بمناسبة فضل قيام الليل؛ أول مرة صليت فيها قيام الليل كانت فترة صعبة جدًا، وكنت في مرحلة كل المحيطين بيا كانوا بيشوفوا أحلامي مستحيلة.
صليت ودعيت، بعد مدة بدأت أشوف استجابة، بعدين عاهدت ربنا إن كل خير يحصلي هزود ركعتين، وبالفعل، كل ما يحصل خير أزود ركعتين.

لحد أكتر حاجة تمنيتها في حياتي، وكنت في ضيق شديد بسبب إنها بعيدة عني وخلاص كل حاجة بتؤكد إنها تلاشت، وفكرت: أنا كدة بتعامل مع الله علاقة مقايضة، لو شفت خير هشكر بس؛ لذلك قررت إني أزود ركعتين شكر لله إيمانًا بحكمته، كنت بصلي وأنا في ضيق شديد.

خلصت، قمت مسكت الموبايل؛ جتلي الرسالة اللي كنت مستنيها، ولأول مرة في حياتي أجرب الشعور ده، وحصل اللي كنت بحلم به، كنت طاير من الفرحة، وقُلت خلاص حياتي هتتحول للأحسن مليون في المية.

المرحلة دي، كان فيها أكبر ابتلاء اتعرضتله في حياتي وأصعبهم، وإن المرحلة دي مَن الله عليا فيها بفضل إدراك إن مش كل شيء بدعي به وبتمناه هو خير ليا بالضرورة.
لكن حسبتها من جانب مختلف، المرحلة دي لو مكنتش اتعرضتلها، كنت هفضل طول حياتي بعاني من اللي المرحلة دي كانت سبب في علاجه!