رتبها

وسائل التواصل الاجتماعي والتلفزيون حالياً ممكن تسبب ضرر نفسي ضخم
ودا ثريد عنها
_
التعرض الطويل للمحتوى المؤذي نفسيا ( فيديوهات القتل والجثث واصوات الصراخ والانفجارات ) في وسائل التواصل الاجتماعي طبيعي كبشر نتأثر بيها
اول شي لقسوة الاحداث ، وتاني شي لأنها بتحصل لناس مننا وفينا

التأثر بستمر من دقائق لي ساعات او ممكن لمدة عدة ايام كتفاعل نفسي طبيعي مع الحدث
بس لو اتجاوز الفترة دي ( اسبوعين او اكتر ) او كان حاد شديد اثناء الفترة دي هنا الموضوع بكون اتجاوز ردة الفعل الطبيعية وبقا اضطراب

المحتويات دي ممكن يكون عندها ضرر نفسي يتجاوز قدرة الانسان على التجاوز ، يتدرج من شعور لحظي بالحزن والتوتر والخوف واضطرابات في النوم وكوابيس ، لحدي يصل لي توتر مزمن و اكتئاب او حتى اضطراب ما بعد الصدمة او ممكن تزيد حالة اي شخص مشخص بي اضطراب نفسي سوءاً

الثريد مخصص للاعراض البتجي من التعرض " الغير مباشر " للأحداث الصعبة وتحديداً للفيديوهات او الصور او حتى الشوف بالعين قدامك او الانغماس الشديد في تفاصيل الحرب ، الاضطرابات دي نفسها ممكن تجي بسبب التعرض المباشر للصدمات او الظروف الحياتية الصعبة ،و هنا للوعي بيها بس ما للتشخيص

بعض الاضطرابات الممكن تحصل بي سبب التعرض الكتير والطويل للمحتوى المؤذي نفسيا ( فيديو / صورة )
- قلق او توتر :
. بظهرو في شكل زيادة في ضربات القلب او الم في الصدر
. احساس بالشحتفة او عدم الراحة
. رجفة في الجسم
. شد في العضلات
. ارهاق زايد

. اضطرابات في النوم
. زيادة في ضغط الدم
. نقصان شهية ، الم واضطرابات في المعدة ، وعسر هضم
. نقصان مناعة ( بظهر في كثرة الاصابة بالعدوى والامراض الجسدية )

- نوبات الهلع:
. هي حالة خوفة فجائية صعبة جداً بتتملك الانسان
. اضافة لأعراض التوتر الحاد:
. بكون فيها تسارع في التنفس وضربات القلب، والتعرق واحساس بالاختناق
. احساس كأنك حتموت اسي
. الخوف من فقدان السيطرة او الجنون
وبتستمر النوبة مدة اقل من ٤٠ دقيقة وبتروح وممكن تتكرر

- اكتئاب :
. احساس بالحزن الشديد وفقدان الامل والذنب
. عدم القدرة على الاحساس بالمتعة
. عدم الاهتمام بأي شي بحصل حولك
. صعوبات في التركيز
. الانفعال والانزعاج بي سرعة
. نقصان حاد او زيادة مفرطة في الاكل والنوم
. التفكير بالموت او محاولة ايذاء النفس

- الصدمات الغير مباشرة / Vicarious traumatization :
ودي بتحصل اكتر بعد التعرض المستمر لمحتوى تعذيب او قتل والتعاطف الشديد مع الضحايا او الواحد يقرا كتير عن قصة قتل شهيد معين ويعرف تفاصيل حياته وينغمس عاطفيا مع القصة او يحاول يساعد بس ما يقدر

. صعوبة التحكم في المشاعر
. الاحساس بالخدر العاطفي
. التعب والاحساس بالنعاس الدائم ( مع اضطرابات في النوم )
. التشتت الذهني او السرحان
. فقدان معنى الحياة او فقدان الامل
. مشاكل في علاقات الشخص الاجتماعية ( الانسحاب من المجتمع ) وعدم المشاركة في النشاطات

. الاحساس المستمر بالغضب او الحزن والأسى للضحية والظلم الاتعرض ليهو ، ممكن الواحد يبقى عدائي برضو
. ممارسة افعال او نشاطات خطرة او تعاطي المخدرات
. الانغماس العاطفي الشديد مع الضحايا والتفكير فيهم طول اليوم
. الشعور بالندم او الخزي وضعف الحيلة ( لأنه الواحد ما قدر يمنع الموت )

- الاحتراق النفسي / Burnout بتشارك بعض اعراض الصدمات الغير مباشرة زائد :
. الاحساس بالضعف والفشل والشكوك في الذات او الاحساس بالهزيمة
. الاحساس بالوحدة في العالم
. فقدان الحافز للقيام بالنشاطات العادية او الوظيفية
. البعد الكامل عن استخدام وسائل التواصل الاجتماعي حتى للعمل

- تعب/فتور الرحمة او الشفقة / compassion fatigue
بتشارك في اعراضه مع الصدمات الغير مباشرة والاحتراق النفسي ، بس بختلف من الاحتراق النفسي انه بحصل في زمن اسرع وبغير نظرة الانسان للعالم change in world view والواحد بشوف العالم كأنه مكان خطير ليهو ولي اسرته

ومن اكتر الاضطرابات حدة وحسب ابحاث ممكن تحصل فقط بمجرد مشاهدة الفيديوهات
- اضطراب ما بعد الصدمة Post Traumatic stress disorder : اضطراب حاد جداً وبتسبب في اعراض نفسية حادة لو ما اتعالج بدري او بالطريقة الصحيحة اعراضه :

. تكرار تخيل او تذكر الصور او الفيديوهات المزعجة حتى لو حاول الواحد انه ما يتذكرا
. اعادة الاحساس بالمشهد كأن الانسان عايشه بالكامل بكل المه
. رؤية احلام وكوابيس عن المشهد
. احساس بالتوتر او الهلع كل ما شاف الشخص حاجة بتذكره بالمشهد ( مثلا تاتشر او صوت رصاص او زي عسكري )

. تجنب الحديث او التفكير بالحدث
. تجنب رؤية الاماكن الحدث فيها الحدث ( الشخص ممكن يتجنب يفتح الفيس او تويتر عشان ما يشوف حاجة زي دي تاني )
. نظرة سلبية عن نفسك او الناس التانين او العالم ككل
. فقدان الامل في المستقبل
. صعوبات في الذاكرة

. فقدان القدرة على تكوين علاقات حقيقية ( نتيجة لفقدان الثقة وتغير النظرة في العالم change in world view )
. الاحساس بالانفصال عن الواقع
. فرط الاستثارة ( الزول بتفاعل بحدة مع كل ما يخلعه )
. الاحساس بالخدر النفسي وصعوبة تلقي المشاعر الايجابية

. الخلعة من اي شي وبي سهولة
. الانسان بكون في حالة بحمي نفسه طوالي كأنه في خطر جاي
. الاحساس المفرط بالندم
. التفكير بالموت او محاولة ايذاء النفس

- ضغوط الصدمات الثانوية ( الكرب الرضحي الثانوي ) / secondary traumatic stress
بتكون معاهو اعراض القلق او التوتر العادية زائد اعراض بتشبه اعراض اضطراب ما بعد الصدمة والصدمات الغير مباشرة بس اخف حدة منهم وبحصل اكتر في حالات عدم التعرض المباشر للخطر

ناس كتار ذاتياً بقدرو يتجاوزو المشاهد الصعبة ، بس تكرارا بخليك عرضة لي ضرر نفسي ولو انت ما واعي بيهو بالذات لو كان الانسان في عمر صغير ، الانسان ما مخلوق للتعاطي مع الشد العاطفي بي صورة يومية ، عشان كدا خت في بالك :

ما تحضر فيديوهات مؤذية كتيرة وفي فترة قصيرة ، ويفضل ما تحضرا من الاساس
- اخد اجازة بالساعات او الايام من وسائل التواصل الاجتماعي
- ما تنغمس في احداث الحرب شديد ، القى زمن لي نفسك تمارس فيهو نشاطات تخفف عنك
- اعرف تقنيات للإسترخاء ومارسها دوريا ( زي التأمل او المشي )

- قابل او اتكلم مع الناس البتحبهم وبتحب تقعد معاهم وبدوك امل انه العالم مكان كويس شديد
- شارك مشاعرك السلبية مع اشخاص بتثق فيهم
- نوم كويس واكل كويس ومارس رياضة
- خلي توقعاتك وامالك واقعية ، بتقدر تحمي نفسك من اي شر ممكن يحصل
- اتعاطف مع الكل ، بس ما تحمل نفسك فوق طاقتها

- لو حسيت انه الحاجات فوق طاقتك اتواصل مع مختص في الصحة النفسية وبإذن الله بساعدك ويرشدك
واعرف في النهاية انه نحن شعب بنحب الحياة وربنا حيكتب لينا الخير ، وحتشرق علينا شمس يوم ويبقى الصعب دا كله ماضي

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد