المبتعث الكلاسيكي،مصطلح يطلق على المبتعث الذي لا يزال تحت تأثير قصص وحكايات الجيل القديم(مبتعثين الثمانينيات) والذي يتحدث كانه بروفيسور وهو لا يزال طالب ماجستير، مبهور بالغرب وفي نفس الوقت يحاول انتقاد كل شيء، حاول تسمع منه غالبا عنده نظريات غريبه وجيدة.
المبتعث الخبرة، يطلق على المبتعث الذي يعرف سعر الصرف قبل ما تعلنه وزارة المالية، خبير في كيفية الحصول على كل المكافئات، يعرف كل من في الملحقية لكثرة زياراته المتكررة، غالبا عند سيارة عائلية وعنده مشاكل مع شركة التأمين وصاحب العمارة اللي ساكن فيها، لازم تتعرف على واحد مثله
المبتعث المخضرم، درس في أكثر من بلد، دائما يحسسك ان تجربتك ناقصة والبلد اللي كان فيها أفضل من هذه، يركز على العيوب اكثر من الإجابيات، يعتقد انه ختم كل شي، لا تأخذ كلامه بحساسية تراه مو قادر يتاقلم
المبتعث العمده، على الورق هوا خارج السعودية لكن قلبه هناك، كريم ومضياف، لا يجرب اي شي جديد مستحيل ياكل غير رز او مشاوي، حتى المجلس شحنة من السعودية. لو في يوم تبغى مطعم عربي هم افضل ناس تسألهم، في الغالب صحبتهم ١٠/١٠ 👌
المبتعث العلقة، هو الذي يبتعث لدراسة درجة علمية معينة ويحصل عليها بطرق ملتوية، يدفع لشخص ليكتب له اطروحته او يقوم عن بعمل مشروعة، وللاسف بطريقة او بآخرى يحصل على الشهادة، مستحيل يتكلم عن تخصصة لانه مايعرفه اصلا، الحمدلله انهم قليل
المبتعث الكيوت، اول ما يوصل يعتقد انه من مواليد جلاسكو ويحاول يتكلم بأكسينت وهوا لو راح ستاربكس مايعرف يطلب، بعد فتره يخف الاكسينت ويندمج بس يظل يحن الى مسقط رأسه (اسكتلاندا).
المبتعث المثالي،في الحقيقة هو شخص جيد، لكن في منصات التواصل الاجتماعي يدعي المثاليه في كل شيء ويبث الايجابية السامه في كل مكان، خبير في التنظير، سوي له Mute في تويتر وارتاح
المبتعث الدراما، عنده احساس دائم بالغربة، ينتهز الفرصة علشان يتحلطم ويقول انه الحياة والدراسة صعبة، لو جاته كحة سوا ثرد يتكلم فيه كيف هزم كل التحديات، دائما متواجد في المقاهي ليصور القهوة السوداء علشان ينزلها في الانستجرام، جيدين جدا في الPR بالذات في تويتر.
المبتعث العلة، شخص يعتقد انه هبة من الله لكل من في الارض، مايعرف يستخدم booking ولا Uber، عنده حساسية من Google لو يبغى يستعمل المصعد سأل في جروب الاستفسارات. لما تتعامل معاه لا تعطيه سمكه بل علمه كيف يصطاد
المبتعث الاسطورة، شخص يحب شغله غير مهتم بالترويج لنفسه الا في المكان الصح، غالبا عنده متلازمة المحتال، مع انه ناشر في سيل او نيتشر، لما تتعرف عليهم صاحبهم، فصحبتهم مكسب، فالمستقبل امامهم كبير.
هل لقيت نفسك في احدهم؟ هل في نوعيات ثانيه؟ انا مين فيهم😂؟
جاري تحميل الاقتراحات...