رقمهم مغلق، جلست بمطعم قباله الساعة 12:30 بالليل على أمل أحد يجي ويفتح الباب، طلبت أكل وجلست آكل مسلمة نفسي للقدر، فجأة جت وحدة وفتحت الباب-
تركت كل شيء وركضت لمها، دخلت وقالت لي الشقق بالدور الفلاني رحت ورنيت الجرس لين قلت آمين محد فتح، استسلمت وطلعت كملت أكلي وصارت الساعة 1:30، شفت لي أي فندق ولقيت واحد، طلبت سيارة ووجهت له، وصلت الريسبشن وطلبوا إثباتي، وهنا استوعبت إني نسيت شنطتي الصغيرة اللي فيها جوازي عند المطعم.
طبعًا لازم أذكر لكم إن المطعم يوم جيت أحاسب قالوا خليها علينا شكل يومك مب ولا بد، رحمتني مرة قسم بالله، حتى يوم أصريت قالوا ما عليك سكرنا الحساب لليوم لا تشيلين هم. 😔
قلت للريسبشن بخلي شناطي عندكم وبروح المطعم أشوف، رحت طلع مقفل وما يفتح إلا بكرة الساعة 8 بالليل، رجعت الفندق وقلت لهم مشكلتي وقالوا مب مشكلة تكفي صورة، والحمدلله طلعت صديقتي عندها صورة من جوازي وضبط الموضوع ودخلت الغرفة أخيرًا بعد شقى.
من بكرة رحت المطعم وأخذت شنطتي وصديقتي تواصلت مع الفندق وردوا قالوا ألغينا حجزها لأنها ما جت بالموعد أمس ولا ردت على إيميل تأكيد الحجز، شرحت لهم مشكلتي وقالوا من حظك محد حجزها فخلاص بنعطيك إياها مرة ثانية بدون تكلفة، ونقلت الحمدلله والحين (صدق) بدت تزين الأمور ههه
لكن كل يوم أصحى وأنا خايفة إن الحرامي قدر يفتح الجوال وإنه صفّر حساباتي البنكية وأنا يا غافلين لكم الله لأني ما معي رقمي وما توصلني الرسايل، لكن مع ذلك طلعت وتمشيت وحاولت ألهّي نفسي بالدنيا ولكن الدنيا كانت تلهّي نفسها فيني
استوعبت إني ما أعرف متى وقت رحلة الرجعة ولا على أي شركة وكانت الرحلة الوحيدة اللي ما أرسلت معلوماتها لأحد، لكن بحثت بقوقل فلايتس عن الرحلات اللي طالعة بكرة لباريس، وكانوا ثلاث بس، فقلت أوكي الوضع تحت السيطرة بروح المطار بدري وبسأل كل أحد منهم إذا عندي حجز معهم
لكن صديقتي الثانية قالت بتواصل معهم بتويتر ونشوف، وفعلًا ردت وحدة منهم وقالوا حجزك معنا وهذي المعلومات كاملة، ومن هذا المنبر أشكر شركة @vueling على الرد بوقت قياسي وإنقاذي من الضياع 😢💛
والحمدلله رجعت أمس بسلام، وحطيت إن جوالي مسروق ووقفت البطاقات فيه، لكن للحين ما أقدر أدخل لا على إيميلي ولا واتساب ولا حسابات السوشل ميديا ولا أحط بطاقاتي بآپل پي، كل شيء يطلب كود جوال أو كود من الإيميل وإيميلي نفس الشيء يطلب كود من الجوال :)
قاعدة أستخدم اللاب توب لكل شيء، وبطلع بدل فاقد إن شاء الله بس تاخذ إلى 6 أيام عشان توصل خارج المملكة، وبعدها ينتهي هالكابوس اللي ما أتمناه لعدوي.
نصيحتي ببرشلونة خصوصًا وبالسفر عامةً دايم جوالكم يكون بالشنطة وشنطتكم قدامكم ويا حبذا لو تخمونها طول الوقت.
نصيحتي ببرشلونة خصوصًا وبالسفر عامةً دايم جوالكم يكون بالشنطة وشنطتكم قدامكم ويا حبذا لو تخمونها طول الوقت.
واحرصوا تجيبون بطاقاتكم وتخلونها بالفندق لو صار شيء مشابه.
القهر كل القهر، إني كنت حريصة هالمرة (على غير عادة) ومرتبة جدول الرحلة بالملاحظات ومسوية تشيك إن من بدري لكل شيء وشارية سلسلة الجوال عشان السرقات لكن كانت هي سبب إن سرقته كانت سهلة، لكن يالله تنذكر ما تنعاد إن شاء الله.
القهر كل القهر، إني كنت حريصة هالمرة (على غير عادة) ومرتبة جدول الرحلة بالملاحظات ومسوية تشيك إن من بدري لكل شيء وشارية سلسلة الجوال عشان السرقات لكن كانت هي سبب إن سرقته كانت سهلة، لكن يالله تنذكر ما تنعاد إن شاء الله.
وأخيرًا الحمدلله على نعمة الأصدقاء السنعين، قطعوا قلوبهم عشاني وما أدري وش كنت بسوي بدونهم، ممتنة لآخر يوم بحياتي. ❤️
جاري تحميل الاقتراحات...