مرحلة الجامعة تعتبر مرحلة تعليمية مهمة جدا جدا ولها أثر كبير مرة على مستقبلنا ؛ السؤال كيف نضاعف قدرتنا على التعلم في دي المرحلة ؟ راح اذكر بعض النصائح اللي بتخلي تحصيلك للعلم أفضل باذن الله ⬇️⬇️

أول حاجة لازم نعرفها إنو النجاح الأكاديمي هو دليل قوي تقدمو بكرة لما تبحث عن عمل ، يعني كل ما كان مستواك الأكاديمي بطل كل ما ارتحت في وجود وظيفة بعد التخرج (بالرغم من انو مستواك وتمكنك من بعض المهارات والخبرات يعتبر شي مهم أيضا)
فإذا عرفنا إنو النجاح الأكاديمي مهم فالشيء اللي بوصلو هنا إنو ترا لازم نجتهد ونعمل ونعطي في الجامعة أكثر من أي مرحلة قبل طيب ؟ يعني لازم نصبر على تعلمنا هذا أول شي نعرفه ؛ يقدّر المختصين أنك بحاجة إلى ساعتين إلى ثلاث ساعات مذاكرة مقابل كل ساعة محاضرة تُلقى في الجامعة لذلك حط في بالك إنك لازم تصبر وتجتهد .

النصيحة الثانية : موقفك النفسي من التعلم ؛ وحدة من أهم الأشياء اللي تضاعف قدرتك في التعلم هي وضعك النفسي تجاه دي المادة ، يعني إذا كنت حاط في بالك إنو دي المادة ما منها فائدة ففعلًا راح تواجه صعوبة في دراستها لأنك راح تمل مباشرةً منها ، فدائمًا حمّس نفسك للمادة اللي تذاكرها واقعد أتخيل قد ايش دي المادة ممكن تفيدك بحياتك لأنو اذا حسيت لها فائدة ومهمة فوقتها حتدرس بكل حماس .

النصيحة الثالثة : خليك متعلم متفاعل ؛ بمعنى إنو لا تكون مذاكرتك مملة وتقعد تقرأ المحتوى قراءة عادية ومجرد تحفظ بس ! لا أبدا لا تمشي كذا ، إذا ما حطيت طريقة مناسبة لمذاكرتك وما أثرت عقلك على المذاكرة حيكون استقبالك للمعلومات أقل من لما تكون مستخدم طريقة ذكية للمذاكرة زي مثلا تقعد تربط المواضيع بمواضيع في حياتك أو مثلا تسرد الموضوع والأسماء اللي تحفظها على شكل قصة أو تسوي مجموعة مع أصحابك للمذاكرة وزي كذا لين تحس إنك قاعد تتحمس مع المذاكرة .

النصيحة الرابعة : أشرك كل حواسك قي التعلم ؛ حوّل المعلومة لصورة ، اسمعها بأذنك ، سوي ملخص ، ناقشها مع أصحابك ، الخ.. المهم حاول تستخدم حواسك كلها .

النصيحة الخامسة : استخدم الملخصات ؛ الملخصات راح تساعدك خاصة وقت المراجعة ، غالبًا وقت المراجعة يكون قصير فانت تحتاج الملخصات والتشجيرات وقتها عشان تراجع كل اللي اخذتو في أقل وقت ممكن .