فاكر زمن العز
بنشترى البلح بالرز
وناكل بط ووز
والزير قاعد يِنزل فى القلة المدورة
مية مفلترة
ونسرح الدودة
والعجلة مولودة
والبركة موجودة
والعيش عمال يشب
ف الفرن قاعد يقب
والمطر نازل يصب
والبلطى طالع بيجرى
فى القناية
اصطاده فى حجرى
والحمام ف الرف
المدسوس ف البرام
والصحة تمام

ومفيش اسقام
ونسعى ع الحلال
ونهرب م الحرام
وعايشين ف سلام
بكل أمان
وبعيد عنا الخصام
وبينا احترام
ونطفى الشراقى
والبشاشة عند التلاقى
والسكر القوالب
والديابة والتعالب
وشاى الشيخ الشريب
وطعمه العجيب
ونمس البطيخ
نايم ومستريح
على الجسر الفسيخ بدون تلقيح
وبنشحت البرسيم بالحمل

ومشغولين بتحصيل العلم
وبنقعد على الكنب
ونرعى الغنم
وياجمال شجر وطعم التوت
وسلاح الحِراسة العصاية والنبوت
ونام بعد العشا
ونصحى والدنيا مدغوشة
وبنركب الكارو
ال الحصان جارو
ونلعب القال ونسمع الموال
ال فى مولد النبى بيتقال
ونسهر مع السييط
ونسرح الغيط
والحلاوة الكفوف والكرملة

والسلبة والشخشيخة والفرقلة
والهدية والساقية والناف
مضلل عليهم شجر الصفصاف
نقيل ونقعد تحته
ونفرش ونام مانخاف
والبقرة جرة اللواط وليلة العيد سهرانين عند الخياط
ونفرقع البمب وننفخ النفافيخ
ونضرب الصواريخ
والسلايف زى القطايف
عجينة واحدة
والكل شايف
دار جمعاهم
والودهواهم
والستر مناهم

وانت ياعزيزة
مصروفك بريزة
وشاطرة منذ كنت تلميذة
ومرتبت فرحك قُطن جِيزة
ربيتى العيال
وعلمتى أجيال
وأصبحتِ مضرب للأمثال
ومنخلتىِ بالمنخل والغربال
والستر موجود
وعال العال
وتخضى السمنة
وتجمعى البامية
وتصنعى المش
وتعقدى القش
ومفيش حسد ولاغش
وتدى الجيران طاجن اللبن بالوش