من طرائف الأزمة
أمس قريت تصريح للسيد والي الخرطوم اظنه كان قبل أيام قال فيهو انو آلشرطه ح ترجع و ح تقوم الارتكازات حول المناطق الاستراتيجيه والوزارات والاسواق كلاااام كتير انتهي كلام الوالي
كلام الوالي في موضوع الشرطه ده بذكرني بطرفه حكاها المرحوم دكتور /علي الكوباني رحمه الله

قال في يوم تخرجو من الجامعه اصحابو جو شايلنو وبيغنو ومبسوطين المهم دخلو البيت وحدث هرج ومرج اها دكتور علي قال عندو حبوبتو كبيره في السن سمعت الجوطه في البيت سألت قالت في شنو النسوان قالو ليها الليله علي أتخرج من الجامعه قالت ليهم واجيد لي ايوووووي يوووووي نادو لي علي النبارك ليهو

اها جابو ليها علي قالت ليهو مبروك ياوليدي آه بقيت شنو قال ليها دكتور قالت ليهو بتعالج ياتو مرض قال ياحبوبه أنا دكتور شرعي قالت شرعي يعني شنو قال ليها ياحبوبه يعني الزول لمن يموت بيجيبوهو لينا نشرحو ونعرف سبب الوفاة.. .

قالت ليهو ووب علي واسجمي هو عليك الله زول مات تاني جايبنو للدكتور لي شنو! الترابة في خشم أمك ياعلي..
رحم الله دكتور علي الكوباني.
هسه الوالي بعد الأسواق والبنوك والبيوت والمحلات اتنهبت وحياة المواطنيين اتعرضت للخطر جاي يعمل ارتكازات للشرطه ويرجعا..
والي الخرطوم الترابة في خشمك.