بمناسبة مسلسل الهوشة السابعة، عايز أقول حاجة كدا وعايزكم تهدوا وتصلوا ع النبي كدة، منظومة الجواز في مصر فيها مشكلة تأسيسية، في العمود الفقري لتأسيس العلاقة نفسها، لو حضرت اتفاقات جواز في مصر هتفهم انا بقول ايه
المبدأ بقى اللي بتتأسس عليه العلاقة دا اللي هو الدهب والعفش والقايمة وكل الحواديت اللطيفة دي بقى فيه مشكلة لأن المعطيات اتغيرت .. عشان الست خرجت لسوق العمل ودورها في العيلة اتغير ودا بالضرورة لازم يغير في مبادئ التأسيس اللي قايمة عليه العلاقة في مدى حقوق الراجل ومدى حقوق الست
الشكل دة من الاتفاقات جاي من بعيد، جاي من الغابة، محكوم بعادات ونسق اجتماعية بعيدة جدا جاية من اتفاقات القبائل ومباركة رؤوس المجتمع ع العلاقة دي وتدخلات من أطراف كتيرة وتربية ونشأة ومحكومة بقيود عن دور الست وملكية الراجل، الليلة دي محدش بيشتبك معاها
فالشكل دا من "تأسيس" العلاقة الطبيعي بتاعه، الديفولت بتاعه يعني انه يأسس لعلاقة غير انسانية، العلاقة دي مادية ونقل ملكية من راجل لراجل، مش علاقة رضائية .. لو عايز تفهم قصدي ايه، قارن بين تأسيس العلاقة دي وتأسيس علاقتك مع صاحبك/صاحبتك مثلا .. الأخيرة دي هي اللي اسمها علاقة انسانية
والزوجين اللي بتتأسس مابينهم علاقة انسانية هما في الحقيقة خرجوا برة المنظومة، هما خالفوا المنظومة عشان كدا نشأت فيما بينهم العلاقة دي .. لكن تمام الاتفاقات دي تأسيس لعلاقة محكومة فقط بالحقوق والواجبات، وكل الحقوق اتدفع تمنها وكل الواجبات اتدفع مقابلها والمطالبة بيها "منطقية"
لو عايز تحل تشتبك يسطا في التأسيس، مفيش نقاوة، الحياة كلها مافيهاش نقاوة ولا استنصاح ولا انك تاخد/ي الحلو من هنا ع الحلو من هنا وتحط/ي ابو قرش على ابو قرشين ونعمل حاجة اوستيك، مفيش الكلام دة ف الحياة كلها، الكلام دا هو اللي بيعمل مشاكل، لو دقت الكاس هتكمله لآخره.
جاري تحميل الاقتراحات...