صديقي بائع/بائعة العقارات ..انا عارف ان كلنا عندنا شغلانة لازم نعملها ، و ان ده اكل عيش، بس كل شغلانة ليها صنعة. فتعالى اما اقولك على كام حاجة كده تنفعك و تخفف عنك وعنا من صديقك بياع برده بس ببيع تكنولوجيا ثريد 🧵..
١. المعروف بالcold calling وسيلة كويسة و كل حاجة بس شوية تصرفات صغيرة هتخلي سمعتك افضل و ممكن تجيبلك احترام الي اكيد هينعكس على ارقامك. ما بنكلمش حد في الويك اند، ما نتكلمش اول ساعتين شغل الصبح علشان محدش بيبقى طايق نفسه ، ما بنكلمش حد بعد الساعة ٧ مساءً. فرصتك من ١١ص الى ٦م..
٢. احنا مش صحاب فبلاش الكلام بعشم، الكلام بيبقى باحترام. في اول المكالمة بنبدأ باسمك و انت بتكلمني ليه من اول ١٥ ثانية ، متسألنيش انا عامل ايه و يومي كان ازاي تاني احنا مش صحاب. بعد اول ١٥ ثانية تسألني على طول اذا كان الوقت مناسب للكلام ولا لا. لو قولت لا اسألني امتى مناسب ؟ ..
لو ماقولتش وقت معين يبقى انا مش مهتم و ارجوا انك ما تكلمنيش تاني. الافضل و الافضل انك تجهز رسالة لطيفة مش طويلة و تبعتهالي مكتوبة فيها المعلومات الاساسية الي ممكن تثير اهتمامي واطلب تحديد وقت نتكلم فيه ، او اسألني اذا فاضي نتكلم دلوقتي. ..
لو ما رديتش على التليفون او الرسالة، في قاعدة لطيفة في البيع اسمها 3x3x3 يعني هتحاول تتصل بيا ٣ مرات بين كل مرة و الثانية ٣ ايام و تحاول على ٣ وسائط اتصال مختلفة لو متاحين. لو بعد كل ده مرديتش و مافيش اي استجابة يبقى مش هبقى زبون و مش مهتم و move on صديقي البائع….
٣. مش كلنا هنستجيب لنظرية انك تخلق urgency للبيعة و نادراً ما حد هيشتري عقار على عجالة ببساطة لان المعروض كثير و السعر المطلوب عالي فبلاش الكارت ده علشان هيبان انك مدلوق و ماحدش بيشتري من حد مدلوق. انا عارف انك عايز تقفل ارقامك بس دي مشكلتك انت مش مشكلة الزبون…
٤. احنا بنشتري لاسباب مختلفة لازم يبقى هدفك انك تعرف انا لو هشتري هشتري ليه علشان تقولي على المنتج المناسب و علشان لو ماشتريتش المرة دي تعرف تبعتلي بعد كده على ايه لما يبقى عندك حاجة جديدة. انت مش ماشي بصينية فلايات و مشاط في اتوبيس و عايز تبيع اي حاجة و السلام…
مثلاً لو انا كنت مهتم بعقار سعره ٤ او ٥ مليون و كملت معاك شوية و في الاخر ماشتريتش ما ينفعش تجيلي بعد شهرين تعرض عليا حاجة ب٢٥ مليون الا اذا كنت سمعت اني ورثت عمي الي في البرازيل في خلال الكام شهر دول. ده بيدل انك مش فاهم اي حاجة في الشغلانة دي.
٥. لو انت فعلاً شايف اني زبون كويس و ييجي مني بلاش كل مرة يبقى سبب اتصالك بيا إنك تبيع . ممكن عادي تبذل شوية مجهود انك تبني معايا علاقة كويسة زي مثلاً انك مرة تبعت تقولي ملخص لتطورات سوق العاقرات ، او مرة تبعتلي رسالة شخصية تقولي كل سنة وانت طيب بمناسبة العيد…
او تبعتلي تطورات البناء في مشروع انا كنت ابديت اهتمام بيه قبل كده وماشتريتش. البيع شغلانة عايزة نفس طويل و مش هينفع فيها مبدأ انتش واجري.
٦. اسهل زبون تبيعله هو الي اشترى منك قبل كده علشان كده علشان كده أتأكد انك مستعد تبص في وشي بعد البيعة بسنة وانك مشتغلتنيش..و ربنا يوفقك و يرزقك و يفتح عليك و علينا يارب 🙏
جاري تحميل الاقتراحات...