كل القدر ده م الاضطراب بتوصل لمرحلة م استسلام لتقلبات عنيفة بتملك عقلك وتفكيرك غلطات بترتكب عن عمد خسارة بيتم السعي ليها سعي لخذلان تنويعات مختلفة ع انتح_ار مش قادر تحققه ع أرض الواقع فراغ اتحول صحرا جواك مش قابل للعلاج وصلت لمرحلة إن يا أنت يا هو والمشكلة إنك مش عايز تنتصر....
لما بتكتشف إن نص ميراثك من الحيرة كان لأسباب ملكش دعوة بيها، الدهشة البريئة بتتحول لغضب عارم وقهرة، طيب أنا ذنبي ايه، طيب ابدأ منين، أصلح الأساس البايظ ولا ابني جديد؟ طيب اجيب منين ارض ابني عليها؟ أشارك حد؟ طيب ولو محدش عايز يشاركني؟................
بتحترف الانتصار القاسي على اللي حواليك والهزيمة الساحقة من نفسك، وبتبكي عالاتنين، هويتك بتوه مع كل حاجة تايهة منك، وكل حزن اتملكك وملكك، حولك لحد انت متعرفهوش، مش قادر ينتقم من الناس فطول الوقت بينتقم من نفسه............
الحب مش معجزة ولا حاجة، الحب فاشي وانتقائي ومتعالي، وبينبهر بالتفاهات البراقة، معندهوش الحساسية الأسطورية اللي ورثونا الإيمان بيها، مجرد مندفع وتافه مش شايف غير الأدوار اللي بتتمثل براعة، وبيتعالى عالحقايق......
القسوة تكسب اللعبة بصراحتها وقواعدها الواضحة، مش مدعية ومش مزيفة، قاتلة زي ما كل حاجة تانية قاتلة، بس بتلعب لعب نضيف، واضح وباين، ومتصالحة مع نفسها، مبتحاولش تتدعي مكانة متستاهلهاش زي الحب مثلًا.........
التسامح ضعيف وصوته واطي وحجته واهية، ميقدرش ياخدك من ايدك ويحطك قدام مراية تشوف فيها نفسك، راجل عجوز مكتفي بالحكمة والتذمر الأبدي، بس الحقيقية إنه مريح نفسه ومتخلي عن دوره لصالح الباقيين، وواقف بس يتفرج وينتقد، ومطمن بإحساس إن هو أكيد أحسن .
جاري تحميل الاقتراحات...