رتبها

مساء الخير اختارت ليكم موضوع جميل اليوم نتكلم فيه ونعرف عنه حاجات يمكن اغلبكم اول مره يسمع عنها "دولة الحشاشين"..
في البداية مهم تعرفوا ان الدولة دي كانت صاحبة اكبر تنظيم سياسي معارض في التاريخ كلة...

وهي لم تكن دولة بالمعنى الحرفي للكلمة ولكنها كانت عبارة عن تنظيمات موالية للشيعة بشكل كلي وبانتماء لا متناهي ..
الدولة دي مقرها كان في ايران في مكان اسمة آلموت وتحديدا في قلعة فوق الجبل علي ارتفاع 2100 متر
الدولة دي كانت صاحبة ملة شيعية اسمها الاثني عشرية..

واستحدثت ملة جديدة بأسم جديد اسمة النزاريين وحنتكلم بالتفصيل عنهم
واخيرا الدولة دي استطاعت انها تغير كتير من الانظمة وقتها ولها باع طويل من قوائم الاغتيالات اللي حققتها بالفعل وبعضها فشل رغم معاودة المحاولة مرات عديدة خصوصا مع رجل دولة بحجم صلاح الدين الأيوبي وحنعرف بالتفصيل..

صاحب الدولة دي ومؤسسها هو حسن الصباح
♻️مين حسن الصباح دة ؟؟...
اتولد حسن الصباح لاسرة شيعية في مدينة اسمها الري في ايران وكانت الأسرة دي شيعية اثني عشرية وانتقل إلى القاهرة سنة 471 هـ\1078م لتعلم عقائد مذهبه الجديد وهو النزارية
وهنا بيظهر اول سؤال...

انت بتقول انة انتقل لمصر عشان يتعلم المذهب الشيعي؟
يعني ترك إيران الشيعية وراح لمصر السنية عشان يتفقه ويتشيع بشكل اوسع ؟؟؟...
حقولك خد بالك انه وقتها ايران او دولة الفرس كانت سنية بشكل كبير ومصر كانت بيحكمها دولة العبيديين الفاطميين الشيعة..

فكانت مصر مرتع للشيعة الروافض من كل شكل ولون وكانت قبلة لكل الشيعة في العالم كلة بحكم ان اللي بيحكمها شيعة وقتها
اما ايران زي ماقلت فكان بيحكمها دولة السلاجقة ودي كانت دولة سنية بالكامل قلبا وقالبا
ودة اللي بيفسر لية حسن الصباح ساب ايران وانتقل علي مصر وقتها ...

أصبح نظام الملك هو الوزير القوي ورجل الدولة في دولة السلاجقة
نسيت اقول لكم ان عمر الخيام دة كان شاعر ايراني معروف جدا وقتها ولة رباعية معروفة للشعراء اسمها رباعيات الخيام ..
وحسن الصباح كذلك كان شاعر في البداية ولكن انحرف عن المسار واخد طريق تاني مختلف تماما

♻️قبل ماندخل في الاحداث عاوز اقولكم سبب تسمية الدولة دي بالحشاشين ...
في الحقيقة يعني هما كانوا لا مؤاخذة حشاشين حرفيا بس انا مش عارف ومش مذكور ازاي بدأو الموضوع دة او اكتشفوا الحشيش بس غالبا كانو عاملين مزارع فوق الجبل وعاملين دماغ أربعة وعشرين ساعة في اليوم..

المهم حسن الصباح بعد مايسلطنهم عالاخر ويتكيفوا عنب كان بيأمرهم باغتيال الشخصية المطلوب تصفيتها وكان بيقول لهم اللي حيموت فيكم مصيرة الجنان والفردوس وهو كان عامل لهم الحصن الجبلي دة علي شكل جنة كلها اشجار وازهار ومنبع مية

- فية رأي تاني بيقول ان سبب اسم الحشاشين انة مأخوذ من كلمة assassination ودي معناها القتلة واللي اطلقوا عليهم الاسم دة هما الفرنسيين تحديدا واتحرفت الكلمة واتعربت من اساسين الي حشاشين
ولكن اصحاب الراي دة هما شخصيا مش مقتنعين بية

نيجي للمهم...💥
الدولة الفاطمية في الوقت دة في مصر كانت بتعاني من مشاكل كتير جدا
فكان الخليفة وقتها المستنصر بالله وهو كان ضعيف الشخصية جدا وكان صاحب القرار الحقيقي هو أمة ...
ولكن لما الامور خرجت تماما عن سيطرة المستنصر وعن أمة كمان ودخلت مصر في فوضي حقيقية..

بسبب الشدة المستنصرية ومات تقريبا ثلث الشعب المصري في الازمة دي وزادت معدلات الجريمة والانفلات حد غير طبيعي فاضطر الخليفة المستنصر انه يرسل لبدر الدين الجمالي والي عكا وقتها وفعلا استجاب بدر الدين الجمالي لطلب الخليفة ودخل مصر بجيشة وسيطر علي الامور تماما بكل قوة..

وفرض النظام والامن واعدم عدد كبير جدا من التجار والاستغلاليين والمدسوسين وأصحاب المصالح والمنتفعين باستمرار سوء الحال
وبعد ما الامور انتظمت تماما لبدر الدين بدات صلاحيتة تكبر واصبح هو الحاكم الفعلي لمصر والمستنصر مجرد شكل مش اكتر

💥حسن الصباح كان بينة وبين بدر الدين الجمالي عداء شديد جدا ف بدر الدين الجمالي أبعدة عن القاهرة ورجع حسن لاصفهان بإيران..والكلام دة كان سنة 1081 تحديدا
ويظهر ان حسن كانت ميولة واضحة تجاة بدر الدين خصوصا لما تعرف ان بدر الدين لم يكن شيعيا ابدا ولكن هو كان ولاءة لهم فقط..

ودة اللي كان مسبب العداء بين حسن وبدر الدين
بلغت قوة بدر الجمالي أنه عهد بالوزارة لابنه الأفضل شاهنشاه واللي كان بيشارك ابوة في أعمال الوزارة فلما توفي بدر في جمادى الأولى (487 هـ =1094 م) خلفه ابنه في الوزارة وطبعا الخليفة وافق

ولكن في نفس السنة اللي مات فيها بدر الدين مات فيها المستنصر بالله في ديسمبر 1094م بعد ماحكم مصر 60سنة
✴الخليفة المستنصر كان عندة اولاد وكان ابنة البكر اسمة نزار المصطفي لدين الله وكان المستنصر طلب تعيينة الخليفة بعد موتة
ولكن...الوزير الأفضل ابن بدر الدين الجمالي رفض ان..

نزار يكون هو الخليفة القادم وقال الخليفة حيكون أحمد الأخ غير الشقيق لنزار وكان اسمة أحمد المستعلي بالله(ودة كان رأي ابوة بدر الدين الجمالي قبل مايموت)
طيب لية الأفضل عاوز ينصب أحمد خليفة للبلاد؟
عشان أحمد يبقي بن اخت الوزير الأفضل واللي هي تبقي بنت بدر الدين الجمالي الوزير القوي

وبالفعل تم تنصيب أحمد المستعلي بالله خليفة للبلاد والعباد وطبعا كان أحمد معتمد اعتماد كلي علي خالة الوزير القوي "الأفضل"
الامير نزار المخلوع عرف بالحكاية ..يسكت؟؟ ودي تيجي!!
في الاول هرب علي اسكندرية وأعلن من هناك الثورة وحققت الثورة نجاح كبير فعلا..

وتقدمت قوات نزار وقاربت علي مشارف القاهرة واتقابل مع قوات الوزير الأفضل واتعرض لهزيمة تقيلة جدا واتأسر نزار واتسجن واتقتل
الخليفة المستنصر قبل مايموت كان قال لحسن الصباح ان الخليفة من بعدي هو نزار ...
فا بعد موت نزار حسن الصباح يسكت؟؟ لأ برضة..

حسن حمل لواء قضية نزار ولكن من قلب قلعتة في آلموت في ايران وقطع علاقتة تماما بالخليفة الجديد أحمد المستعلي بالله واعتبرة غاصب للخلافة وبايع حسن الصباح نزار مع انة مات خلاص وبايع من بعدة ابنة الهادي واتبعهم كل الاسماعيليين في ايران وبايعوا نزار وابنه الهادي..

ومن هنا بدأت التسمية بالطائفة الإسماعيلية النزارية
💥وتدور الايام ويبدأ الحشاشين في وضع قوائم الاغتيالات واللي كان لازم يتم تنفيذها وبالفعل ماينساش حسن الصباح الثأر مع الوزير الأفضل وينتقم لمقتل نزار ويتم اغتيال الوزير الأفضل سنة 1121م ....

وحيبدأ اللعب التقيل في قائمة الاغتيالات وحيتقتل وزير دولة السلاجقة السنية وحيتقتل الخليفة الفاطمي شخصيا بس مش المستعلي بالله ..لأ دة حيقتل الخليفة الآمر بأحكام الله في القاهرة بمعرفة عشرة حشاشين متسلطنين اخر سلطنة..

وكفايه عليكم كدا انهارده ونكمل الجزء التاني بكره ان شاء
المراجع
الكامل فى التاريخ لابن الاثير
حركة الحشاشين ؛ محمد عثمان الخشت
تاريخ الزنج والقرامطة والحشاشين : محمد سهيل قطوش
تاريخ فاتح العالم : جهاز كشاى : ترجمة من الفارسية محمد السعيد
✍️محمد عزيز

دولة الحشاشين2
قبل ما نبدأ قائمة الاغتيالات والتى لن يسعها سرد كلها لانهم كتير جدا ولكن من خط سير عمليات التصفية الجسدية نستطيع القول أنهم استهدفوا كل ماهو سني وكان هدفهم هدم السنه الصحيحة باي شكل وهدم دولة السلاجقة لانها معقل السنة وقتها من اساسها عن طريق قتل امرائها وملوكها..

لكن أولا أريد اخباركم بطريقة تفكيرهم ..فمن غرائبهم ان حسن الصباح لما بدات دولتة تكبر فوق الجبل وبني قلعة وحدائق مابين جبلين وجدول بينهم نهر واحضر لهم جواري وغلمان يخدموهم وطبعا مع الحشيش بقي فكانت الدنيا زي الفل ...

المهم ...ان حسن الصباح أسقط الشرائع والفروض
يعني حصل مثلا يوم 17 رمضان انه جة في نهار رمضان وفرش الذ المأكولات والمشاريب وقال للناس وهم صائمين كلوا واشربوا وافرحوا واستأنف مستشهدا لهم بالحديث النبوي “كلكم راع وكلكم مسئول عن رعيته”...

فهو مسئول عنهم باعتباره قائمًا مقام الإمام والمسئول عنهم يوم القيامة ..حاجة لوز يعني
وراح قال لهم أن الدين انتهى حكمه واستوفى غرضه والأسرار الخفية قد كشفت وانت ارسال التعليمات إلى باقي القلاع..

وبالطبع اتباعة الحشاشين مع النعيم اللي عايشين فية مع الجواري والغلمان الخدم والحشيش وكمان مفيش صوم خلاص فالموضوع كان علي هواهم وحاجة عنب يعني
💥نيجي للمهم بقي...
اتكلمنا عن اول عملية تصفية وكانت للوزير الأفضل ابن بدر الدين الجمالي

العملية التانية كانت قتل نظام الملك الايراني السني وهو كان الوزير القوي لدولة السلاجقة في عهد ألب أرسلان وبعد مقتل ألب أرسلان تولي الامر ابنة الأمير ملك شاة
حصلت حالة من العداوة مابين نظام الملك وبين حسن الصباح بعد ماكانوا اصدقاء شباب ...لية؟؟؟

لان نظام الملك أصبح وزير للسلطان السلجوقي السني “ألب أرسلان” وابنه “ملك شاه” من بعدة
وطبعا حصل صراع مابين الحشاشين وبين الدولة السلجوقية المسيطرة على كل الأراضي من حول قلاع الحشاشين- فكان لازم يتم التخلص من قلب السلاجقة والمحرك الفعلي لها وهو نظام الملك واتقتل فعلا نظام الملك..

وحضر ساعة موتة السلطان ملك شاة وقال للسلطان انا عفوت عن قاتلي وقال الشهادة ومات ...
الراجل دة هو اللي أسس اول مدرسة نظامية حقيقية واللي حيتخرج منها ابطال ....وقدر انة يدمج العسكرية بالعقيدة الاسلامية الصحيحة ...

ومن اللي تتلمذوا في المدرسة دي عماد الدين زنكي ونور الدين محمود استاذ صلاح الدين الأيوبي واسد الدين شيركوة عن صلاح الدين ومودود اللي حيتقتل علي ايدين الحشاشين
المهم بعد مقتل نظام الملك 3 اسابيع تقريبا بيقدر واحد من الحشاشين انة يوصل لملك شاة السلطان السلجوقي شخصيا ويقتلوة هو كمان

يعني واضح اوي أنهم كانوا بيقتلوا كل رؤوس السلطة السلجوقية ودة لان السلاجقة كانت مسيطرة علي ايران تماما وايران وقتها طبعا كانت سنة..
💥نيجي لقتل الخليفة الآمر بأحكام الله الفاطمي
بيقولك ان الآمر وهو راكب علي الجمل وبيتمشي مابين القاهرة والجزيرة هاجمته جماعة مسلحة بالسيوف..

وكان عددها بعشرة افراد وكانو شاربين الخشخاش اللي في المزرعة كله
المقريزي قال انهم جماعة تابعين للنزارية وقتلوا بغرض الانتقام ..
لية؟؟؟
عشان الامر باحكام الله دة يبقي ابن الخليفة المستعلي بالله احمد حفيد بدر الدين الجمالي..

واللي النزاريين الحشاشين شايفين انة اغتصب السلطة من نزار بس طبعا مش دي مشكلتهم ولكن مشكلتهم ان المستعلي كانت جذورة سنية ودة خطر علي الاسماعيليين والنزاريين وكل الشيعة عموما
المهم انه بسبب الخلاف دة اتقتل الآمر يوم 7 اكتوبر 1130م

💥امير الموصل مودود بن التونتكين...الراجل دة كان أمير الموصل وهو من الشخصيات التاريخية اللي حاربت الصليبيين وكان سني برضة ...سافر لدمشق وقرر انة يقعد فيها فترة طول الشتاء عشان يقدر يجمع جيوش جديدة عشان يصد هجمات الصليبيين وفي يوم دخل إلى مسجد دمشق الكبير عشان يصلي وكان صايم..

ولما خلصوا الصلاة وخرج ممدود لصحن المسجد وفجأة طلع عليه واحد من الحشاشين فضربة اربع ضربات بالسكينة...
واتمسك الحشاس دة وانقطعت رقبته فورا واتحرقت ...اللي هو خلاص بقي عرفنا تمامكم وقرفنا منكم ..

المهم ...روحو علي البيت وحاولوا يفطروا مودود فرفض تماما وقال:
لا لقيت الله الا صائما ..ومات فعلا في نفس اليوم
رحمه الله عليه...
اللي جاي بقي محاولة قتل صلاح الدين الأيوبي 3 محاولات وباعجوبة بينجوا منها صلاح الدين ....
وحيغضب وحيعلمهم الادب.
مش حتاخر عليكم 😊

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة