مش عارف ايه مناسبة فتح الكلام من جديد على مشروعات الجيش بالتواكب مع أحداث السودان؟!!
طب بص ياحبيبى منك له لها..
جيشنا لازم يكون أقوى جيش فى المنطقة الموبوءة دى..ولازم يكون مسلح بأحدث الأسلحة..وميزانية بلدنا بعافية..تحبوا نعمل ايه؟!
الجيش بيصرف على نفسه وعلى الدولة من المشروعات دى

مشروعات الجيش بدأت مع بيع آخر مصنع أسمنت تملكه الدولة فى عهد اللى مايتسمى مبارك..
وده اللى أزعج المشير طنطاوى..وقال ماينفعش الجيش يحتاج اسمنت ويبقى تحت رحمة القطاع الخاص..فبدأ بإنشاء أول مصنع أسمنت وتوالت المشروعات..
وياما الجيش سد عجز موازنة الدولة أيام مبارك بس حضراتكم ماتعرفوش

ضباط الجيش كانوا بيقبضوا نص مرتباتهم لمدة عشرين سنة عشان يوفر لميزانية الدولة بس حضراتكم برضه ماتعرفوش..
لكن طبعا عصابة الاخوان فهموكم ان ضباط الجيش و قادته دول مليونيرات و واكلين خير البلد (اللى هو معرفش فين ده) فى كروشهم..
والحقيقة انهم كانوا عايشين بمساعدات اهاليهم وبالأقساط..

واللى عنده أخ أو إبن أو أب ضابط فى الجيش هما بس اللى عارفين كده...لأن حتى لو ابن عمك ضابط عمره ما حايشتكى قصادك لأن عندهم عزة نفس وعندهم حرص كبير على صورة جيش بلدهم.
فاللى مش عاجبه مشروعات الجيش يولع بجاز.
ده قوة مضافة للبلد مش إضعاف لها.

البلد اللى جيشها خِرع بتداس بالجزم..وبيتلطشلها من طوب الأرض من كل من هب ودب.
والضباع قاعدين منتظرين اللحظة دى.
فشيلوا مشروعات الجيش دى من دماغكم عشان ما تبقوش مداس للرعاع.
كل مشكلة و أزمة لها حل ونقعد جوه بلدنا نتخانق عليها براحتنا.
بس جوه بلدنا مش فى خيم على حدود دول مش حاتعبرنا