موضوع البطاقات مسبقة الدفع أو استخدام البطاقات بالعملة الصعبة بشكل عام، ايه تأثيرها على المعروض الدولاري و ايه حجمها و ليه المركزي مركز مع الكروت كدة بقاله فترة؟
البند ده بيظهر في ميزان المدفوعات تحت "travel" و بيضم كل المنصرف الدولاري خارج مصر من خلال تعاملات المصريين خلال السفر او المقيمين في الخارج. كل عامود بيمثل المنصرف تراكميا خلال كل ربع في اخر ٢ عام مالي. المركزي بيقول انه لاحظ ارتفاع كبير في الاستخدام الخاص بالبند ده.
واضح امامنا ان بداية من الربع الثالث من العام المالي ٢١-٢٢ (يناير - مارس ٢٢)، الاستخدام تقريبا تضاعف و في الربع الاول من العام المالي ٢٢-٢٣ (يوليو - سبتمبر ٢٢) تضاعف تاني مقارنة بالسنتين الي قبل كدة. هنا حصل اول تحجيم لحدود السحب..
طبعا مع انحسار تاثير كورونا على السفر، البند ده كان بالفعل ابتدى يرجع لمعدلاته من الربع التاني من ٢١-٢٢ و لذلك الزيادة برضه لها وجاهة لأن السفر اتفتح و موسم الحج اشتغل. هل فيه سوء استخدام؟ الاجابة طبعا. لكن الجزم ان الصرف كله "مضاربة" او اساءة استخدام ده فيه نوع من التعميم الشديد
طيب السؤال الأهم، البند ده يمثل ايه في ميزان المدفوعات ككل؟ خليني اعمل سرد سريع لميزان المدفوعات ككل لأخر السنة المالية من بيانات النصف الاول المتاحة من المركزي عشان نشوف المنظر. (ملحوظة هامة: ده بيان مبسط جدا لاغراض الشرح و داخل فيه توقعاتي)
زي ما احنا شايفين، السفر نقطة في بحر بس يسهل السيطرة عليه. زي ما البنوك بتضغط على الفيل الكبير الي هو الاستيراد بس مشكلة الضغط على الاستيراد انه بيخلق backlog و بيعمل تضخم سعري و بيعور الدنيا جدا. لكن بند الدين هو الي مستحيل نضغط عليه عشان كدة شغالين ضغط على الجوز التانيين.
مشكلة السياسة النقدية انها بتعاني زي السياسة المالية بالضبط. وزير المالية بيحاول يعظم الايراد لانه مش عارف يضغط المصاريف. و المركزي بيحاول يقلل الدولار الخارج لانه لا يملك تعظيم الدولار الداخل من روافده الاساسية (التصدير و السياحة و الاستثمار الاجنبي). لذلك بنلف في نفس الدايرة..
المحرك الاقتصادي الاساسي - القطاع الخاص و التصدير و الاستثمار مش ملاحق على وتيرة الانفاق. فبدل ما نجيب موتور على قد العربية، بننزل الناس منها و برضه مكملين لحد اسوان بيها….كل قرار مالي او نقدي في مصر بيدور في نفس الفلك: ازاي العربية تفضل ماشية بموتور الموتوسيكل؟ الاجابة: بالزق…
عشان نقفل الموضوع خالص، ده بند الانفاق بتاع ال travel من ٢٠١٦ لسنة ٢٠٢٠. الي بيحصل فيه في المجمل مش شيء عنيف. بس هو الموتور مش مستحمل اي حد يسيب حنفية مفتوحة. من الاخر موضوع تحجيم الكروت للسياسة النقدية زيه زي ضريبة البن و السالمون للسياسة المالية. علاجات مؤقتة لمشكلة مزمنة..
جاري تحميل الاقتراحات...