الأهلي قدر يصنع جيل تاريخي جديد.. جيل فيه أفضل محترف جه في تاريخ النادي.. جيل نفسه طويل جدا... قوام فيه ١٠ لاعيبه نصهم حضر ٦ نهائيات من اخر ٧ نسخ بدوري ابطال افريقيا في حدث تاريخي نادر الحدوث كثيرا...١
-الأهلي تأهل للنهائي للمرة الـ16 في التاريخ والرابعة على التوالي وده حدث بيتكرر للمرة الثانية فقط في تاريخ الأهلي بعد رباعية الجيل الذهبي مع مانويل جوزيه من 2005 إلى 2008 (4 نهائيات و3 ألقاب)ومفيش أي نادي عمله تاريخيا إلا مازيمبي في الستينات وهافيا كوناكري الغيني في السبعينات..٢
-الجيل الحالي استطاع أن يصنف نفسه كـ جيل تاريخي في الأهلي بوصوله لنهائي إفريقيا للمرة الرابعة على التوالي يبحث فيها عن لقبه الثالث في هذه الحقبة والـ11 لـ الأهلي..وصفه كـ جيل تاريخي بصناعة حدث تاريخي لم يتكرر سوى 3 مرات في التاريخ أحدهما كانت من نصيب الجيل الذهبي للأهلي...٣
-وهتفضل عظمة إنجاز هذا الجيل في الأهلي هى الاستمرارية.. استمرارية صنعها الأهلي وقدر يعمل منها قوام رئيسي عدده 10 لاعبين منهم 5 كانوا حاضرين في خسارة نهائيين متتاليين في 2017 و2018 خلاهم بقوا حاضرين في 6 نهائيات إفريقية من آخر 7 نسخ بدوري الأبطال...٤
-البداية بالأقدمية من عند السولية واللي شارك مع الأهلي في 80 مباراة بدوري الأبطال صعد فيهم لـ6 نهائيات..وبعده يجي محمد الشناوي اللي عنده رقم مميز أنه في 69 مباراة كان منهم 38 بـ شباك نظيفة وهو على أعتاب النهائي الإفريقي الخامس في تاريخه (حافظ على شباكه في أكتر من نص ماتشاته)...٥
-التالت هيجي أيمن أشرف.. ورغم أنه مشاركش في ولا دقيقة من بطولة النسخة الحالية إلا أن رصيده بـ66 مباراة منهم 5 نهائيات متقدرش أبدا تستبعده من المعادلة لأنه لسه موجود مع الفريق حتى لو على الدكة طول الوقت...٦
-الرابع محمد هاني.. 66 مباراة و6 مباريات نهائية.. مسيرة طويلة وزي ما فيها إخفاقات فيها نجاحات وإصرار يحسبله جدا.. من 2014 لحد ما بقى قائد الأهلي في نصف نهائي النسخة دي أمام الترجي..٧
-أما حسين الشحات.. فرصيده 46 مباراة وعامل فيهم 20 هدف منهم 5 النسخة دي (سجل 12 وصنع 8 منهم).. ومنتظر يلعب النهائي الرابع في مسيرته مع الأهلي..-المالي أليو ديانج.. عرفت في وقت قليل يبقى واحد من أهم لاعبي الجيل الحالي ويبقى ركيزة أساسية رصيدها 47 مباراة و4 نهائيات برضه...٨
أما ياسر إبراهيم فكفاحه في التواجد دائما واللعب بشكل أساسي والقتال على مكانه في كل وقت حاجة تحسب له جدا لأنه دايما برا الحسابات الأساسية ولكن الكورة بتجيله وهو بيديها 100%.. 40 مباراة و4 نهائيات...٩
-أفشة.. 39 مباراة منهم (8 أهداف و7 أسيست).. 4 مباراة نهائية.. واللقطة المضيئة قاضية نهائي القرن.. وبعده يجي حمدي فتحي بـ34 مباراة في انتظار مباراته النهائية الرابعة في واحدة من أقوى نسخه الفنية طوال مسيرته...١٠
-ختاما عشان لازم يبقى لوحده وياخد حقه.. لأنه الريكورد بتاعه مع الأهلي "مرعب الحقيقة".. مسيرة مبهرة جدا لواحد من أفضل المحترفين اللي شوفتهم في الكرة المصرية وقد يكون الأفضل على الإطلاق في الأهلي طوال تاريخه لأنه المثال الحي لـ عظمة الاستمرارية في العطاء...١١
علي معلول..67 مباراة.. 10 أهداف.. 22 أسيست.. بنسبة 47% من عدد مبارياته.. هيلعب النهائي رقم 6 بحثا عن لقبه التالت مع الأهلي افريقيا.. معلول أصبح النموذج الأشمل والأكثر تكاملا للمحترف التاريخي الأفضل والأكثر عطاء..١٢
ده ملخص سريع للجيل التاريخي وهو لقب مستحق عن جدارة لهؤلاء اللي نصهم بدأ بإخفاقات كتير ودلوقتي بيوصلوا للمرة الرابعة للمشهد الختامي في إفريقيا بحثا عن اللقب الثالث وكتابة تاريخ غير مسبوق ل الاهلي في افريقيا ليغرد وحيدا في القمة
جاري تحميل الاقتراحات...