رتبها

🍄 أرباحي 1000 ريال باليوم الواحد من بيع "المخلوط"
مشروب غازي + كأس ومزاز + نكهه
تجربتي المتواضعه الي تعلمت منها الكثير.

اذا اول مره تشوفني انا بن علي واحب اجرب اي شي فيه فلوس ودراهم واحب اسوي مشاريع حتى لو خسرت وفشلت اسوي تجربه ثانيه وثالثه.
وحالياً محتواي اغلبه اتكلم عن سناب شات وصناعه المحتوى بـ السناب وكيف تحقق فلوس من السناب.
اذا مهتم بالمحتوى تابع الحساب
@ibenali_1

قبل سنوات طلع كشك صغير اسمه "كيان" في عنيزه وأشتهر بالمخلوط.
ماشاء الله حقق نجاح قوي جداً لدرجه اذا تبي تطلب تجلس سرا بسياره أكثر من ٣ ساعات علشان تقدر توصل وتطلب منهم.
بعضهم يجي من برا القصيم علشانه

جتني فكره ليش مااسوي مخلوط مثل كيان واحسن منه؟
رحت أبحث بالانترنت ماحصلت نتائج الي ابيها رحت لكيان نفسه وقلت علمني كيف تسويه ومن وين تجيبون النكهات😂
قلت طيب عطني اقوى مخلوط عندك وترند وكل الناس يطلبونه.
عطاني المشروب وذقته قلت ممتاز هذا ايش نكهته؟
قالي احمر قلت ايه ايش هي؟😂
الزبده مااستفدت ولاعرفت 🏃🏻

صرت ادور بالمحلات عن النكهات الى ماحصلت محل ببريده رهيب ومنتجاته قويه.
شريت بالبدايه ٤ نكهات
-قشر البرتقال
- توت بري
-رمان
- فراوله

بعدها رحت لمحل اقتصادي ورخيص وشريت منه.
-طاوله
-سفره
-كرسي
- كاسات ومزازات وقفازات
- وعلب لثلج والليمون والنعناع والاحتياجات البسيطه.

بعدها بالاستراحه جلست أفكر كيف بسوي مخلوط أحسن من كيان؟
وجلست اجرب كل يوم اخلط بنكهات واعرف الوزنيه وصرت أولف نكهات جديده وامكسها مع بعض
وطلعت بمشروب خاص وحلو🤩
مكوناته من السفن والكودرد مع نكهه قشر البرتقال بربع ضغطه< هذي كانت الاساس مع اظافه توت بري او فراوله او رمان
ويطلع مشروب بطل🔥

اختبرت المشروب على اخوياي واهلي وقلت لهم ايهم احسن مخلوط كيان ولا مخلوطي؟
كانو يسلكون لي وقالو حلو والله🤣
الحين جاء وقت الجد اروح وابيع لناس
يابن علي وين تبيع؟
جلست ادور مكان بعنيزه حصلت أغلب الاماكن ممنوع البيع فيها او بفلوس تستأجر كشك او محل

وصلت لبريده جارتنا وحصلت حديقه تقدر تبيع فيها وبلاش جب بسطتك وبيع ومحد يكلمك 💪
وبسم الله ونتوكل على الله احمل الاغراض بددسن واوجهه لبريده وقابلني تفتيش بالخط
بعدها غيرت مساري علشان اتجنبهم علشان مامعي رخصه وقتها🚶🏻
ودخلت مع خدمه ومع حواري واحصل تفتيش ثاني بسطحاته.
وقفني وقالي حجز لسياره😭💔

قلت جاي من بعيد ومعي اغراض واترزق الله قالي النظام نظام قلت ابشر مع النظام الله يقويكم💪
نزلت اغراضي على الرصيف والددسن راحت مع السطحه.
الزبده مافيه تكاسي الشارع فاضي محد حولي جلست يمكن ساعه ونص اتصل على احد يجي لمي انا وبسطتي بشارع مهجور الى ماجاء ولد الحلال وقال خل اوصلك قلت بعيد تراه قال اركب بس

الزبده رجعت للأستراحه ومحبط وفكرت اكنسل المشروع بكبره.
طلعت الاغراض وسويت لي مخلوط علشان اروق وانسى السالفه ويوم ذقته قلت حرام الطعم هذا مايطلع لناس💔
راجعت المرور والحمد لله طلع الموتر.

وبعدها رحت للحديقه وضبطت البسطه وسويت لي مخلوط وجلست على الكرسي.
وكل من جاء قال بكم قلت له بكم تبيه انت😂
الزبده صملت على سعر ١٠ ريال بعضهم اعجبه السعر وبعضهم يقول غالي تراه عصير مايستاهل🤔
مبيعاتي كانت متواضعه🚶🏻

بعدها قلت لازم اشوف حل بالسعر واخليه مناسب للكل واحل المشكله
رحت شريت اكواب كبيره بس تشيل اقل كميه من المشروب.
وشريت اكواب صغيره.
صرت ابيع الكوب الكبير ب٨ ريال
الكوب الصغير ٤ ريال
وفيه عرض اذا شريت ٢ كوب كبير تاخذ كوب صغير بلاش👌

جيت المغرب ضبطت البسطه وصورت سنابات وكتبت الاسعار ونزلتها بالخريطه بالسناب.
بعدها انكبت علي الناس وصار فيه زحمه وضغط
كم يوم على الحال هذا وجوني المنافسين وقالو ليش أسعارك كذا؟
قلت مقتنع بسعر وربحان قالو لا تراك خسران راجع حساباتك قلت مادري والله😂

بعدها يوم شافو الزحمه عندي صارو يسألون الزباين بكم تشري النكهات ووين تنباع؟
وكنت اعلمهم، بعضهم كان فعلاً يبيها علشان جمعات الاهل او شاليه
وبعضهم صار منافس لي ووصل عدد الي يبيعون المخلوط حول ١٠ بسطات بحديقه وحده!

قلت مبيعاتي وقلت كلن بياخذ رزقه بس لازم اصير مختلف عنهم وبميزه تنافسيه.
مع العلم مازال مخلوطي الافضل بالحديقه والاقل سعر
رحت لسوق الجمله ببريده وشريت لمبات مخصصه للأكواب وكانت الفكره من احد الزباين.
رحت للمحل وسحبت الكميه كامله من عندهم علشان اضمن محد يقلد الفكره.

سويت نموذج اكواب بماء مع نكهه وحطيت اللمبات وكل كوب بلون مختلف وحطيتهم بالطاوله بالواجهه علشان اجذب كل من يخطم.
اعجبت الناس وخصوصاً البزارين وكل ماجاء بزر شرا وبعدها يجي اخوه وكل شخص راح يجيب غيره 😂
رفعت السعر الى ١٠ريال
الغيت الكوب الي ب٤ ريال لنه كان متعب وضغط علي.
المبيعات ارتفعت ونافست بقوه رغم كثره المنافسين👌

صرت اروح للمنافسين واشتري منهم واتحداهم من احسن مخلوط وكنت اكون علاقات معهم علشان اتعمق اكثر بالمهنه.
واستفدت منهم وفادوني لأمانه نصحوني بعلب افضل وصباره لثلج صغيره واشياء كثيره فادوني فيها.

ماكنت ابيع مشروب الكودرد لصغار
وكان عندي عصيرات مخصصه لهم
اي شخص صغير يبي يشتري ارجعه واقوله قل لأهلك اول.
كنت اشتغل فيها من المغرب الى الساعه ٧ الصباح

اكيد تسألون ليش تجلس لصباح؟
علشان اغلب المنافسين وقتها يقفلون بدري ويجون زوار جدد للحديقه بالصباح ومبيعات الصباح تصير أكثر من الليل🤩
واحب بدايات الصباح فيها شعور جميل🥹

من الأشياء الجميله الي شفتها 👇🏻
الي يسار الآن ماشاء الله صار فنان واسمه فيصل العتيبي ويستاهل والله👏

كان الدخل من ١٥٠ الى ١٠٠٠ ريال باليوم وأيام الويكيند هي اعلى مبيعات.
خسران أو ربحان؟ اتوقع اني خسران لنه المسافه للحديقه ٤٥ كيلو رايح و٤٥ كيلو راجع
وطبعاً خسرت باب السياره فتحت الباب وجاء شخص كبير بالعمر وشال الباب زين ماشالن معه💔
بالنسبه لددسن تراه للحين عندي لها ذكريات جميله وعشق وقصص وذكريات🥹

طبعاً استمريت بالشغله بشكل متقطع بلمواسم
وكل موسم يكون شغلي احترافي اكثر
سويت مشروب بالفواكه الطبيعيه واعجب ناس كثير بس للأمانه ربحه قليل💔
فكرت افتح فود ترك بس بعدها جت كرونا وشلت الفكره من راسي وشفتها غير مجديه

اذا استفدت او اعجبتك القصه اتمنى دعم التغريده الأولى بلايك ورتويت
اذا حصلت فيه تفاعل ببدا كل فتره اقولكم قصصي الي اغلبها فاشله😭
مشروع محل ورشه سيارات وخساره كبيره
بيع المكياج
بيع التمر
الجح
الخضره والى اخره من المشاريع.
@rattibha

اعتذر الموضوع مب مرتب وطويل حاولت اختصره قد مااقد وهذا الي طلع معي🙏
اذا اعجبكم اتمنى دعمك لتغريده بلايك ورتويت من هنا👇🏻

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد