اسوء شي بالابتعاث انه يبعدك عن اهلك، امك، ابوك، خواتك، اخوانك…والبعد هذا مو فتره بسيطة، فترة طويلة، ٥ او ٦ سنين تمر وانت بعيد. ترجع كل سنه، تشوفهم كبروا فجأة وانت مو معهم، ماعشت معهم هالحياة اللي كبرتهم وغيرت ملامحهم، ولاضحكت معهم، ولا زعلت معهم. ترجع وتنصدم بالتغيير

تنصدم ان اخوك الصغير اللي كنت توديه البقاله اذا قعد عاقل صار يسوق، اختك اللي بالمتوسط صارت تدرس جامعة، جدتك اللي تاخذ وتعطي معك صارت تسرح كثير وفيها هدوء موب معتاد. شيب في مقدمه راس امك او ابوك ماكان موجود قبل ماتسافر.

تسافر وانت تظن انك بترجع وبتشوف كل شي زي ماكان، تظن بغباء ان الوقت عندهم بالسعودية بيوقف لين ماترجع انت، بس بعدين ترجع لهم وتستوعب ان الوقت مر عليهم، وتشوف اثار الوقت في كل شي، اهتماماتهم، سوالفهم، حتى في اشكالهم. هم مايلاحظون هالتغييرات لانهم عايشين مع بعض، بس انت تلاحظها بوضووح