الفكرة مو انك تتعامل مع نرجسي ولا توكسيك ولا عفريت ازرق ، الفكرة فهمك لنفسك انت واحترامك لها : اللي يحترم نفسه ما حيرمي نفسه في علاقة فيها عنف نفسي ( تهديد بالترك ، الغياب المتقطع ( اللي عاملين نفسهم اشباح)، اللي يعاقب بالصمت ( بالشهور وهو في نفس البيت لحد ماتتكلم الجدران معاك)
ولا عنف جسدي ( الموضوع دا مافيه لعب نهائي) لانه تهديد على الحياة، وسلوك اجرامي يعاقب عليه القانون، ولا عنف لفظي ( تريقة على شكلك ولا لبسك ولا طريقة كلامك ولا منازلة بالالفاظ)
ولا عنف مادي ( استغلال العلاقة لفرض متطلبات والتزامات مالية لاتخصك او تحمل مسؤوليات واعباء مادية لوحدك)
كل ذول لقيوا منفذ كبير اسمه ( انا شايف حجمي قد ايش ؟ مستهين بنفسي ؟ شايف اني المفروض اقبل واحمد ربي ماحد حيشوفني غيره ؟ ولا شايف انه انا استاهل اتعامل كذا لاني ( غلطت ونوتي ولازم اتربى من اول وجديد وذا شااائع) ؟ ولا شايف انه ذا الطبيعي وكل الناس كذا
( وجملة كل الناس يعني مجتمعي اللي انا جاية منه مش المجتمع الاكبر، العينة اللي حواليا اللي عندهم قلّة القيمة طبيعي مش الحقيقي) ذا مبرر نديه لنفسنا لما نكون لسه في حالة صدمة وعدم قدرة على التمييز
الصورة بالنسبة لنا مشوهة ولا احنا فاهمين وللاسف المصيبة انه في ناس ثانية حوالينا عندهم برضه نفس الامتهان الذاتي ذا يخربوا الدنيا بأن ذا الطبيعي والعادي
طيب نخرج كيف من المطبّ الفكري ذا ؟ اولا بالعلم نقرأ ونطلع ونفهم احنا مين؟ ويعني ايش علاقة صحية ؟ وانا اهدافي مع اي شخص حولي ايش ؟ ايش نوع العلاقة اللي ابغاها معاه؟ وهل شايفة نفسي سعيدة في نوع وحجم العلاقة ؟ يعني مشبعة وراضية ؟ قادرة اتكلم عن اللي احسه والقى سمع؟
ذي الاسئلة للاثنين ان كان راجل ولا ست ولاي نوع علاقة موجودة في حياتك ، من حقك تعيد تقييم مكانك فين وترسم حدودك وتقيم انت حنقدّم من ناحيتك ايش للاستثمار في العلاقة هذه ؟ ومستني ايش ؟ وهل قلت اللي مستنيه منه ولا حضرتك مستني انه ربنا يوحي له ؟
كل ما ناخذ وقت مع نفسنا نفكر كل ماحنفهم ونقيم و لو غلبنا واحترنا ناخذ بعضنا ونروح لمعالج ، ونقرأ ونتعلم ونطلب دعم من اللي حوالينا ووقتها ولا نرجسي ولا نرجوسة ولا جني حيعرف ياخذ منا اللي احنا رافضينه وحنمشي في سلام نفسي مع انفسنا وننام واحنا مرتاحين
من سجن ( الابتزاز العاطفي والنفسي) اللي حبسنا نفسنا فيه سنين ، مستمتعين بطعم ( الحرية النفسية ) .
جاري تحميل الاقتراحات...