لغة البحر الأحمر!!
النهارده علي جروب الصيادين ناقشنا موضوع شيق انا شخصيآ مهتم بيه من فتره كبيره و نفسي اوثق اللغه اللي بيتكلمها صيادين البحر الأحمر لأن المشكله ان اللغه الأصليه للبحر الأحمر اصبحت مهدده بالإنقراض نظرآ لكثرة الصيادين الوافدين من محافظات اخري و اللي بيستعملوا لغه تانيه و مصطلحات مختلفه و تدريجيآ هتكون هي اللغه السائده!

شاركت انا و اصدقائي أعضاء الجروب في حصر بعض مصطلحات تلك اللغه و حابب اشاركها معاكوا هنا من باب التوثيق و النشر و محاوله بائسه لانقاذ تلك اللغه،
- إتجاهات الرياح
❇️الحايه =الرياح
❇️ الحايه مشمله = الرياح قادمه من ناحية الشمال
❇️ الأزيب = الرياح قادمه من ناحية الجنوب و هو رياح تتميز بالرطوبه العاليه جدآ و الحراره و من اسوأ الرياح للصيد
❇️ مصريه = و هي الرياح القادمه من ناحية البر المصري و في معظم الأحيان تكون محمله بالأتربه
❇️ عيلي = الرياح القادمه من ناحية الشرق او السعوديه و تتميز بالحراره الشديده
❇️ الحايه رده = الهوا راجع أشد من الأول
❇️الحايه كاشه
الريح شاد
❇️الحايه مريحه = الريح هادي
- مصطلحات مختلفه
❇️ الهوادر = باطن المركب
❇️ النحر = الغرفه الصغيره في مقدمة المركب
❇️ جريره = الصيد بالجر
❇️ سمر او تسمير = زفر أو تزفير و هو القاء سردين او اجزاء سمك لجذب الاسماك الي منطقة الصيد
❇️ سجل = ثقل. و هي طوبه يتم ربطها بكمية سردين كبيره لانزاله في منطقة الصيد
❇️ ناخوذا
ريس المركب
❇️فرميله
الفندر
❇️عسام
عندما يكون البحر في حالة هدوء تام و يتحول سطح المياه الي مرايه و تتعذر رؤية الشعاب (أخطر بحر)
❇️مغدچه
الشبكه اللي بتترمي بالايد
❇️صابي
عندما تترك المركب تتحرك مع الريح فقط بدون مواتير
❇️مبحر
عندما تكون المركبه في اتجاه مقابل للموج
❇️مشيع
تندما تكون المركب في نفس اتجاه الموج
❇️ عاري
البحر الغير عميق
❇️غزير
البحر العميق
❇️جطعه
قطعه كبيره من الشعاب المرجانيه
❇️عرق
شعبه مرجانيه صغيره
❇️عمفصيص
الاخطبوط الصغير
❇️ لقطه = السردين الصغير
❇️تجليب
الصيد بالتسقيط
❇️ مطفر
يطفو علي سطح الماء
❇️ المركب بتشوط
المركب بتتمرجح يمين و شمال وهي مربوطه
❇️ مقابل
المركب عكس اتجاه الموج
❇️عارض
المركب ماشيه بالعرض علي الموجه
❇️ كنه
المنطقه الهاديه او المحميه في وسط البحر العاصف
❇️ بطان
الناحيه المحميه من الشعب
❇️دهار
الناحيه الغير محميه من الشعب و اللي في وش الهوا
❇️المد
التيارات المائيه
❇️ المد مبحر
التيارات المائيه عكس اتجاه الموج
❇️ المد مشيع
التيارات المائيه نفس اتجاه الموج
❇️ اسكانديل
جهاز كشف الاعماق
❇️ بروسي, بشليله
Anchor بأشكال مختلفه
❇️ شمعه
الحلقه اللي بتربط فيها حبل ال anchor علي المركب
❇️ طبليه
هي منطقة الصيد في ضهر المركب او ال platform
❇️ تدميغ، دمغ
طريقه معينه لربط حبل الهِلب, عشان لو شبك في شُعب مرجانيه تسليكه يبقى أسهل. بيتقال ادمغ البشليله
❇️ تزهيد
هو تحديد موقع معين في البحر عن طريق ربطه بنقطتين في البر و بالتالي يتم الملاحه منه او اليه و هو نظام ملاحه طبيعي بدون اجهزه
❇️ نجفت
لفظ يقال لما البشليله او الانكور يفك لوحده
❇️ باحه
البحر المفتوح
❇️وعره
مكان فيه صخر
❇️ البحر خاسس
اوطي مستوي لارتفاع البحر بسبب تأثير المد و الجذر
❇️ فصمه
مساحه فاضيه ما بين الشعاب المرجانيه تسمح بمرور المركب
❇️ البحر زايد
اعلي ارتفاع للبحر بسبب المد و الجذر
❇️ تلويش
لما حبل في المياه يلف علي حاجه و تحديدًا مروحة المركب يقال المركب لوشت
❇️ رفاص
مروحة موتور المركب
❇️ حرب او محرب
شد علي الحبل او محرب يعني مشدود
❇️ ربخ
عكس محرب لما الخيط او الحبل يكون فيه زياده و مرخي
❇️غاصه
عقده في الحبل تعمل زي مشنقه
❇️محيص
الحبل محيص يعني متكعبل
❇️أزأ
ورشة تصليح المراكب علي الشاطئ
❇️شحط
يعني المركب طلع فوق الشعب
❇️ بروه
مقدمة المركب
❇️فلق
ابعد
❇️ساير
طول للسمكه لما تكون بتاخد منك بتفايت
❇️شبحه
شعبه كبيره متجمعه زي العرق بس كبيره يتكون في عمق مش زي القطعه
❇️قلوه
عباره عن دايره رمليه في وسط الشعب
❇️ضمره
نوع من الشعب بيكبر بشكل دائري لو المركب دخلت فيها بسرعه مش بتتكسر من قوتها!! تعتبر اقوي شعبه في البحر
❇️سلسل
مشي الخيط مع المد
❇️جعز
خلفيه المركب
❇️كشوه
باطن المركب من الاسفل
❇️باطوس
جناب المركب
❇️ملحق
المخزن الموجود ع المركب
و للحديث بقيه و اي حد يقدر يساعديكون مشكور جدآ 🙏🙏🙏