رتبها

تعرفوا ليه الأمريكان اختاروا هيروشيما ونجازاكي تحديدا مش أي مدينة كبيرة زي طوكيو و أوساكا مثلا ؟
السبب مرعب و سودواي اكتر من القنبلة النووية نفسها

بحلول١٩٤٥ كانت المعارك البحرية الكبيرة في المحيط الهادي انتهت والبحرية اليابانية تقريبا اتدمرت بالكامل وبدأت المعركة للسيطرة على الجزر اليابانية
هنا اليابانيين طوروا اسلوب دفاع جديد عن الجزر وهو استدراج الأمريكان لداخل الجزيرة والدفاع عنها عن طريق شبكات من الأنفاق وكان الهدف ...

وكان الهدف بسيط
احنا عارفين ان الجزيرة كده كده هتسقط بس هدفنا هو اسقاط اكبر عدد ممكن من القتلى الأمريكان في خلال أطول فترة ممكنة على أساس ان دي دولة ديمقراطية وبالتالي الشعب هيضغط على حكومته وينهي الحرب
وقد كان
في معركة اوكيناوا وهي اول جزيرة يابانية تسقط قتل حوالي ٨٠٠٠ امريكي..

ده خلق صدمة في واشنطن بسبب العدد الهائل المتوقع للقتلى الأمريكان من أجل هزيمة اليابان اللي وصلت بيه بعض التقديرات ل٢ مليون قتيل
بس كان فيه حل
مشروع مانهاتن اتصرف عليه ٢ مليار دولار ودلوقتي عنده نموذج ناجح لقنبلة محتاجين نجربه في الميدان
بس ايه هو الهدف ؟...

في النهاية قرروا يعملوا لجنة لإختيار الهدف للقنبلة
مجموعة من الناس هيتجمعوا مع بعض ويعملوا brain storming
على أي أساس هيختاروا الهدف؟
الحقيقة ان محاضر الإجتماعات متاحة
فاحنا عارفين هما بيتكلموا عن ايه
قرروا ان الهدف هيكون مدينة فيها منطقة سكنية كبيرة ولها قيمة إستراتيجية عالية..

لما طبقوا المعايير دي طلعوا بقايمة فيها ١٧ مدينة
في أولها طوكيو وكيوتو اللي هي المركز الثقافي لليابان وفيها هيروشيما وفي الآخر نجازاكي
بس بعد شوية اجتماعات استقروا على ٤ مدن
هيروشيما
كوكورا
نيجاتي
نجازاكي
طيب طوكيو وباقي المدن راحت فين ؟
محتاجين نتكلم الأول عن درسدن - المانيا...

درسدن هي مركز ثقافي كبير في أوروبا وفيها مباني تاريخية كتير من مختلف العصور
الشيء المشترك بينها إن كلها fake
المدينة زيها زي كتير من المدن الألمانية اتحرقت بالكامل في الحرب عن طريق ما يعرف بال firebombs وأعيد بنائها من أول وجديد ...

في بداية الحرب كانت إحصائيات سلاح الجو البريطاني بتقول ان ٢٥% من القنابل بتسقط في نطاق ٨ كيلو او اقل من هدفها وبالتالي تأثير الغارات الجوية البريطانية كان شبه معدوم
طيب ايه البديل؟
لجأوا لقصف مدن كاملة بدلا عن قصف أهداف محدده
وده كان الهدف زي ما قال جنرال اسمه ارثر هاريس ...

وبالتالي الضحايا المدنيين مش مجرد اضرار جانبية مؤسفه بل اصبحوا هم الهدف
ودي خريطة بتوضح نتيجة القصف ده على المدن الألمانية بالأسود
طيب إيه علاقة ألمانيا بطوكيو؟
الحقيقة ان الأمريكان كان عندهم نفس الفكرة
قصف المدنيين اليابانيين هيجبر اليابان على الإستسلام

هنا محتاجين نتكلم عن الfirebombs
دي لم تكن متفجرات عادية بل كانت قنابل تحتوي على النابلم الهدف منها هو اشعال حرائق لأيام
وتم تصميمها خصيصا بناء على دراسات اتعملت على البيوت اليابانية و الألمانية درست تصميم المباني وتوزيع الأثاث ونسبة الرطوبة في الخشب
الموضوع كان مخطط له بعناية..

مع بداية ١٩٤٤ الامريكان بدأو يقصفوا المدن اليابانية بكثافة وتأثير ده على اليابان كان أسوأ بكتير من تأثيره على ألمانيا بسبب ان اغلب البيوت اليابانية كانت مصنوعة من الخشب والورق
وفي مارس سنة ٤٥ مئات القاذفات الأمريكية قصفت طوكيو وقتلت ١٠٠٠٠٠ شخص
اكبر عدد ضحايا لغارة جوية في التاريخ

بحلول صيف عام ٤٥ طوكيو كانت اختفت من الوجود
فاكرين الشباب اللي كانوا بيعملوا brain storming؟
هما كانوا شايفين كل ده بيحصل
كانوا محتاجين مدينة سليمة علشان يختبروا القدرة التدميرية للسلاح الجديد بس سلاح الجو كان بيدمر المدن في القايمة بتاعتهم واحده ورا التانية ....

ده السبب لعدم استخدام السلاح النووي على المدن دي
في النهاية اللجنة كانت مضطره تتوسل لسلاح الجو علشان يوفر الأهداف والموضوع اتحل عن طريق وزير الحرب الأمريكي وقتها هنري ستمبسون
سلاح الجو الامريكي قصف ودمر ٩٦ مدينة يابانية مختلفة وقتل حوالي نص مليون مدني وشرد حوالي ١٥ مليون.

ال firebombing ده كان أسوء بكتير من السلاح النووي بس في رأيي ان محدش مهتم بيه علشان الطريقة اللي بيكتب بيها التاريخ
ده كان مجرد business as usual مش حاجه مثيرة للإهتمام زي السلاح النووي

blog.nuclearsecrecy.com
youtu.be
youtu.be
doug-long.com
iwm.org.uk

blog.nuclearsecrecy.com/2013/08/30/who…