ده اسمه ذِكر ، وليلة الذكر بتبدأ بعد صلاة العشاء ، الحلقات اللي تبع الطرق الصوفية بتكون مميزة بلون البيارق والعمائم ، يعني الرفاعية غير الشاذلية غير العزمية وهكذا ، أما الذكر المفتوح ده منتشر في القاهرة والمحافظات ، وبيكون موجود دايماً في خيم الخدمات المصاحبة للموالد
( الذكر ترويح وليس تطويح ) ده ملخص الفكرة ، يمكن في ناس بتبالغ في الحركة لكن الأصل فيها الميل البسيط يمين ويسار ، بتكون الرجل ناحية الاتجاه ثابتة والتانية بتاخد زاوية ميل
وصلات الذكر غالباً مابيكون فيها منشد معاه فرقة موسيقية مكونة من ٥-١٠ أفراد ، بيقول فيها قصائد من الشعر الصوفي والمديح ، إيقاع الموسيقى تقريباً واحد عند كل المنشدين / المداحين ( ماعدا الشيخ أحمد التوني ) الموسيقي والكلمات والطاقة الروحانية بتخمرهم في مرحلة معينة
أشهر المداحين طبعاً بعد مولانا التوني عندنا ياسين التهامي ، أمين الدشناوي ، لكن طبعاً تحتهم ناس كتير من محافظات مختلفة ، وفي منهم أساتذة في الإنشاد ، الفرق بينهم مدى ثقافة المنشد ووزنه وتقله ، ده مش مطرب مهرجانات أو درويش موالد ده المفروض مدير عام الحالة الروحانية دي
يعرف امتى يبدأ وامتى يسخن وامتى يهدى وامتى يشاركهم معاه وامتى يقطع الموسيقى خالص وامتى يقفل
جاري تحميل الاقتراحات...