انا متفهماك بجد، انت مع شخص وقح و قليل الذوق و قاسي و مش بيتعاطف معاك و بيعاملك على حسب مزاجه و بيكدب عليك و بيتلاعب بيك و بيستغلك و بيجننك و بيعزلك عن القريبين منك بس لما مزاجه بيبقى حلو بيوريك الجنة و السهرات معاه جميلة وكإنك ما سهرتش مع حد قبله و ال sex بيبهرك كل مرة و...
لما بيضعف بين ايديك و يعيط لك و يحسسك إنك الوحيد المميز اللي فاهمه ، الوحيد اللي عارفه ، الوحيد بين كل الناس اللي حسيته بروحه الحساسة ورا القناع القاسي الوقح اللي مافيهوش نقطة تعاطف اللي بيلبسه بتحس إنك فريد من نوعك مش كدا؟مش انت اللي فهمت الوحش اللي ماحدش فاهمه؟مش انت الشاطر دة؟
و ما ننساش إنه هو الوحيد اللي عارف ثغراتك و بيعرف يرضيك بالشكل اللي يتناسب مع مزاجك بالضبط لما بيجي على مزاجه يرضيك و هو الوحيد اللي بيعظّم منك مع إنه بيقلل منك برضو لما بتسمح له الفرصة ، و ما ننساش إنه كاريزماتك بطريقة مش موجودة ف الناس الطبيعية اللي انت شفتهم، مش كدا؟
و انت اكيد بالنسبة لك الناس الطبيعيين مملين ، مين طبيعي هيعرف يجننك زي الشخص دة و يرفعك لسابع سماء زيه؟ بس ما سألتش نفسك إن من طبيعي هيرميك لسابع أرض زي ماهو بيرميك بعد ما بيرفعك؟ مين طبيعي هيتجاهلك و إنت محتاجه؟مين طبيعي هيبص لك ببرود و انت بتشتكي و يستناك تسكت لإنه ضعفك ممل له؟
المهم ف كل دة إنك عايز تاخد كل حاجة و ما تخسرش اي حاجة، عايز تاخد كل الحاجات الحلوة المبالغ ف حلاوتها اللي ف الشخص المؤذي اللي معاك بس تخليه ينسلخ تمامًا من الأذى اللي ف طبعه و دة مش هيحصل! الإتنين بيجوا مع بعض، كل ال rush اللي بيديهالك هتلاقي بعدها أذى لإنها اساسًا؟
مبنية على دوافع خبيثة تجاهك و تجاه غيرك. هو مش بيقدم لك حاجات حلوة و مش بيسحرك بناء على حُب حقيقي و إهتمام حقيقي لهويتك، كل دوافعه أنانية، هو مثلًا هيحب يبهرك ف ال sex عشان إنبهارك هيديله تعزيز عالي اوي ف هيحب يركز على ال performance عشان ياخد ردة الفعل اللي ترضي غروره.
هيحب يدخلك ف اجواء شاعرية مثالية قدام الناس احيانًا عشان الناس يقولوا " يا بختها ! شوفوا بيعمل عشانها ايه؟ شوفوا بيعاملها ازاي؟ قد ايه هي محظوظة بيه" و عادي يدفع مبالغ ضخمة عشان يوصل للصورة دي، الصورة اللي تبروزه على إنه حاجة ما حصلتش و إنتي محظوظة لإنك معاه. هو بيحتاج دة.
و لما مزاجه بيبقى رايق و عنده احاسيس حميمية ف هيطلعها لك عشان يخدم نفسه مش بيخدمك، هو مزاجه عايز يحس بالحاجات دي ، هو حابب يحس بالمشاعر اللطيفة دي ، المشاعر السطحية اللي هو ماعندهوش قدرة يوصل لحاجة غيرها ف ماعندهوش مشكلة يدلعك عشان نفسه، و لما المشاعر تختفي؟ هيعاملك ببرود.
و هو ذكي جدًا، هيقولك الكلام المناسب اللي يرضيك تمامًا و يشبعك و يعمل كم مبادرة لطيفة عشان تبقى موجود ، اصل " اكيد هو مش هيعمل الحاجة الفلانية إلا لو كان بيحبني بجد" لا يا قلبي، هيعمل مليون حاجة فلانية عشان يضمن وجودك لكن هو ما بيحبكيش وماعندهوش القدرة على الحب.
جاري تحميل الاقتراحات...