الملكية الفكرية عندنا مجرد مصطلح بلا تنفيذ فعلي.. في أبحاث ومشاريع طلاب في الجامعات بتتسرق.. أفكار وتصميمات لوحات بتتسرق. روايات وسيناريوهات بتتسرق. ألحان وموسيقى وكلمات بتتسرق. للأسف الناس متعلموش معنى حقوق الملكية الفكرية، وانك لو حابب تقتبس فلازم إذن صاحب الفكرة، والإشارة له.

من مواقف الكوميديا السوداء في الموضوع ده، شاعر كان عضو في اتحاد الكتاب وتم إسقاط عضويته من النقابة بسبب ان معظم دواوينه كانت أشعار غير مشهورة لنذار قباني..
الموضوع بقى موقفش هنا.. ده حط قصيدة "إني خيرتك فاختاري" في أحد دواوينه ونسب القصيدة لنفسه.
أنا مش عارف هو كان مقتنع ازاي!

ده طبعا غير الكتب اللي بتتضرب وتتباع على الرصيف، وغيرها من الأمور اللي محدش فكر يتصدى لها.
المفروض ان الناس تتعلم معنى حقوق الملكية الفكرية، ويتعلموا ان في حدود للموضوع، وفي استئذان حتى لو هتقتبس مجرد رأي، أو تشير لصاحب الموضوع في حالة عدم توفر اتصال مباشر.

ثقافة الفهلوة وان محدش هيعرف، أو محدش هياخد باله كان زمان قوي..
دلوقتي الدنيا كلها مفتحة على بعضها، وكل حاجة متاح الوصول لها بسهولة.
التعامل بعقلية العصور القديمة ده بائس جدا، وكارثي، ودليل على انهيار حاد في المفاهيم والأخلاق وحتى مجرد الفهم العادي.
دي بديهيات مش محتاجة شرح يعني.