رتبها

مساء الخير...
بما إن الموضوع بيسوء أكتر وأكتر فنرجع نتكلم تاني واقراه للآخر عشان في حاجة هتعملها ..
الأفروسنتريك هي حركة عُنصرية بتنسب الحضارة المصرية القديمة للأفارقة ..
الأيدولوچية دي شايفة إنّ المصري الحالي ليس له علاقة بالمصري القديم اللّي كان من أصل أفريقي..

أو كما بيطلقوا عليه اللفظ العُنصري (زيــنـجـي) ومع الوقت تم تهجيرهم من مصر عبر السودان جنوبًا أو ليبيا غربًا، والمصري الحالي هو اللّي جه مكانه واستولى على حضارتهم وعاش مكانهم وإنّ دلوقتي جه الوقت إنّهم يستعيدوا مكانتهم وحضارتهم دي تاني منّنا ..

في سبيل دا كمّيات تزوير مش طبيعية بتحصل في تاريخنا وحضارتنا، لدرجة إنّهم بينسبوا ملكات مصر القديمة ليهم، وبيقولوا إنّ لون بشرة ملوكنا القدامى هو اللون الأسود وإنّ عُلماء الآثار هم اللّي بيزوّروا التاريخ وبيلوّنوا الرسومات والنقوش للون الأبيض..

وبيكسروا أنوف التماثيل عشان يخفوا حجمها الكبير اللّي بيميّز الملامح الأفريقية، دا غير إنّ دا بيحصل بردو مع الحضارة الأمازيغية في المغرب الشقيق وحضارات شمال أفريقيا عمومًا ..
الموضوع دا قديم وبقاله عشرات السنين لدرجة إنّ أثناء المعارض الخارجية لآثارنا لمّا بتطلّع برّة..

بتحصل مُظاهرات وحركات سياسية بتدعو إلى (العودة إلى الأصل) وإن الأفارقة هم أصل الحضارة المصرية القديمة وإنّ من حقّهم ينسبوها ليهم، والموضوع زاد مع مرور الوقت وبقى الإعتماد الأكبر حاليًا هو سبيل السوشيال ميديا، وطبعًا دا راجع لسهولة الانتشار والتأثير..

وبث السم في أفكار بعض الشباب اللّي ميعرفوش حاجة عن تاريخهم ولا تاريخ حضارتهم، وبيسلّموا ودنهم لأي حد بدون بحث دقيق ..
وطبعًا كلنا شوفنا موضوع المؤتمر اللّي كان هيتعمل في أسوان من قِبل بعض أفراد الحركة دي اللّي جُم من الولـايـات المُـتّحـدة الأمـريـكيـة..

ولمّا الدنيا اتقلبت عليهم لمّا الموضوع وصل للسوشيال ميديا المؤتمر اتلغى وقتها ومن بعدها حركة (كيفين هارت) اللّي كان هييجي في حفل هنا برو بيروّج لنفس الفكرة بس من ضغط السوشيال ميديا اتلغى الحفل وطلع من المولد بلا حُمص..

وغيره وغيره من أعلام الميديا اللّي مُتبنيين الموضوع دا عشان يسلبونا تاريخنا وحضارتنا بدل تاريخهم اللّي اتدفن في مزارع أمـــريــ.ـكا أثناء العبودية ..
طبعًا مش محتاجين نتكلّم عن مدى تفاهة الأمر وإنّ كل شوية يطلع حد يحاول يسلبنا حضارتنا وثقافتنا ومرّة ينسبوها لفضائيين..

ومرّة ينسبها لولاد العم ومرّة أهو للأفارقة من ذووي البشرة الداكنة .
دا غير إنّ تحاليل الحمض النووي اللّي إتعملت على كتير من المصريين الحاليين توافقت بنسبة تخطت الـ٨٠٪؜ في بعض الأحيان من نسب الحمض النووي اللّي لقيناها في مومياوات المصريين القدماء..

كإثبات إنّنا أصحاب الأرض والتاريخ وإمتداد لحضارة عظيمة، فلازم يبقى عندك وعي كافي وتعرف تدافع عن حضارتك وتاريخك وتعتز بيهم وتبقى مليان فخر كدة لمّا تيجي تتكلم عن أجدادك وهوّيتك المصرية الحقيقية ..

وآدي أخر مهزلة من نتفليكس ..
عاملين مسلسل وثائقي عن الملكة (كليوباترا) ومطلعينها بالمنظر اللّي قدّامك دا ..!
.
للّي ميعرفش فـ (كليوباترا) هي آخر واحدة مسكت العرش من الأسرة المقدونية، حتّى احتلال الرومان لمصر في ٣٠ قبل الميلاد.

يعني هي حتى مش من أصل مصري، بل أصل مقدوني يوناني ببشرة فاتحة ويمكن أفتح من بشرة بعض المصريين بما إن أبوها كان (بطليموس الثاني عشر) وعندنا العديد من التمثايل وتصوير ليها مفيش ولا واحد فيهم مطلعها بالمنظر دا..

حتى صور ولوحات فناني العصور الوسطى كلهم مطلعينها بيضاء البشرة مش بالمهزلة اللّي عاملاها نتفليكس دي عشان تروج للفكرة أكتر ..
المُصيبة إن الفيلم دا فيلم (وثائقي) يعني مش فيلم خيالي ولا حتى مجرد مبني على أحداث حقيقية، لأ، دا المفروض إنه (بيوثّق) أحداث حقيقية..

فلما يطلعوها بالمنظر دا عشان يدعموا الحركة دي، شوف كام واحد هيطلع وهيشب على الفكرة وهو مقتنع إن دي الحقيقة، بل ومنهم للأسف مصريين مش فاهمين وواخدين الموضوع هزار وضحك أو مش فارق معاهم واللّي يقولك دي شبه شيرين عبد الوهاب وكلام ميطلعش غير من ناس جهلة وسطحيين..

ميستحقوش اشتراك النت اللّي فاتحين منه ..
وعلى سبيل المعارضة، اتعمل رابط عريضة اعتراض على الموضوع هنا أهو: chng.it كل اللّي علينا اننا ندخل نسجل اسمنا بس اننا مُعترضين على اللّي بيحصل دا عشان نجمّع أكبر عدد مُمكن عشان نلغي المسلسل إنه يتعرض..

chng.it/HbnW5Pcr9L

لحد ما نشوف دا هيوصلنا لفين ولا هيبقى في ردود أفعال أكثر صرامة من الدولة تجاه اللّي بيحصل دا ..
وحاجة أخيرة، أنا مبستخدمش نتفلكس في العادي، بس أنا شايف إننا كمصريين نقاطعهم ونلغي الاشتراك على الأقل لحد ما نشوف نهاية المهزلة دي إيه، مش هتموت من غير الاشتراك يعني..

في كذا بديل تضيع فيه وقتك، دا غير إنك تقدر تديله تقييم واقع على المتجر سواء أندرويد أو IOS وتعمل ديسلايك للبرومو على يوتيوب
كل ما هنسكت الموضوع هيسوء لحد ما نلاقيهم واخدين مننا كل حاجة، حتّى ماضينا
ياريت متكسّلش وشيّر السرد عشان يوصل لأكبر عدد ممكن من الناس
محمد عبد المحسن

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد