رتبها

الايكونوميست
ما بين راوية يوسف تاه ولقوه وخالتهم اللتاتة!
كنت واخدة قرار مش هرد على الإيكونوميست، بس مقدرتش لإن دي #مصر اللي حقها مسيبوش وأنا مش ممكن يجري في عروقي مية، ولا دي فكرة القراء عن قلمي.
وشكرا لكل اللي عاتبني وقال منتظر ردك، أنتو عارفين نفسكم🇪🇬❤️
#شيرين_هلال
-١تابع

هقول وأطول ومش أسفة على الإسهاب،صورة مصر ميكفيهاش كتاب!
وأرجو التنويه لأن أي كلمة في هذا السرد لا هى شوفونية ولا رأي شخص،لأن كل جملة مشفوعة برقم موثق، وكل فكرة مردود عليها بحقيقة،فلو معترض على المكتوب،هيكون على حقائق قدمتها المراكز والمؤسسات المنقول عنها وليس على شخص الكاتبة!
-٢

وفي هذا السرد ستجد تحليل من زاوية ثنائية العدسة ليست للتشبيه ولا التقليل، بل للتوضيح ليس أكثر🤓
طالعتنا الإيكونوميست البريطانية بتقرير عن مصر بعنوان " المصريون ساخطون على الرئيس عبد الفتاح السيسي، لكنهم خائفون من الفوضى" التقرير مكتوب على طريقة
-٣تابع

قريش لما حبت تقتل محمدأ عليه الصلاة والسلام (نأخذ من كل رجل قبيلة فيتفرق دمه بين القبائل)، عاملين جمعية في كتابة تقرير من هيئة الإيكونوميست كلها.
يااااه كل دا عشان "مقال هزلي" ومجازا مسمينه تقرير!
ما تقولوا يا جماعة مين الفذ اللي محدش اتفز أده وكتب هذا الكلام؟
-٤تابع

معروف إن الإيكونوميست بتهتم بالشأن الإقتصادي لكن يبدو إن خالتهم بمبة اللتاتة مرت من هناك!
ونشوف جابت إيه وهى جاية؟
رجعت الإيكونوميست لعهد الخديوي إسماعيل اللي حكم من 1863-1879 واستدانت مصر في عهده من انجلترا وفرنسا بسبب أعماله الإنشائية، وبذخه الشديد في المحافل والفتوحات
-٥تابع

والقصور أيضا. وبتقول نصا أن "مملكة السيسي فيها عاصمة إدارية جديدة وتوسعة لقناة السويس وتعمير سيناء وامتدت مملكته بالسكك الحديدية والجسور على غرار الخديوي وبتقول ان "الخديوي اضطر لبيع قصوره الثمينة و نصيبه في القناة وفقدت في عهده مصر سيادتها تماما وكل اللي اتبقى من مملكته
-٦تابع

هو قصره في القاهرة "قصر عابدين" واللي بتقول الإيكومنوميست أنه محمل بأكوام من القمامة وحواليه شباب من متعاطين المخدرات: كدة بقى يبقى حد من المطاريد اللي أخر مرة شاف قصر لما مرسي كان بيضرب من المتظاهرين وهو خارج من الإتحادية في 2013 هو اللي قال لكم !
-٧تابع

أصل قصر عابدين حاليا أعيد افتتاح متحفه في 2019 وتذكرته ب30جنيه و دي فيدوهات منه!
لكن الحقيقة هما بيقصدوا القصر اللي اتولد فيه الخديوي هو قصر "المسافر خانة" اللي تم تسجيله كأثر ويحمل رقم 20 في مجلدات آثار مصر و دخل ضمن خطط تطوير القاهرة القديمة
-٨

"اللي بيزعلوا منها أصحاب الإيكونوميست وشايفين ملهاش لازمة"، مش بقول لحضراتكم خالتهم اللتاتة مرت من هناك!
والايكونوميست "قال" بتعبر بلسان المصريين وبتقول إننا خايفين من تكرار سيناريو الخديوي إسماعيل وأطلقت على "مؤسس الإنقلاب" كدة يبقى اللية الضاني طلعت ريحتها في الشوي!
-٩تابع

لما أي جهة تحب تتكلم بلسان المصريين،
لابد إنها تحترم إرادتهم في ثورتهم بـ30 يونيو2013. السيسي جه بانتخابات شرعية بعد تفويض شعبي وخلع مرسي بطلب من الشعب و خروج ملايين واحنا مش هنفضل نعيد ونزيد في حقايق،كون النظام الاخواني كان صنيعة بريطانيا واحنا برضو خلعناه، ميديش حد الحق
-١٠👇

في الغاء ثورة المصريين. وكمان السيسي شال نظام صنعته بريطانيا لكن الخديوي بريطانيا هى اللي خلعته. طبعا اللي تسببت في هذه الفجوة التاريخية هى خالة الايكونوميست اللتاتة. دا غير إن الخديوي إسماعيل كان مستسلم لنفوذ انجلترا و فرنسا و شروطهم المجحفة للصرف على ملذاته ،
-١١تابع

لكن السيسي بيقول بعلو الصوت لأ مش هنفذ شروط على حساب الأمن القومي المصري والفيديو يشهد:

وبيكمل كلامه عن أوجه التشابه مع الخديوي في افتتاح القناة الجديدة وبناءه 20 مدينة جديدة
"بس الحقيقة هما 40 فالمخطط"
وصرف 23مليار على مشروعات السكة الحديد! بسسسس انتو غلابة أوي يا حرام
-١٢

احنا تكلفتنا 125 مليار عشان نطور قطارات و مزلقنات واشارات سكة حديد كان بيموت عليها ناس وتحصل حوادث يشيب لها الولدان . مشاريع النقل عندنا شبه واقفة من أيام الاحتلال البريطاني، اللي كان شافط خيرنا على لندن اللي قاعدين فيها تنظروا علينا!
-١٣تابع

مش عاجبهم العاصمة الإدارية الجديدة و راصدين لها رقم من الخبال 58 مليار جنيه!
طيب اذا كان اللي بيكلم الايكونوميست، مش يدي مصدر لأرقامه ولا هو أُنزل عليه من الوحي؟
الرقم مبدأيا هزيل جدا على تكلفة بناء عاصمة أكبر من باريس بخمس مرات! مش نكذب كذب مساوي؟
-١٤تابع

والعاصمة الإدارية بحسب التقارير الرسمية مش معمولة من ميزانية الدولة. و موجوعة جدا الإيكونوميست عشان خدمة الدين بتاكل نص ميزانية الدولة،
طيب بالنسبة للدين الأمريكي ايه النظام؟
لا بلاش أمريكا بعيدة ، إيه أحبار الدين في مدينة الضباب؟
-١٥تابع

انتو في 2020 مسجلين أسوء رقم ليكم تجاوز ال2 ترليون استرليني بما يعادل 2.6 تريليون دولار أمريكي ! و بتتكلموا على بلد بتعمل تنمية إجمالي الديون فيها 160 مليار تقريبا!
وبلغ الدين العام في بريطانيا 101.9% من الناتج المحلي الإجمالي واعتمدت بعد السنة دي الحكومة خطة تمديد القروض
-١٦تابع

بقيادة المستشار الإقتصادي ايامها ريشي سوناك، وكمل عليكو سوناك و قفز في 2023 لاعلى رقم من 1993 والقفزة دي حصلت بسبب دعم تكاليف الطاقة (تداعيات الحرب يعني) وارتفاع كلفة خدمة الدين اللي بتبلع 7.7 مليار جنيه استرليني شهريا !
-١٧تابع

وبالمناسبة السعيدة دي:
البريطانيون غاضبون من رئيس الوزراء سوناك لأنه لحد دلوقتي مقدرش يعمل حاجة لخفض الزيادة الحادة فى تكلفة المعيشة فى بريطانيا. الزيادة فى تكلفة المعيشة بلغت 11.1% فى أكتوبر الماضى وانخفضت إلى 8.7% فى أبريل 2023 دا طبعا بعد هبوط اسعار الغاز🤷🏻‍♀️
-١٨تابع

و كشف تحليل جديد أن الاقتصاد البريطاني لسة هيعاني ويبقى ثاني أسوأ نمو في مجموعة الاقتصادات المتقدمة السبعة السنة دي، و في نفس الوقت هيرتفع معدل البطالة، بعد ألمانيا اللي اقتصادها بيشهد ركود ممتد طوال سنة 2023 وهيفضل أداءها الاسوء!
-١٩تابع

والكلام دا مش للفشخرة–بريطانيا بكل امكانياتها ومن غير خطط تنموية طموحة عشان مش محتاجة تعمل بنية تحتية(هى عملت دا من أيام المستعمرات)مش مضطرة تبني وتصرف على مشروعات عشان تحمي مواطنيها من حوادث المزلقانات(المواطن عندها واعي بشروط الأمن والسلامة-لأنه لاقي مكان يتعلم فيه من زمان)
-٢٠

معنهاش 80تلميذ في فصل،مكنش عنها استعمار من 80سنة ولا عندها أنظمة سابت البلد كهنة بدون صيانة عشان تحافظ على الكراسي. بريطانيا اللي عندها كل دا وفي مجموعة الأغني 20 دولة في العالم بتعاني وتستدين وتصنيفاتها بتقل!
هو حلال لبريطانيا يكون عندها تأثر بتداعيات الحرب وحرام علي مصر؟
-٢١👇

توقع تقرير من ال سي إن إن للطاقة بالارتفاع على البريطانيين 140 % في أكتوبر 2022 ، البريطانيين نزلوا الشوارع وعملوا اسوء مظاهرات وأعمال عنف وصلت لضحايا و كمان إضرابات لقطاعات كاملة زي التمريض سائقين القطارات والشاحنات والاسعاف وغيرهم ، دا غير توقعات هيئة الغذاءالبريطانية
-٢٢تابع

بعدم تمكن 40% من الأسر البريطانية من سداد فواتير الطاقة واتوقعت كمان إن كتير من البريطانيين هيكونوا مضطرين للمفاضلة بين دفع فواتير الغذاء أو تسديد فواتير الغاز والتدفئة زي السيدة البريطانية المسكينة في هذا الفيديو الشهير!
-٢٣تابع

دا غير اضراب عمال الطاقة انفسهم في ابريل 2023 ، اللي اتوصف على انه "أكبر اضراب منذ جيل كامل" واتسبب في ارباك انتاج النفط والغاز اكتر ما هو مرتبك ونشوف التقرير دا عشان منكلمش كتير معلش:
وتخطى صافي ديون القطاع العام في بريطانيا مايو الماضي 100% من الناتج المحلي الاجمالي !!!
-٢٤تابع

فين وكالات الأنباء العالمية؟ فين مؤسسات التصنيف الدولية؟
جابت الإيكونوميست شخص مجهول كل تعريفه إنه مدير بنك على المعاش ومرعوب عشان مستواه بينزل من الطبقة الوسطى، هو وناس كتير معاه إلى الطبقة الفقيرة وبيقول احنا مش هناكل كباري!
بس كدة هو دا كل شئ نعرفه عن هذا الشخص!
-٢٥تابع

ما هو مفيش كاتب للمقال محدد ومفيش مصادر للبينات فطبيعي مفيش تعريف للأشخاص!
وهنا قررت الايكونوميست تحود في السرد على طريقة اختصار قصة النبي يوسف عليه السلام لـ "تاه و لقوه" وقالت صراحة كدة : "عشان ندي الراجل استحقاقه، هو أوفى بمعظم عهوده !" إيه دا معقول؟
إتقل🤌🏼
-٢٦تابع

قالت الصحيفة إن الرئيس السيسي خلص مصر من تداعيات فوضى الربيع العربي المخيفة ، لما شعبه اختار اصحاب بـ(فكر المحدود) "الإخوان" اللي حكموا سنة بالعافية كانت محفوفة بالاضطرابات وانكشف انعدام كفاءتهم للحكم .... الله مش دا الكلام اللي قاله الريس في حديثه؟
لا معلش نقف هنا و نسأل
-٢٧تابع

يعني إيه أوفى بإلتزاماته:
-استلم بلد شبه منهارة
-مكنش في أمن في الداخل ولا على الحدود
-مكنش عنده احتياطي اجنبي
-تلت تربع العالم ضده
-صفر استثمارات
-بنية تحتية خراب
-حارب تنظيم ارهابي "حرب شاملة"
يعني هو مستلمهاش جنة و حولها نقمةّ!
-٢٨تابع

كمان بتقول الايكونوميست ان السيسي اخرج مصر من تصلب نظام مبارك الصامد لمدة 30 سنة ،حصل فيها تحول للبنية التحتية. افتتح السيسي المرحلة الأولى من القطار السريع المقرر له ربط البحر الأحمر مع البحر الأبيض.
دا اللي ذكرته في ملف النقل والمواصلات فقط! (مش قلنا طريقة تاه ولقوه)
-٢٩تابع

بتقول كمان
السيسي أدار البلد بشكل أفضل بالرغم من الزيادة السكانية الرهبية اللي بتوصل لقرب ال3مليون نسمة سنويا ووصل تعداد مصر فيها لـ106 مليون !
Stop
طبعا كدة مغالطة كبيرة لأن من وقت كتابة المقال في يونيو 2023، تعداد مصر وصل 105 مليون نسمة، دا غير المصريين في الخارج طبعا،
-٣٠تابع

كدة بنخبط أي رقم ودا يفقد تقرير الإيكونوميست ، بتوقيت جرينتش، بساعة بيج بن نفسها المصداقية!
من وقت خروج الاخوان من الحكم في 2013 وتعداد مصر كان 84 مليون نسمة تقريبا وفي 10 سنين بقينا 105 مليون، يعني السيسي زاد في عهده 20 مليون بني أدم
-٣١تابع

يعني كل سنة بنزيد 2.2 مليون بني آدم بمعدل زيادة 1.7%،
بواقع 4 مواليد في الدقيقة تقريبا
يعني 40 مولود كل 10 دقايق،
تقريبا كدة يجي 240-250 مولود في الساعة،
و في اليوم بنخلف 6000 طفل والف الف مبروك
بينما في بريطانيا عددهم 68 مليون ومعدل الزيادة هناك 0.39% سنويا🤐
-٣٢تابع

مش بقارن بين مصر وبريطانيا لكن بقارن بين أرقام دولة طالع منها التقرير على دولة معمول عليها التقرير والكلمتين دول لازمين عشان نشوف الصورة:
متجيش تكتب من التكييف عن مؤشرات وتقارير معمولة بالمسطرة تتطبق عمياني وأوتوماتيكي على دول العالم ولو مكانتش قابلة للتطبيق نعمل محكمة وحساب!
-٣٣

مصر تركيبتها السكانية مختلفة واحتياجات سكانها لتحقيق الرفاهية بالتأكيد مختلفة عن النموذج الغربي وتعريف الغنى والفقر بالنسبة لثقافة المصريين غير البريطانيين (كنوذج للفكر الغربي المهيمن على حسابات العالم).
يعني ببساطة كدة من غير رغي:
المصري عشان يجوز لازم كذا احتفالية
-٣٤تابع

ويتبع عدد من التقاليد والطقوس ودي طبعا فيها فلوس كتييير وأعباء كتير و المصري صاحب ثقافة البيت المِلك ومساعدة الأولاد في تكاليف الجواز وبعدين الخلفة اللي معليهاش حساب ومدعومة من الدولة في التعليم والصحة والمعيشة اللي فيها دعم برضو (ولو مش زي الأول)
-٣٥تابع

وهكذا لسة بيحصل. بينما السيناريو البريطاني الغربي مختلف تماما الإنسان هناك لا بتحكمه تقاليد يصرف عليها ولا مضطر يشتري شقة ويفرشها عشان يجوز ولا ينفع يتعلم من غير ما يدفع ولا بيخلف من غير حساب
بس لما الأزمات حصلت الحكومة المصرية على محدودية دخلها وعددها الكبير قدمت دعم
-٣٦تابع

لكن الحكومة البريطانية مدعمتش على كبر امكانياتها وقلة عدد سكانها، ولا قدرت تعوض الشعب عن ارتفاع تكلفة الغاز والزيادات اللي حصلت في الأجور كانت بالضاليين ارقام زهيدة جدا و بعد مواجهات عنيفة واضرابات أضرت بالاقتصاد بشكل مباشر.
-٣٧تابع

معلش يا ايكونوميست مضطرة اغلس شوية واقولك ان الدولة المصريةعندها انواع من دعم مش موجودة في بريطانيا منها دعم الاسكان اللي بيكون بقروض ميسرة جدا وتحت تكلفة الانشاء في منها برامج تمليك و اخرى ايجار باي مصري وطبعا الكلام دا ملوش موقع من الاعراب في الثقافة الانجليزية والغربية!
-٣٨👇

و بيكمل التقرير على مسيرة "تاه ولقوه" وبيقول إن السيسي قلل الزحام وعمل تحول رقمي ساهم في تقليل الروتين وساعد على تقديم خدمات سريعة وقصر طوابير الإنتظار امام المكاتب وكمان قلل كتير من قوائم الإنتظار في المستشفيات.
-٣٩تابع

اعترف المقال كمان بإنه كسر التقليد السيء بتاع التضييق على بناء الكنايس وترميمها وقدم قانون نظم هذا الأمر .
ترجع خالتهم اللتاتة من السوق وتدخل بالتقرير في حوارات دائرية متشعبة (سمك لبن تمر هندي)، متبقاش عارف دا تقرير سياسي ولا اقتصادي ولا فضفضة سهاري ولا إيه بالظبط!
-٤٠تابع

التقرير بيدخل على قانون تشديد العقوبات على ممارسة الختان ضد الإناث وبيقر بإنخفاض ارقام هذه الارقام بالمقارنة مع أرقام ما قبل السيسي . وبيكمل
"بالرغم من تدينه العميق، إلا إنه ساند الآيات في النص القرآني التي تعطي المرأة نصف ميراث الرجل" .
يا سادة يا كرام- انتوا كدة بتعجنوا
-٤١👇

لأن المواريث في القانون المصري متاخدة من التشريع القرآني ومحدش اتعرض لهذه القضية ، يمكن الجيران في تونس، اتجه غرب القارة شوية واركب الخطوط الجوية الفرنسية توصل، هتلاقي حوار التعديل في المواريث هناك
أما بقى اللي جاي دا بيسموه السم في العسل أو تلبيس إبليس حاجة في الرينج دا🤦🏻‍♀️
-٤٢👇

بيقولك إن في عهد السيسي قلت ظاهرة النقاب وخلع الحجاب!
(مش قلت لك خالتهم اللتاتة رجعت)
فضلت أدور على أي مصدر غير خالتهم اللي قال أو رصد أرقام لظاهرة خلع الستات للقماش سواء في حجاب أو نقاب،ملقيتش حاجة –فريت النت والنتيت ولا قصوصة حتى بتقول الكلام، إلا في بوستات الإخوان برضو!
-٤٣👇

و نخلص هذه المقاطع وبتلبس خالتهم اللتاتة عباية جديدة خالص معضوضة قماشتها ،
بترجع اللتاتة للديون تاني و احنا ردينا عليها في الجزء الأول من هذا السرد و بيكمل على هروب رؤوس الأموال الأموال وخروج 20 مليار دولار في 9 أشهر من سنة اندلاع الحرب الروسية الأوكرانية
-٤٤تابع

في تقرير لبلومبيرج وفي عز أزمات كورونا ف2020 بتقول إن برغم المخاطر اللي تسببت فيها الجائحة إلا أن مرونة الجنيه جذبت المستثمرين الأجانب إلى مصر لتحقيق مكاسب إضافية
والتقارير بتاعة 2022كمان قالت:خروج الأموال الساخنة من مصر بسرعةكان استجابة لرفع أسعار الفائدة في البنوك الأمريكية
-٤٥

بعد قرارات الفيدرالي لكبح جماح التضخم في أمريكا. لكن مما لا شك فيه إن أي دولة هيخرج منها هذا الكم اللي كان بيوازي 40% من الاحتياطي الأجنبي وقتها كانت لازم هتتأثر وفعلا دا اللي حصل في مصر، سمحت بخروج هذه الأموال في وقت قصير، وأدى لحدوث إرباك وأرتفع سعر الصرف وسبب مشكلات
-٤٦👇

في إمكانية الافراج عن السلع من الموانئ لأن الدولة حصل فيها أزمة سيولة ودا حصل في كل الأسواق الناشئة في أسيا و الشرق الأوسط، لكن طبعا مصر هى بؤرة كل الأحداث السلبية في الصحافة العالمية.
-٤٧تابع

لكن خالتهم اللتاتة معدتش على داوننج ستريت نمرة 10 و شافت التقارير اللي بتقول إن 40% من أصحاب الأعمال في بريطانيا بيخططوا للخروج من السوق إما عن طريق بيع الأصول لشركاتهم أو تصفيتها!
وقالت شركة إدارة الثروات والخدمات المهنية "إيفلين باتنرز"إن من بين 504 من أصحاب الأعمال
-٤٨تابع

اللي شملهم استطلاع الرأي و تزيد إيراداتهم عن 5 مليون استرليني، بخططوا للخروج من سوق المملكة المتحدة في غضون السنة المقبلة! وفي استطلاع رأي عملته سينسوايد ، أن في واحد بين كل 4 شركات سرع خطواته لإنهاء الأعمال.
وتندب الصحيفة على انخفاض قيمة العملة و خسارتها لـخمس أسداس قيمته
-٤٩👇

مقابل الدولار معلش يا جماعة طب و هو الجنيه الإسترليني متأثرش بفعل الحرب وارتفاع تكلفة الغاز ؟
تراجع الجنيه الإسترليني تحت وطأة الدولار بنسبة قاربت الـ 20% وصفته صحيفة الجارديان بـ "المهين"، وكان له أثر كبير على حركة الأسواق البريطانية وتسبب في إرتفاع تكلفة المعيشة. واتعرضت
-٥٠👇

الحكومة البريطانية لضغوط كبيرة عصفت بأربع وزراء مالية في اقل من سنتين و إستطلاعات الرأي أظهر رفض55% لأداء الحكومة في منتصف العام 2023 وكملت لحد النهاردة
وبتقول التقارير إن الإقتصاد البريطاني تعرض لتضخم غير مسبوق من أكثر من 40 سنة، ووصول الجنيه الإسترليني للقاع للمرة الأولى
-٥١👇

في تاريخ التاج البريطاني. ارتفاع اسعار الطاقة بهذا النمط السريع ، أخذ البلاد إلى حقبة الثمانينات حيث كانت تقود نقابات العمال الإضرابات كل البلاد وهي نفس الأجواء التي تشهدها البلاد الأن!
دفعت تلك القرارات وكالة التصنيف الإتماني ستاندرد أند بورز إلى تخفيض نظرتها المستقبلية
-٥٢تابع

للديون السيادية البريطانية من "مستقرة" إلى "سلبية آيي آيي"، الأمر اللي أدى هو كمان إلى إرتفاع تكلفة الديون، واتسبب القرار في تعرض بريطانيا لبيان شديد اللهجة من صندوق النقد الدولي بشكل علني، لأول مرة في سجل تاريخ تعاملاتها النقدية، إنتقد فيه الصندوق خطة الحكومة البريطانية
-٥٣تابع

وأوصى قائلا "فإننا لا نوصي بحزم مالية كبيرة وغير موجهة في هذه المرحلة.لأنه من الضروري ألا تعمل السياسة المالية لأغراض تتعارض مع السياسة النقدية"
وبرغم اقرار الصندوق بتفهم اهداف خفض الضرائب فمن شأنها أن تسرع أيضا من إنفجارالأسعار التي يكافح البنك المركزي البريطاني من أجل خفضها
-٥٤

وأضاف الصندوق أخيرا في بيانه أن تلك القرارات من شأنها الوصول بالبلاد إلى مزيدا من التضخم وإنعدام العدالة.
وطبعا محدش بيغطي هذه البيانات والتقارير الا لما تكون عن مصر!
وهنا نقول ان اللي دينه تريليونات و هو 68مليون نسمة دولة متقدمة اكتر اللي دينه 160مليار وهو 105مليون نسمة!
-٥٥👇

وبتكمل خالتهم اللتاتة على انخفاض الصرف على التعليم والصحة على حد مصادرها "حسب بعض الحسابات"، مع ان نفس التقرير ذكر فوق إن قوائم الإنتظار في العلاج تقريبا اختفت، لكن حبيت أشارك ببعض المصادر الموثقة عن بنود الصرف المذكورة :
-٥٦تابع

في بنود نشرتها دراسة معمولة بالمشاركة ما بين وزارة المالية ومؤسسة يونسيف مصر في العام المالي 2020/2021
بترصد زيادة الإنفاق الحكومي على بنود متعددة وهى كالتالي:

136.6% زيادة في الإنفاق على مخصصات تحسين جودة المياه
46.2% زيادة في دعم الإسكان الإجتماعي

33.7% زيادة في شراء السلع والخدمات
18.4% زيادة مخصصات التغذية وتشمل التغذية المدرسية
15.6% زيادة في مخصصات النقل الجماعي
11.3% زيادة الأجور
2.3% زيادة في مخصصات الدعم النقدي (معاش التضامن وتكافل وكرامة)
12% زيادة في دعم التأمين الصحي وعلاج غير القادرين
-٥٧تابع

وحابة أذكر كمان رقم حديث صادر عن مركز دعم واتخاذ القرار بيقول إن في مليون و633 ألف مواطن مصري استفادوا من مبلدرات بتشرف عليها الحكومة زي صندوق تحيا مصر خلال الربع الأول من 2023 وفق تقرير عن جهود الحماية الإجتماعية والرعاية الصحية و التنمية العمرانية
-٥٨تابع

و هسيب لحضراتكم تقرير عن ارقام الانفاق علة نفس البنود في محافظتين هما اسكندرية والبحيرة ، افرج عنها مركز دعم واتخاذ القرار بتاريخ15/6/2023
والغرض هو اثبات نقطة مهمة وهي إن لو الإدارة الحالية حابة تهدي جزء من الضغوط المادية ، كانت ببساطة وقفت هذا الإنفاق مش زودته
-٥٨تابع

كانت هتلاقي قبول لدى المحللين يمكن ولدى قطاع من الشعب مش متأثر جايز، لكن الأرقام بتقول إنها التفتت لإلتزامها تجاه الشعب أكبر من إلتفاتها لما تتناقله الصحف أو ما يؤثر على شعبيتها!
-٥٩تابع

وتشطح خالتهم اللتاتة شطحة قديمة وملينا منها وهى تخص أرقام ما يسمى بالمعتقلين !
سبق واترد على هذه التسمية الإعلامية الخايبة و قولنا معندناش معتقلين، عندنا مدانيين أمام القضاء وبيقضوا عقوبة أو تحت الحبس الاحتياطي أو التحفظي، وهو هو من يوم جدهم كونفشيوس إلى يومنا هذا مبيتغيرش
-٦٠

هما هما الـ60 ألف معتقل لا بينقصوا ولا بيموت منهم حد ولا بيخرج منهم واحد!
كأنهم محنطين الرقم
نسيت الصحيفة الغراء إن في لجنة عفو رئاسي شغالة أفرجت عن محبوسين في قضايا لها علاقة بالشأن السياسي و عددهم 1151سجين في مدة سنة تقريبا و تلاقي منظمة معنية بشؤون الحقوق والحريات زي
-٦١تابع

“المبادرة المصرية للحقوق والحريات واللي مشاركة في الحوار الوطني وعلى تواصل إعلامي دولي بتطالب بالافراج عن3666 إسم،بس خلونا نتفق إن رقم الـ60 الف,لم يصدر من بيان رسمي ولا وثيقة ولا بحث استقصائي ولا حتى قطة ملبوسة!
لكن الصحيفة البريطانية انجرفت خلف أرقام جماعة إرهابية محظورة
-٦٢👇

(الدم بيحن و الصرف بيجن)
مع إن ذات نفس المملكة صدرت تحذيرات من السفر إليها بتقول:
" لا تشارك قبل السفر إليها في أية مظاهرات، حتى ولو كانت قانونية"، إذ أعتقلَ الناشر الفرنسي إرنست موريه في محطة القطارات وهو بطريقه لزيارة معرض للكتاب بلندن فور وصوله من فرنسا بتهمة الإرهاب،
-٦٣تابع

وذلك لمشاركته في الاحتجاجات المناهضة للحكومة الفرنسية!!"
قبضت علىه تعسفي واتحقق معاه عدد طويل من الساعات، دا غير اعتقال عدد كبير من المتظاهرين ضد الملكية وقت احتفالات التنصيب للملك تشارلز وقبلهم في 2021 اعتقال 100 متظاهر ضد قانون منح صلاحيات أوسع للشرطة البريطانية.
-٦٤تابع

ودول كلهم غير اعتقال عشرات المتظاهرين اللي كانوا رافضين قيود الإغلاق في لندن 2020.
وللعلم في بلاد الايكونوميست اللي بتشير بحزن شديد لوضع الحقوق والحربات عندنا وعلى حرية الشعب المصري، في قانون عامل قلق كبير في بريطانيا اسمه "النظام العام" برضو بيدي الشرطة الحق
-٦٥

في أعمال قسرية ضد المواطنين. أنا بس بلفت نظر الايكونوميست مش أكتر لأن كل دولة لها رؤيتها الأمنية بتشكلها بحسب ما تحتاج لإدارة شؤون البلد ومش شرط كلنا نمشي على روشتة واحدة!
ندخل بقى على اعراض صعبة بجد وسامحوني فكل واحد ياخد ساتر:
-٦٦تابع

بتقولك الصحيفة إن رجال الشرطة بزيهم الرسمي بياخدوا بقشيش، و هنا بتتكلم عن بعض أمناء الشرطة في المطار كنوع من التدليل على فساد قطاع بالكامل مطلوب وصمه و تدنيسه ، دا بيحصل من البعض مش الكل ولكن بيواجه بحسم شديد لو تم الابلاغ عنه أو رصده عن طريق الكاميرات واحنا مش ناكرين🤐
-٦٧تابع

و ياريت فعلا يتم زيادة التشديد على العاملين في المطارات والمزارات السياحية والحراسات كمان على البنوك ومكن الصراف الآلي، لكن دا مش دليل ولا حجة تاخدها الصحيفة على الشرطة المصرية، لأن الدولة بتتصدى لأي جريمة بيتم رصدها من اي مسؤول ومفيش حد فوق القانون!
-٦٨تابع

ومحدش ليه بيتكلم عن نسب الجريمة المرتفعة في بريطانيا؟
سوال مهم نساله؟
ليه بريطانيا الاعلى في اوروبا؟
ليه رئيسة الوزراء السابقة بتعلن كدة؟
والاسؤال الاخطر ايه علاقة ضباط الشرطة بالجريمة؟
-٦٩تابع

ندخل على إدعاء مضحك بتقولك مضادات الاكتئاب زادت اسعارها و نسب استهلاكها في شهر ابريل الماضي ، طب اذكر اسم واحد فيهم طيب ؟ أو رقم تداول سابق؟ طب لما الناس مخنوقة اقتصاديا و مش لاقية تشتري غذاء ، هتشتري مضادات اكتئاب؟ أين المنطق؟
-٧٠تابع

بنرجع للتقرير اللي بيتكلم عن شعبية السيسي اللي ما زال لم يعلن عن ترشحه لإنتخابات 2024 بشكل رسمي وبتقول الايكونوميست إن الدعاية بدأت في المحافظات!
فلا تخرج قبل أن تندهش!
طيب والقاهرة لا ليه؟
الانتخابات لسة مبدأتش وباب الترشح أصلا متفتحش واللجنة العليا للإنتخابات لم تنعقد بعد
-٧١👇

وتحدد مواعيد انطلاق الدعايا الإنتخابية ، اليفط الموجودة في الشوارع هي من صنع الاحزاب الداعمة للرئيس السيسي، ولا علاقة لها بانتخابات قادمة!
بس سماح النوبة عشان اتتو مجلة انجليزي متعرفوش واللي بيملي هيئة التحرير مغرض أساسا.
-٧٢تابع

كمان اتكلمت الايكونوميست عن فرص ترشح عم عموم السلفنجية الجهادية وشهبندر الجماعات التكفيرية وكومندا السماجة الاسلاموية و عراب التصريحات الحلمنتيشية وجرايم حركة حازمون التخربية، الحاج حازم صلاح أبو اسماعيل! اللي هو بيتحاكم تزوير جنسية وحصار المحكمة الدستورية
-٧٣تابع

وحصار محكمة مدينة نصر واهانة القضاء ، والخجلان من مصر كلها بسبب شارع الهرم وراقصاته!
شايف بقى التقرير الميمون أن "لازم حازم" يكون عنده شعبية أكتر من السيسي!
-٧٤تابع

ومش بس كدة طرح بدايل للسيسي منهم اللاعب محمد صلاح، اه الكابتن محمد طبعا له شعبية أكتر من السيسي في الكورة، لكن هو طلب من الايكونوميست ترشحه ولا دا اجتهاد شخصي؟
ومن ضمن المرشحين كمان أحمد فاروق فؤاد أخر ملوك مصر على الورق، اللي اتنازل له الملك فاروق عن العرش تلبية
-٧٥تابع

لمطالب الضباط الأحرار في 1952.
وهو طبعا لم يعتلي العرش لأن الدولة اتغيرت من الملكبة إلى الجمهورية، و الايكونوميست شايفة إن عنده فرصة يحقق حلم الملكية بعد71 عاما، وعدم معرفته باللغة العربية في مصر وعدم إلمامه بالشأن المصري أصلا، فاكرينه الملك تشارلز يا ولاد؟
-٧٦تابع

وندخل على آخر ترشيحات الايكونوميست وهو السيد جمال مبارك ابن الرئيس الأسبق محمد حسني مبارك ، وكان تم إدانة سيادته واتحبس في قضية مخلة بالشرف عرفت اعلاميا بـ"القصور الرئاسية" واللي صدر بخصوص هذا البند، ونص قانون الانتخابات الرئاسية، والمنشور على الموقع الرسمي لمحكمة النقض،
-٧٧تابع

في الفصل الأول مادة 1في الشرط الخامس من شروط الترشح على: “ألا يكون قد حُكم عليه في جناية أو جريمة مخلة بالشرف أو الأمانة ولو كان قد رد إليه اعتباره”وهو ما يمنع خوض جمال للانتخابات الرئاسية في أي وقت إلا بتعديل القانون أو إلغائه
ويحق له “التصويت”في الانتخابات فقط وليس الترشح
-٧٨👇

وادعاء جديد بان الجيش المصري أصبح في مرمى غضب الناس، بسبب اعتماد السيسي عليه بشكل كامل . نحفظ بقى الجملة دي عشان هنحتاجها بعدين. بتستشهد الايكونوميست بشهادة أحد الباحثين في مركز كارنيجي للسلام وهو يزيد الصايغ المحلل الفلسطيني صاحب الجنسية الأمريكية
-٨٨تابع

واللي مفيش في كتاباته شيء عن مصر سوى ضرورة تفكيك المؤسسة العسكرية المصرية! الراجل شايف ان وضع الجيش المصري تحت حكم السيسي هو نفس وضعه عشية نكسة 1967 ، الجيش الأول في الشرق الأوسط وأفريقيا والمنطقة العربية! و بتنقل عنه قوله " بينظر إلى لواءات الجيش في مناصب التكنوقراط
-٨٩تابع

و المشاريع الاقتصادية على إنهم بيخدموا نفسهم مش بيخدموا مصر" وتنتقد الصحفية طبعا و كالعادة دخول الجيش المصري في المشاريع الاقتصادية المصرية على الأراضي المصرية وشايفة انه أضر بالبلاد و حرمها من آليات السوق الحر وأبقاء تحت رحمة الإقتصاد الموجه!
-٩٠تابع

و نسيت إن الجيش البريطاني بيساهم في الإقتصاد الإنجليزي ب20 مليار جنية استرليني سنويا من خلال تحفيز القطاع الصناعي داخل البلاد والمساهمة في خلق 260 ألف فرصة عمل سنويا ، و دا كلام صفحة الحكومة البريطانية الشهر دا .
وحاجة كمان موجودة في بريطانيا أنا مقدرتش أطلع عليها و هى
-٩١تابع

الحصر الكامل لشركات الجيش . مقدرتش لأن في بيانات محجوبة وتعدد في التخصصات وإسهال في عدد الشركات، مع إن عماد مأكدلي و مأكد لكل الميديا إن عندهم كشف للميزانات و شفافية في البيانات خصوصا فيما يخص ميزانية الدفاع، لكن معلش هو عماد أحيانا نتاش كدة!!
-٩٢تابع

أما عن انخراط الجيش في الحياة العامة منذ تولي السيسي على خلاف المفروض يحصل بناءا على رؤية الايكونوميست فبدون مقارنة ولا دواعي جدل–السيسي اتولى حكم بلد شبه منهارة وخارجة من ثورتين وبتواجه منتخب الارهاب العالمي لوحدها، والاحتياطي الأجنبي مش موجود والأزمات بتيجي في ديل بعضها
-٩٣تابع

ومكنش عنده رفاهية عدم الإعتماد على الجيش – و ناخد مشهد واحد من الواقع و هو أزمة ألبان الأطفال في 2016 ، لما الشركات المصدرة لألبان الأطفال "المدعومة" وقفت بيع والشركات في الداخل احتكرت المخزون لزيادة السعر و مكنش عندنا إلا مصنع واحد و معطل – اضطر الجيش يدخل على خط الأزمة
-٩٤تابع

واتعاقدت على كميات كبيرة للإبقاء على سعر العبوة المدعومة بـ30جنيه بدل60 جنيه أيامها. ومن بعدها اتخذ قرار بإنشاء مصنع لألبان الأطفال لتفادي تكرار هذه الأزمة.
طيب ناخد مثل من الجيش البريطاني ونشوف عمل إيه في2022:
بسبب بدء أكبر إضرابات في تاريخها تشمل قطاع الصحة والنقل والبريد
-٩٥👇

شلل تام شمل المستشفيات والقطارات والباصات والطائرات والسفن والموانئ والمطارات وبخسارة تبدأ بـ14 مليار جنيه يوميا. الجيش البريطاني نزل الشوارع للتامين وجنوده قاموا بقيادة سيارات الاسعاف والاتوبيسات وسيارات نقل المحروقات والخضروات.
والجيش البريطاني في الأزمة لجأ لبنوك الطعام
-٩٦👇

وسط ارتفاع الاسعار الرهيب في الغذاء، وبحسب البيانات لجأ 760 ألف شخص في الامبراطورية اللي مكانتش بتغرب عنها الشمس لبنوك الطعام بزيادة 38%عن السنوات اللي قبلها! والتقرير أهو:

ولو تصورت ان مشاهد تواجد الجيش البريطاني في الحياة العامة هى وليدة الحرب الروسية مؤخرا تبقى غلطان
-٩٧👇

في اكتوبر 2021 أذاعت فضائية “يورونيوز” عربية، لقطات لجنود الجيش البريطاني اللي بدأوا في الانتشار في الشوارع لتزويد محطات الوقود التي اجتاحها سائقو السيارات في محاولة لحل مشكلة نقص الوقود بعد تدريبهم على قيادة آليات البضائع الثقيلة وملء مضخات البنزين، يفترض أن تم نشر
-٩٨تابع

نحو 200 عسكري نصفهم سائقون، في إطار العملية التي سميت "إيسكالين". كل دا في بلد لم تمر بثورة ولا ظروف سياسية كانت ممكن تعصف ببقاءها، و احتاجت للجيش و دخلته في نسيج الاقتصاد ومع أي هزة للأوضاع الداخلية تنده عليه عادي، لكن في مصر الجيش مكانه الحدود يا منى ، معروفة!
-٩٩تابع

وبعدين همسة في أذن القادة في الجيش البريطاني ويا رب أكون بساعد الإيكونوميست في كتابة تقارير حقيقية، في تقارير يبدو إنها موصلتش حضراتكم فيما يخص صحة أفراد الجيش أتمنى تاخدوها بعين الجدية حتى شوفو معايا كدة ، جاييبن sorry في سيرة كرش حضراتكم ولا مؤاخذة:
-١٠٠

ولو مش معروفة ممكن أجيب للباحث د.يزيد الصايغ بتاع مركز كارنجي للأبحاث المتحدث بلسان الأخوان و البوق المظبوط على محطة نقد السياسات المصرية فقط، أرقام مساهمة الجيش الأمريكي و شركاته في اقتصاد الدولة، أقولك إفتكر بس أزمة الألبان يا يزيد بتاعة مايو2022
-١٠١تابع

لما جو بايدن فعل قانون "الانتاج الحربي"ووجه وزارة الدفاع بجلب لبن الأطفال بطيارات البنتاجون من خارج أمريكا بعد النقص الكارثي بسبب تلوث المصنع اللي كان مسؤول عن 45%من انتاج الألبان في أمريكا
ونوصل للفقرة الكوميدية فالتقرير عندما وقع القناع على المسرح من الممثلين أمام الجمهور
-١٠٢

بس المرة دي النكتة كلنت بايخة أوي ومحدش ضحك!
التقرير بيلقى اللوم على السيسي لإقامته الحوار الوطني متأخر و بدون اشراك جماعة الإخوان المسلمين الإرهابية وأن مش هرد على الاتهامات اللي طالت جدوى الحوار الوطني تمت الرد عليها اكتر حاجة والتاكيد على اهميتها و بالارقام ،
-١٠٣تابع

لكن هرد على الشق الثاني، فات على الإيكونوميست بس إن
الجماعة المذكورة هي محظورة قانونا والإنضمام إليها يعرض صاحبها للحبس بحسب القانون المصري!
تم إدانة أغلب أعضاءها في قضايا إرهاب – إزاي بتطلب صحيفة بالشهرة دي اشراك قتلة في حوار وطني بعد ما دمروا البلاد وقتلوا خيرة الولاد؟
-١٠٤👇

نقول لأهالي الشهداء إيه؟
الايكونوميست هتذنبنا على الحيطة؟😱
الرضا السامي البريطاني خلص من 1954 – دا إذا مش منتبهين يعني!
وبعدين هو إيه اللي دخل صحيفة اقتصادية في شأن سياسي داخلي؟
ويرجع المقال للشأن الاقتصادي و يبلغ قمة الصعار مع سيرة هروب المستثمرين وغضب البنك الدولي
-١٠٥تابع

اللي مصر لم تلتزم بخطتها في طرح 32 حكومية للبيع أو التداول. بس الحقيقة دا حق يراد بيه باطل!
لأن برغم الأزمة الإقتصادية اللي بتشهدها مصر إلا إن مجلس الوزراء كشف عن زيادة الاستثمار الأجنبي المباشر في مصر زاد بنسبة 2022/2023 ليصل إلى 3.3مليار$ مقارنة مع ارقام الربع المناظر له
-١٠٦👇

من العام المالي السابق واتقدمت مصر 5 مراكز على مؤشر جاذبية الاستثمار الاجنبي من المركز السادس في 2014 إلى المركز الأول في 2020 في أفريقيا
وفي نفس الانفوجراف هنلاقي وكالات التصنيف العالمية فيتش وموديز وستناندر أند بورز بيقولوا شهاداتهم في الانفوجرافات الاتية و نقدر نشوف
-١٠٧👇

عدد المراكز اللي تقدمت فيها مصر في مجالات الاستثمار وتحسين بيئة الاستثمار:

أما ما يخص الصندوق مصر طرحت بالفعل الشركات المذكورة و طلبت فيها أرقام عادلة لكن، الجهات اللي تقدمت مكانتش جاهزة باللي طلبته ، و بما إنها عملية بيع و شراء وتجارة بهدف المكسب في مقدرات شعب ،
-١٠٨

مرضختش لعمليات البيع المجحفة لحقوقنا. واكبر مثال على كدة دا لو في باحث شارك فيها كتابة التقرير كان هيتكعبل في صفقتين تم بيعهم من الطروحات المعلنة: أولهم صفقة باكين اللي اتباعت للأصباغ الامارتية وبدأ التداول فيها من 34 جنيه للسهم ووصلت لـ38.8 – وصفقة المصرف المتحد اللي كان
-١٠٩👇

من ضمن الصفقات هذا العام ورفضت بيعه للصندوق السيادي السعودي عند600مليون دولار وتم البيع للكويت عند مبلغ660 مليون دولار.يعني لا في هروب من تعهدات ولا في تخلي عن ممتلكات!
ويا سبحان الله
بعد تصريح الرئيس السيسي عن اولويات مصر المقدمة على متطلبات المؤسسات الدولية، نشوف النهاردة
-١١٠

الرئيس التنفيذي لمؤسسة التمويل الدولية IFC مختار ديوب خلال لقائه الرئيس عبد الفتاح السيسي:نتطلع لتوقيع اتفاقية دعم برنامج الطروحات المصري، وتقديم المشورة بشأن تنفيذ وثيقة سياسة ملكية الدولة وفقا لأولويات واحتياجات الحكومة رئيس الوزراء المصري مصطفى مدبولي: توقيع اتفاقية
-١١١تابع

مع مؤسسة التمويل الدولية لتكون هي استشاري الحكومة في تنفيذ برنامج الطروحات الحكومية لمدة 5 سنوات، وسيكون لدى المؤسسة القدرة على تسويق الأصول المصرية خارجيا
-١١٢تابع

وختامها يخني عجب من بتاع عادل امام:
بيقول التقرير اللي هو مش تقرير إن السيسي فقد الثقة في ولاء لواءات الجيش له وانه بيضطر ينام كل ليلة في قصر شكل من قصوره الفخمة، دا طبعا خوفا من الاغتيال، والخوف الأكبر من نسيب السيسي الفريق محمود حجازي، عشان نفوذه بيزيد جوا الجيش!
-١١٣👇

هو سؤال :
هو السيسي بيعتمد على الجيش ولا قلقان منه؟
الاجابة هتحدد مستوي ذكاء اللي كاتب التقرير مش القارئ!
الجيش اللي في وجود السيسي وصل لتصنيفات العشرة الكبار هيكره السيسي؟
طيب الجيش اللي وزع طاقاته و امكانياته على كافة الأصعدة هيكون عايز يتخلص من السيسي؟
-١١٤👇

للعلم حالة الجيش المعنوية في أعلى معدلاتها وإحساس أبناءه بالفخر والفاعلية والقيمة غير مسبوقة – حبهم لقائدهم مش محتاج إثبات!
ونرد على إدعاء خسيس ضد الفريق محمود حجازي صاحب الـ71 عام ، سايب الخدمة العسكرية من 2017 بعد شغله أرفع المناصب كان آخرها رئيس أركان الجيش ،
-١١٥تابع

والقانون بينص على إن المدةالمقررة للبقاء في هذه المناصب يبقى سنتين، وبعدها اتعين
(خد بالك من اللي جاي)
مستشار الرئيس للتخطيط الاستراتيجي وادارة الأزمات يعني كل خطط الدولةالاستراتيجية وأمنها القومي وادراة أزماتها في يد هذا الرجل اللي هو اصلا نسيب السيسي اللي بيقولوا هيغدر بيه
-١١٦

الايكونوميست عدت حدود التأليف و دخلت عل التخريف الحقيقة والفضل في الاعتماد على روايات الاخوان !
أما القصور الرئاسية مش ملك السيسي ، هى ملك مصر ، وهو لما يخلص مدته برضو هتفضل ملك مصر ، و لما تعدى أبناء رئيس سابق على ممتلكات القصور ، مصر حاكمتهم واتسجنوا
-١١٧تابع

والسيسي نظيف اليد وعفيف النفس مش هو اللي كان بياكل بط و حمام على سجاجيد الرئاسة ولا فواتير الفجع كانت بالملايين !
وينهي التقرير اللي هو قائم على التجهيل كلامه بإن الخليج بطل يدعم و عينه على الاستحواذات ودا شئ من وجهة النظر المصرية بيقول
-١١٨تابع

إن اقتصاد مصر معتمد على الاستثمار مش المعونات و الدعم، و دا مؤشر طيب جدا مش العكس! احنا بنوفر الطروحات وماشين فيها بالتوقيت و الظروف اللي تناسبنا واظن اثبتنا فوق ان الطروحات شغالة .
وختامها خيبة معلش :
نرجع لحدوتة بيع قناة السويس زي الاشاعة بتاعة الاخوان ما طلعت من شهرين
-١١٩👇

عن طريق وثائق مفبركة و فيديو تركيب خايب بيقول انها هتتباع حق انتفاع 99 سنة بتريلون دولار!
وهنا الرد في الفيديو اللي يسكت أي حد!
خلص التقرير و نقول الخلاصة:
التقرير لم يذكر إطلاقا أي شئ يخص أوضاع الخارج اللي أثرت على مصر و اتسببت في استضافتها ل9 مليون ضيف ،
-١٢٠تابع

بيضغطوا على ميزانيتها و بيستنزفوا امكانياتها، لكن المؤسسات الدولية بتعرف تشكر مصر بالتصريحات و تنتتقدها في التحليلات،
مع إن هذا الرقم لو اتوزع على ال50 دولة أوروبية بعد خصم نصيب أوكرانيا ، هيكون نصيب بريطانيا لوحدها 180ألف لاجئ😍
(ضيف بلغة الريس المهذبة)،
-١٢١تابع

ولو حسبناها بتوزيع القدرة الإقتصادية يبقى نضرب الرقم دا في3
(على أد نصيب بريطانيا العظمى بقى)
يوصل حقها من ضيوف مصر 540ألف لاجئ،مش خسارة فيكم نص مليون مع الرأفة
بس بريطانيا حاليا بتهجر اللاجئيين قسريا إلى رواندا بخلاف كل المواثيق الدولية وواخدة قرص مسكن ضد صداع حقوق الإنسان
-١٢٢

التقرير كمان أغفل الخطر الوجودي اللي واجهته مصر من حدودها الالشرقية في وجود الإرهابيين وتكلفة الخلاص منها و الخطر من حدودها الغربية بسبب الانفلات الأمني القادم لها من ليبيا و تمكنها من وقف التمدد المليشياتي والأطماع التركية في الأراضي الليبية.
-١٢٣

ودلوقتي ناسي التقرير معاناة مصر الحالية من الوضع في السودان و أزمة الحدود الجنوبية ، نسيت الإيكونوميست إن لولا جهود جيش مصر(اللي بتصوره على إنه مجموعة من الشركات التجارية المستغلة)،
مكانتش عرفت تجلي رعايا المملكة المتحدة من بين براثن الحرب الدائرة هناك!
-١٢٤تابع

احنا في أزمة دا بالتأكيد و الرد دا مش مكتوب عشان يبيض وش حد، لأن قيادتنا السياسية مش مستنية حد يلمعها، السيسي شغال سواء كانت عاجبانا السياسة أو لا هو اختار الإصلاح الجرئ جنب معركة الوفاء بإلإلتزامتات، عنده نظام إداري مترهل وميراث من القوانين واللوائح معيقة
-١٢٥تابع

وشرزمة من القرارات المكبلة لحركة الإقتصاد مش سهل يخرج منها
بالإضافة لحربه من أجل الإبقاء على النقد الأجنبي على حساب شراء مستلزمات إنتاجها واحتياجها الشديد لتغيير ثقافة الكثير من القائمين على الملف الإقتصادي بالدولة محدش ممكن ينكر وضع مصر الحساس إقتصاديا،
-١٢٦👇

لكن كمان محدش يقدر ينكر التربص بمصر إعلاميا وخصوصا من المدخل الإقتصادي ومحاولات إشعال الرأي العام بالداخل من أجل إفشال الدولة وإسقاط النظام، مش من أجل أي هدف أخر. فقط أردت أن أكشف أحد أساليب التشويه من أجل إحداث الإرباك المطلوب وإحباط الروح المعنوية للمصريين،
-١٢٧👇

التي بالفعل تعاني من ضغوط الأزمة الإقتصادية والرحمة باهالينا مطلوبة
مكنتش أتمنى أكون أنا اللي بكتب الكلام دا بمجهود فردي، كنت أتمنى أشوف منصات إعلامية بإمكانيات فنية ومهنية متطورة، لان دا مش هيكون اخر تقرير لسة جاي لنا سيل من التقارير في الفترة الجاية زي ما كان في كتير اوى
-١٢٨

أنا هنا مكنتش بدافع ولا بهاجم- كنت بواجه بشرف الواثق
باخد نفس البنود واطبق عليها نفس المعايير واقدم مراية "حقيقية"و "واقعية" للأوضاع – عايزة اخلي القارئ يشوف حقيقة الدول اللي قامت على استنزاف ثروات دول زمان، ولحد دلوقتي بتستنزفها ، لو مكانش ماديا بيكون اعلاميا ومعنويا-
-١٢٩تابع

وغير الايكونوميست عندك هآرتس (ليكي روقة) و دلاديل "آل روتشيلد" كتير واحنا موجودين وجاهزين للرد. بطالب الجميع مياخدوش منصات التنظير كمسلمات وكمان مياخدوش ارتفاع الاسعار مقياس وحيد للحكم على حال البلد ومستقبل ولادها.

🤌🏼🤌🏼🤌🏼🤌🏼
-١٣٠تابع

انا غير معنية بالناس اللي مصرة تثبت نفسها صح بالتشفي في ازمات مصر عشان يسمع اللي حواليه
"انا اللي بفهم و انتو حبظلم"،
حتى لو كان اثبات إن مصر هتفلس ماليا زور مهما كلفه الأمر!
صوت الحق عالي مهما زيفوه الاندال، وعمل الخير باقي مهما سكت عنه الأبطال!
-١٣١تابع

مهما كنا مأزومين مش هنتأزم أكتر من نكسة 1967
المصريين تعبانيين من الأسعار،مفيش انكار للوجيعة،بس هما نفس الشعب اللي أكل الذرة العويجة الصفرا بديلا عن القمح ودا صنف من اصناف الذرة المرة جدا
المصريين حرفيا
"أكلوا المر"
حسوا بالتحدي لما اوقفت أمريكا شحنات القمح المدفوعة في1966
-١٣٢

ومهما كنا مش متحملين، مش الحل إننا نسيب البلد فريسة لأقلام مغرضة وأبواق مدفوعة، هتعدي بينا الأزمة زي ما عدت أزمات أصعب من دي بكتير،لكن صعب أوي تعدي وإحنا مهتزين. حكم عقلك واحترم عقل الاخريين و انت بتعمل شير وريتويت، وطول ما بلدنا مستهدفة اعلاميا انت مسؤول زيك زي غيرك
-١٣٣👇

عن اللي بيتم تداوله ولازم تاخد موقعك في المعركة على الاقل بالتدقيق
بعضا من الصبر والثبات وتغليب العقل فيما نقوم بتداوله عن بلدنا للحفاظ على مكتسبات تعبنا سنين ولسة هنتعب عشان نحافظ عليها وننميها سنين وسنين وعشان خاطرها هتفضل متحملين.
-١٣٤تابع

وأخيرا
إحنا في حرب العقول
وعشان كدة أخدت مكاني على جبهة حروب الوعي،كتبت دا عشان اشكر كل أيد عمرت وخضرت واشتغلت وطورت وكل زند حارب عشانها في جبل الحلال وشاف الأهوال وكل شهيد قدم روحه فدا،بكتب ترضية بسيطة لأم وأب الشهيد،وزوجة وبنت وأخت وأبن الشهيد،وكل مصري اتحمل ضيق المعايش
👇١٣٥

عشان بلدنا تعيش
لو سمحتوا خدوا المعلومة واتسلحوا بيها،ردوا بتمكن منها،محدش مفروض يستنى حد يقوله حب بلدك ودافع عنها،ولا ينفع حق مصر يغفل عنه أهل البلد الأمبن، أنا لا هاخد جايزة ولا مدفوع لي أجر،لكن مكافأتي اللي بجد هي إعلام أهل بلدي بالحلو والحق اللي مقالوش أي حد!
بقلم
#شيرين_هلال

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد