ثريد | تخصص فنون الطهي.
بدايةً وش هو تخصص فنون الطهي؟ هو دبلوم بالكلية التطبيقية بجامعة الأميرة نورة بنت عبدالرحمن، ندرس فيه الأكل بجميع انواعه نظري وعملي، الدراسة كلها بالانقليزي وطبعًا فيه مواد مشتركة، بالنسبة للقبول انا موزونتي كانت مرتفعة بس اعرف ناس موزونتهم كانت بالسبعين وانقبلوا فيه.
المقررات اللي فيه ومتعلقة بالأكل هي: مقدمة في فنون الطهي، مطبخ الافطار، مطبخ المخبوزات والحلويات، المطبخ السعودي، الخضار والحساء، المطبخ البارد، المطبخ العالمي، انتاج اللحوم
وفيه بعض المقررات الثانية اللي تفيدنا حنا كمتخصصين في مجال الطهي؛ صحة وسلامة الغذاء، التغذية وهندسة قوائم الطعام، ادارة جودة الاغذية، وشراء واستلام وتخزين الاغذية، إلخ
كيف نظام الدراسة؟ يكون فيه محاضرات عملية ومحاضرات نظرية، النظرية ندرس فيه الاكل كمعلومات تفيدنا بالعملي،ويركز اكثر على الأكل كعِلم، وزي ماذكرت سابقًا دراستنا كلها بالانقليزي، لكن الشيفز جدًا متعاونين فالأغلب مايواجه صعوبة بالفهم، الصعوبة غالبًا تكون بالاختبارات النظرية
والمحاضرات العملية تكون بالمطبخ، نطبخ الوصفة زي ماهي مذكورة وتقدرين تغيرين بعض التفاصيل حسب ذوقك ،بعضها فردي والبعض الثاني قروبات، شرط مهم وأساسي يكون عندك اليونيفورم الأبيض الخاص بالطبّاخين، جدًا جدًا ممتعة المحاضرات العملية اللي تكون بالمطبخ واجوائها مابتنسينها ابدًا ابدًا
وش نسوي بالأكل؟ ناكله او ناخذه ببوكسات، والباقي ياخذونه العاملات نهائيًا مانرمي شيء! المكونات مين يجيبها؟ الجامعة توفرها لنا طازجة بكل مره، نغسل المواعين؟ اي كل شيء نسويه بانفسنا، ندخل وناخذ المكونات نيّة، نطبخها ونقدّمها بالزينة المناسبة ناخذ الاكل وننظف كل شيء استخدمناه.
الاختبارات كيف؟ الميد يكون نظري من ٢٠ درجة، النهائي العملي ٢٠ درجة ويكون تسحبين وصفة عشوائية من اللي درستيها طول الترم وتسوينها مع قروب، الشيف بتقيمك حسب عدة اشياء مثل البرزنتيشن، الطعم، نظافة المكان خلال وبعد الطبخ، واخيرًا النهائي النظري ٤٠ درجة من المحاضرات.
هل هو سهل؟ سهل ايه بس يبي له تشدين شوي، وجدًا جدًا واضح مين الناس اللي داخلين برغبتهم واللي جايين لأنهم بكل بساطة "انقبلوا فيه" الشيفز جدًا لطيفين ومتعاونين ويحببونك اكثر بالتخصص، واخيرًا آخر ترم يكون تدريب، ولو كان وجودك له قيمته فأنتِ غالبًا بتحصلين عقد توظيف اثناء تدريبك.
وبس والله اتوقع كذا شملت كل شيء؟ لو عندكم اي سؤال الريبليز والسيسي مفتوح 🫶🏻
جاري تحميل الاقتراحات...