مدرب الزمالك الجديد الملقب بـ"البروف".. خوان كارلوس أوسوريو "مدرب تحبه بس تخاف منه".. قصته فيها تفاصيل حلوة الحقيقة من فترة معايشته مع السير أليكس فيرجسون لـ النط من فوق السور عشان يتفرج على هولييه مدرب ليفربول لحد ما بقى أهم مدرب لمنتخب المكسيك في آخر 30 سنة.. حكايته ايه...
انا بس هقف عند حاجات بعينها مش هروح لكل محطات حياته لأن مسيرته شبه معروفة للجميع ولكن اللي يشدك في رحلته شوية تفاصيل حلوة لأنه مدرب لما تقرأ عنه وعن مسيرته هتشدك ابتداء من كوكتيل الخبرات اللي عنده لحد "عنده – قوة شخصيته – جنونه"...1
- أولا..سيبك أنه لاعب كولومبي "خط وسط" واعتزل وهو 26 سنة وبيدرس من ساعتها وكانت دراسته هى المحور الرئيسي اللي تقف عنده.. عشان هو مش بس حصل على بكالوريوس في علوم التمارين الرياضية من أمريكا اللي راحها من 1986 وقعد يدرس هناك واللي بسبب عشقه للدراسة في علم الكورة أكتر....2
لأ ده قرر يبيع "الجيم بتاعه" ويروح ليفربول عشان يدرس أكتر.. وسافر إنجلترا عشان يدرس في جامعة ليفربول جون موريس ودرس علوم كرة القدم... يعني فهم مراحل تطور اللاعبين من مرحلة الناشئين لحد الفريق الأول.. إزاي تكتشف موهبة.. إزاي تعرف تتطور أي لاعب وهكذا...3
- الجميل بقى أنه لما كان في ليفربول بيدرس..كان قاعد في مكان قريب أوي من مقر تدريبات الفريق.. وقرر يخبط على العيلة اللي جمبه عشان ياخد منهم "سلم أو طرابيزة" عشان يقف عليه عشان يعرف يتفرج على تدريبات ليفربول تحت قيادة الراحل جيرارد هولييه...4
بس الحقيقة أنه قدر يقنعهم أنه يعيش معاهم في بيتهم عشان يتفرج على تدريبات ليفربول كل يوم من بيتهم اللي أقرب لمقر التدريبات وكان بيعمل ده بجانب الماجستير في علوم الكورة... خلص ورجع أمريكا يشتغل مدرب مساعد وبعد كده راح مقدم على منصب المعد البدني في مانشستر سيتي...5
السيتي ساعتها كان مع كيفن كيجان لما كان في الدرجة الأولى.. وفعلا راح واشتغل معد بدني هناك وشون رايت فيليبس كان من النجوم اللي أشادوا بيه وبطرق تدريباته المختلفة لحد ما بقى مدرب مساعد لـ كيجان وستيوارت بيرس من بعده من 2001 لـ2005...6
فضوله وهو في مانشستر خلاه يروح يطلب مقابلة السير أليكس فيرجسون ويطلب أنه يقضي معاه فترة معايشة والسير وافق فعلا..وشرحله "فن سياسة التدوير بين اللاعبين على مدار الموسم" وفقا لكلام أوسوريو نفسه وقال أن فيرجسون شرحله إزاي يقدر يخطط لموسم كامل ويداور بين اللاعبيه مع كم المباريات..7
- بقى مدير فني ودرب أندية في أمريكا وكولومبيا وأنجح تجربة له على صعيد الأندية مع أتليتكو ناسيونال وحقق معاه تقريبا كل البطولات المحلية وبقى ملقب بـ"البروف" قبل ما يمسك المكسيك في 2015 عشان يبقى أول كولومبي في تاريخ المكسيك يمسك المنتخب والحقيقة كانت الرحلة الأهم في مسيرته كلها..8
- يعني ببساطة هو المدرب صاحب أعلى نسبة نجاح في آخر 30 سنة لمنتخب المكسيك.. كسر هيمنة أمريكا على المكسيك في التصفيات في أرضهم ونجح في التأهل لكأس العالم.. وحقق فوز تاريخي على ألمانيا أبطال العالم في 2014 وعمل سلسلة لا هزيمة في 22 مباراة...9
- بس هو برضه اللي خسر من تشيلي 7-0 في ربع نهائي كوبا أميركا في أكبر هزيمة للمكسيك في كل البطولات..خد رابع كأس القارات 2017 وعشان عصبيته وانفعالاته أتوقف 6 ماتشات بسبب سبه للحكم..ده غير أنه خسر الجولد كاب "كأس أمم أمريكا الشمالية" وهى البطولة المفضلة لـ المكسيك عبر تاريخها..10
- بس لما تقف عند حقبة المكسيك هتلاقي فيها تفاصيل مهمة أكتر..أولا أن أوسوريو مدرب اللاعيبه كانت بتحبه جدا واتعلقه به رغم أنه مكنش محبوب من جماهير المكسيك تماما سواء لأنه كولومبي أو أنه بيغير التشكيل علطول ومبيثبتش خطة "لعب بـ44 مباراة بتشكيل مختلف معاهم"...11
ده بعيدا عن هزيمة تشيلي اللي عمر جماهير المكسيك ما نسيتها.. بس الاتحاد المكسيكي تمسك بيه حتى بعد نهاية مونديال 2018 وده بناء على رغبة كل اللاعيبه ولكنه فضل الرحيل أملا في تدريب كولومبيا أو أمريكا "منتخبات" رغم أنه ندم بعدها على القرار ده وشاف أنه بقى نقطة تحول في مسيرته...12
- تشيتشاريتو قال أنه واحد من أهم المدربين اللي ادرب معاهم في مسيرته.. كارلوس فيلا اللي لعب في آرسنال واللي فاكره هيبقى عارف أنه لاعب حريف ومش بدني تماما ومبيحبش يدافع.. بس أوسوريو خلاه يمسك توني كروس في ماتش ألمانيا وكان سر نجاح خطته في الماتش...13
بجانب طبعا أنه خلى ميجيل لايون "اللي بدأ معاه باك شمال" خلاه يلعب جناح يمين قدام ألمانيا وخلى لوزانو بتاع نابولي دلوقتي يلعب جناح شمال رغم أن عدلته يمين... كل ده غير أنه اللي طلع ألفاريز وخلى هيكتور هيريرا ينور أكتر وهكذا..14
بعد فترته في المكسيك..كان مستني عرض تدريب كولومبيا بس مجاش..وتجربة باراجواي ملحقتش تبدأ أصلا قبل ما تنتهي "أقل من 6 شهور" لأنه متفقش مع الاتحاد الباراجواياني..وآخر تجربتين كانوا في كولومبيا على مستوى الأندية وفشلوا منهم أكتر نادي نجح في وهو أتليتكو ناسيونال في ولايته الثانية..15
إجمالا بقى.. أوسوريو أو "البروف"..راجل دارس واشتغل بدني وهى نقطة قوته طبعا.. علاقته هتبقى حلوة جدا باللاعيبه لأنه بغض النظر عن أي حاجة بيدي فرص لكل لاعيبته وبيحميهم جدا من الإعلام.. موهوب جدا في توظيف اللاعيبن وتجربة أدوار جديدة لهم "ضمن دراسته"...16
شخصيته قوية وعنيد جدا "اعترف أكتر من مرة أن عنده خسره ماتشات كتير زي ماتش السويد 3-0 بتاع الفوز على ألمانيا وكوريا" وهو طبعا مثير للجدل "حرفيا".. يعيبه كمان أنه عمره ما درب برا أمريكا "الجنوبية – الشمالية" ومحققش أي نجاح من بعد تجربة المكسيك في 2018...17
أكتر حاجة محتاجها الزمالك في التوقيت ده..مدرب يعرف يعيد هيكلة الفريق و"يفلتر" مين اللاعبيه اللي تقعد وتكمل ومين اللي يمشي خالص وأعتقد أوسوريو مدرب مناسب يعمل كده وده الأهم لأنه كده كده مش هيطول أصلا بطبيعة الحال عقده كله على بعده سنة ونص يعني بس يعرف يحطلك الأساس اللي تبني عليه
جاري تحميل الاقتراحات...