مساء الخير..
فيه جمله كلنا بنكررها ونقولها أو بنسمعها، بتتردد كتير (كلو بيعدي، فتره وهتعدي) استوقفتني شويه هي فعلا حقيقة، وبيعدي بس مش ببلاش ليه ثمن وغالي لأن ثمنه عمرنا، الوقت بينقضي ومعاه عمرنا كمان بيعدي ويفوت..
أحداث كتير ولو سيبنا نفسنا لمصطلح كلو بيعدي هنلاقي نفسنا فجأه

عجزنا والعمر اتسرق في الفاضي، ملحقناش نعمل حاجة، واللي زعلان وانخذل عمره عدي في جمله كله بيعدي والزمن اكل كتير من عمره في فترات تعافى، واللي مستني حاجه تحصل نفس القصه العمر عدي واتسرق وبرضو مستني في الفاضي...
علشان كدا حابب أقول حاجة مهمة، هو فعلا كلو هيعدي ودا الطبيعي، بس

متخليهوش يعدي في الفاضي متتسرقش بسهوله كدا وإنت راضي..
اصلا ادراكك ان كله هيعدي يخليك تتعافي بسرعه ومتستناش كتير يخليك تفكر صح وتقرر صح علشان متتفاجئش إن عمرك إستُهلك في الفاضي انقضي بلا فائدة تُذكر ، خليك دايما صاحب قرار وإن الوقت لما هيعدي مش هيكون عدي في الفاضي هتكون اتعلمت

واجتهدت ونجحت وفشلت واكتسبت خبره وبنيت حياه، وطورت من ذاتك وغيرت في المجتمع والناس وبقيت علامة ظاهرة وصاحب أثر، ووقتها حتى لو عمرك انتهى وعدي بس معداش في الفاضي.
#خواطر_الفقي