مرحبا، هاد الثريد عن (تجربتي الشخصية) بايطاليا، ابتداءً من إصدار فيزا الشنجن ومن ثم السفر وصور وفيديوهات بديعة حقيقية من تصويري. مبدئياً في جانبين سافرت لايطاليا عشانهم؛ الثقافة والطبيعة، وايطاليا بتتميز بالثنين. بالله عليكم ما تخلوا صور البندقية تقلب رايكم عن ايطاليا😔♥️
أولاً، بالنسبة للشنجن اذا انت بتشتغل بشركة وراتبك بنزل على البنك بشكل شهري، وعملت كل اشي بطريقة صحيحة مافي أي مانع أو صعوبات إنك تطلع شنجن. كل اللي عليك تعمله تعبي هاد الفورم بدون كذب وتأليف، وبتطلعلك الفيزا خلال فترة لا تتجاوز ٢١ يوم. المهتم بالموضوع يبعثلي وبساعده بكل اشي..
طبعاً لما تقدم على شنجن، لازم تكون حاجز تذاكر طيران ذهاب وعودة وفندق للسكن بالشنجن، أغلب الناس بحجزوا حجوزات وهمية، بس أنا صراحة حجزت حجوزات حقيقية لإنه ليش حيرفضوني ما دام كل أموري سليمة ومافي لف ودوران؟ أهم اشي تكون عامل مخطط سفر وعارف وين حتسكن بكل يوم موجود فيه بالشنجن
حجزت تذاكر طيران كالتالي: عمان-بولونا، نابولي-بودابست (هنجاريا)، بودابست-عمان. حتسألوني ليش حجزت من بودابست، أولاً كنت حابب أزور بودابست برضو، ثانياً كانت أرخص من إني أرجع على عمان من ايطاليا🙏🏻
ما كان عندي اهتمام أعمل اشي ب بولونا، ف كنت حاجز قطار دايركت بعد وصولي من بولونا لفلورنسا من محطة قطار Calderara Bargellino الموجودة بجنب مطار بولونا. استخدمت هاد التطبيق اسمه Omio، بعطيك خيارات السفر بين أي مكانين بأوروبا عن طريق القطارات/الطيران/التكاسي/السفن/الباصات.
أني وايز، وصلت فلورنسا عاصمة الفن والثقافة، مدينة دانتي وداڤنشي وڤساري. وصراحة فلورنسا من وجهة نظري هي أفضل مدينة بايطاليا، بسيطة جداً وناسها بسطاء، رخيصة من جميع النواحي، الفنون والتاريخ بتلاقيها وين ما تتطلع، وكانت تجربة رائعة راح أكررها بإذن الله.
فلورنسا يمكن ما تعجب الجميع، بس اللي لعب Assassins Creed حتعجبه، اللي بعرف دان براون حيموت عليها، اللي بحب فن مايكل انجلو ودوناتيلو حيشوفها رائعة، غير هيك بشوفها بايخة ومملة، شوارعها ضيقة والتحرك فيها بكون على الأقدام وكلها أزقة. أنا صراحة تركت قطعة من قلبي بفلورنسا😔
بعدين أخذت قطار من فلورنسا لروما، وروما كانت تجربة خرافية صراحة، مكس الحضارة بالتراث، الأناقة والهيبة مع التاريخ، عاصمة تاريخية وحضارية بنفس الوقت. روما فرجتني طباع الطليان الحقيقية؛ البساطة. *ماي ڤيو من القطار طول المسافة
أول اشي كنت حابب أشوفه بروما كونه بيرنيني هو نحاتي المُفضل هو تمثال The Ecstasy of Saint Teresa اللي للصدفة كان بعيد عن الفندق حوالي ٣٠٠ متر😂
قعدت يومين بروما، اليوم الأول خصصته لروما، اليوم الثاني خصصته للفاتيكان (اذا ما بتعرفوا إنه الفاتيكان هو دولة بحد ذاتها موجودة جوا روما). روما بتجنن ولا أخفيكم، أنا بكيت بروما لسبب ما ما راح أقدر أحكيه، ولكن بتمنى بيوم إني أرجع عليها وأضحك بنفس المكان اللي بكيت فيه😔
ثاني يوم رحت الفاتيكان، صراحة شيء فوق الخيال، كمية الفن اللي ممكن تطلع من الإنسان غير معقولة، حرفياً وين ما تلف بوجهك في شغلات حلوة تتطلع عليها. قدرت إني أطلع على قبة St. Peter Basilica ويا جماعة منظر روما من فوق خرافيي🥹🥹
طبعاً الفاتيكان كله بجهة، والSistine Chapel بجهة أخرى خالص، للأسف التصوير كان ممنوع فيها بعرفش ليش، بس قدرت أسرق كم صورة بالعقل. إبداع مايكل انجلو كله يتجلى بسقف السيستين😔😔♥️♥️♥️♥️
بعد ما شفت سقف السيستين شابيل، وشفت عجائب بيرنيني، قلت خلص كفاية من الفنون والتاريخ، حان الآن وقت الطبيعة. أخذت قطار من روما لنابولي ومن نابولي لساليرنو، وعبّارة من ساليرنو للأمالفي (اللي بعرفني من زمان بعرف إنه حلم حياتي كان أشرب شاي بالأمالفي)
حخلي الفيديوهات تحكي مش ححكي اشي🥹
Check my location before I travelled😇😇
قضيت اليوم للغروب ب بوسيتانو أمالفي كونها معلم سياحي وغالية جداً جداً وفنادقها غالية، بس كون ذكي واحجز بساليرنو اللي رخيصة جداً وبعيدة عنها بس نص ساعة بالعبّارة واكسب رحلة بحرية من العمر😏
المهم بعد الأمالفي بيوم، رجعت على نابولي وأخذت طيارة من نابولي لبوادبست وقضيت هناك ٣ أيام رائعات برضو. اللي بدي أحكيه يا جماعة ايطاليا بتجنن وطبعاً ما أوفيتها حقها بزيارتي وطبعاً في زيارات ثانية حتكون بالمستقبل ان شاء الله. لسا في صقلية وكومو وتورينو وميلان وكثير أماكن ما رحتها😔
أموت باللغة بفيديو القطار😔♥️
جاري تحميل الاقتراحات...