رجل جمع المساويء كلها فكان زوج سيء و اب سيء و باخر حياته قام بسلسلة من الجرائم و كاد ان يفلت من العقاب لو لم توقعه مراهقه في شر اعماله . قصة اليوم عن جون جاموسكي
جون جاموسكي انولد بنيويورك عام 1935 كان يوصف بأنه هادي و متحفظ ماله أي دور بأي مكان يروح له و ماكان عنده أصدقاء و كان يتحاشى الناس و بنفس القدر الناس كانو يتحاشونه
ما احد يبيه لكن ما أحد حارشه لين دخل الثانوية و قتها كان يعاني من حبوب الشباب و كل يوم يلبس نفس الملابس هالشيئين كافيات أنها تحرك عقل المراهق و تخليه يمتحنك بحياتك فبدأوا يتنمرون عليه وعطوه لقب "جيرمز جاموسكي " و مشت الايام و تخرج من الثانوية و دخل الجامعة و أخذ الشهادة
بعدها أنضم للجيش و بهالفترة يدعي أنه قدر يغير حياته و صار عنده أصدقاء و البنات دايخات عليه لدرجة كان عنده عشر حبيبات مره وحده جون من زود ما ان وقته بالجيش كان حلو بعد فترة قصيره تركه و راح أشتغل مدرب وبعام 1959 دخل القفص الذهبي و جاب ثلاث عيال وعاش حياة بنظره كانت جيدة
جون ما كان يشري لعياله و بيته إلا من التخفيضات عايش على الكوبونات اللي يحصلها بالجرايد اللي أساسا ما كان يشتريها كان ياخذها مجانا نهاية كل أسبوع من المكتبة هل هذا الشي غلط ؟ لا بالنهايه كل شخص لازم يسوي اللي عليه عشان يوفر و يوكل عياله بس فيه مشكله هنا
جون مليونييييير جون ورث من أبوه ملايين هذا غير الأصول الثمينة ما بين أسهم و أراضي و بيوت و غير المجوهرات و الساعات اللي كانت قيمة الواحده منهم أكثر من 40 ألف دولار وهو الذهين ما وقف و دخل بأستثمارات ناجحه ومع ذلك كان عايش عيشة افقر الفقراء
عياله و زوجته ملابسهم دايم رثه و قديمه و ينكد عليهم اذا شغلوا لمبة زيادة وكان يجمع علب البلاستيك عشان مراكز التدوير يعطونه بدالها فلوسه كان ليل و نهار يحوم بالشوارع يجمع هالبلاستيكات!وكان يحب يجمع يحمع كل شي و أي شي العلب ماكان يستبدلها كلها بعضها يجمعها ببيته و تقريبا عنده 13…
و برضو كان يجمع الجرائد و المجلات و كل شي بالبريد يوصله يحتفظ فيه و يجمع علب الأكل وعلب الشامبوات كل شي حتى الحوش حقهم كان مليان خرده ما بين ثلاجات خرابنه و دبابات مصديه و كفر سيارات وسيارات مهجوره !
مشت الدنيا او وضعهم على ماهو عليه لين عام 1980 العيال خلاص كبروا و طلعوا وفضى البيت على جون و زوجته
بهالوقت زوجته أصيبت بمرض السرطان فبدت تطلع علومه و تبان غرابته أكثر الرجال بدأ يعيش الدور بأنه مراهق يلبس لبس المراهقين وأشترا له كم قطعه ماركه صار يلبس كابات و يسمع أغاني هيب هوب و دخل بعلاقة مع مراهقة عمرها 16 سنة !
تطورت العلاقة لدرجة خلاها تسكن معه ببيته و كان متوقع إنه يقدر يخبيها عن زوجته ! بس الزوجة مريضة ماهي ميته و تقدر تشوف هالادميه اللي بالبيت و أكيد ما سكتت وبدأت المشاكل و تدخلوا العيال و كبرت السالفه لدرجة واحد من عياله ضربه !
بعد هالازمه قرر جون يشتري راحة باله و يقطعها مع البنت لكن هل تاب؟لا بداء يرسم خطة براسه هدفها الأول و الأخير إن المره الجايه ما أحد يدري أنه على علاقة بأحد جون راح يتفقد ممتلكاته و يشوف وين المناسب منها و أكتشف إن ببيت أمه قبو تحت الأرض مستحيل أحد يروح له و مستحيل ينسمع منه أي شي
عرف جون أنه خلاص لقى ضالته و طلع للشارع يدور له وحده على مواصفاته و للأسف حصل بنت عمرها 14 سنة أسمها كيرستن البنت كانت بوضع ضعيف كانت هاربه من اهلها جون وقف و ناداها و قعد يسولف معها و قالها شرايك أوصلك للمكان اللي أنتي تبين ؟
كيرستن يا بعد الدنيا صدقته و لانه كان عايش جو المراهق عطاها هالة الجد المرح فوثقت فيه وركبت معه و هذا آخر علمها بالدنيا جون خدرها و أخذها للقبو بعد ساعات صحت حصلت نفسها بهالمكان المظلم الرطب الضيق ضيق لدرجة أنك ما تقدر توقف فيه و الطريقة الوحيده عشان تتحرك هي النك تزحف
كيرستن أول ما فتحت عيونها شافت جون و قالها خلاص ما فيه مفر أنتي هنا و الحين لازم تقومين بكل طلباتي لأن لو رفضتي لا تلومين الا نفسك انا شخص قوي و ضمن طائفة أعضائها كلهم رجال أعمال و سياسين و شرطة يعني حتى لو فكرتي مجرد فكرة أنك تهربين راح أفْتلك و أفْتل كل أسرتك !
اهل كيرستن قدموا بلاغ للشرطة لكن الشرطة ما سوت شي لان كيرستن أكثر من مره تهرب من أهلها فالشرطة قالت هذي عادتها وش الجديد؟و اللي بردهم اكثر ان جون خلا كيرستن تكتب رسايل لاهلها + كذا مره كلمتهم وكانت تقول انها مع اصدقاءها وبترجع متى ما تبي و لهالسبب الشرطة قفلت ملفها خلاص💔
كيرستن استمرت بالقبو بهالأوضاع السيئة ست شهور وجون بداء يمل من القبو وماهو عاجبه إن كل شوي يطق مشوار لبيت أمه فقرر أنه يبني قبو بحوش بيته و لما سألوه اهله وراك تبي قبو؟قالهم عشان أحتمي فيه من القنابل!جون اللي حوله متعودين على خباله و أفكاره الغريبة فماناقشوه و قالو لعله ينشغل…
جون صمم القبو بطريقة الداخل مفقود و الخارج مولود حرفيا القبو صااامت اللي فيه ما يقدر يسمع اللي برا و اللي برا ما يسمع اللي يصير بالقبو
القبو كان متكون من " دورة مياة " مافيها ماء جاري و لا فيها سباكه ولا شي بس كذا جون قرر انها تكون دورة مياه فصارت دورة مياه
و غرفة نوم ما فيها لا بطاطين ولا مخاد ولا شي بس قراشيع جمعها جون وسماها غرفة نوم و ثقيل الدم كان كاتب على الجدران مدري وش الهدف
هذا غير ان ما كان فيه اضاءة الا لمبة وحده بس و غالبا جون يطفيها
ولأن خلاص صاروا بمكان اوسع بدأ يتفنن كان ملزمها تكتب كل شي تسويه من تقوم لين تنام حتى الاشياء اللي تصير وهو موجود لازم تكتبها و لان جون كان رجل متدين جداً كان مخصص و قت من اليوم يقعدون ويقرون الانجيل مع بعض !
و كان يحاول يضغطها نفسيا و يدخلها بمنافسه مع اللاشيء كان قايل لها ان البيت مليان بنات لكن هي الوحيده اللي محبوسه بهالقبو لانها باقي ما اثبتت جدارتها بانها تطلع من هالمكان لكن اسوأ شي سواه لما جاب لها صور له وهو داخل بيت اهلها ! و قالها تراي اقدر اسوي فيهم اي شي لو بغيت
جون كان رايح لاهل البنت وقايل اهم ان صاحب العقار مرسله عشان يصلح اشياء بالبيت و الاهل دخلوه و بهالطريقة قدر ياخذ الصور كيرستن دخلت بحالة أكتئاب شديدة و باحد الايام دخل عليها جون وقالها مشينا بنسافر كاليفورنيا و فعلا سافروا كم يوم
لما رجعوا تركها بالمطار و قالها تذكري اني اقدر اسوي اي شي و لو نطقتي بحرف واحد من اللي صار راح افْتل اهلك كيرستن بعد سنتين من الخطف رجعت لاهلها و لا قالت لهم اللي صار و كان جون من فترة لفترة يوقف قدام بيتها كتذكير انه مازال موجود و مازال قادر انه يضرها !
مرت أربع سنوات و قرر جون يجيب ضحيه جديده و طلع يحوم كالعاده و حصل بنت مراهقه عمرها ١٤ سنة و نفس وضع كيرستن هاربه من اهلها أسمها ميشيل ، جون و قف لها و قالها عادي توصلين شي معاي و بأعطيك فلوس؟
ميشيل ما كانت شايفه اي شي يدعو الرئيس من هالشايب وظنت انها بتحصل على فلوس بطريقة سهله فليش لا ميشيل ركبت معاها و قالها معليش الغرض بالبيت عادي نروح قالت مب مشكله و راحو للبيت و خلاها تنزل للقبو و قبل ما تستوعب هي و ينها فيه جون ربطها بالسلاسل
و قالها نفس الكلام اللي قاله لكريستن و نفس التهديدات و نفس الطلبات الغريبة و نفس الروتين وصور لها أهلها من برا و من داخل البيت نفس السيناريو انعاد بس مع ميشيل بدأ يصور مقاطع فديو و بعض هالمقاطع ما زال موجود و فيها يبان ان جون عايش الجو بان العلاقة اللي بينهم حقيقة مو انه خاطفها!
بعد 13 شهر أطلق سراحها بس هالمره كان أجرأ شوي ووصل ميشيل عند باب بيتهم لكن ميشيل عكس كريستن قالت لأمها كل شي و أمها كردة فعل طيبيعية كانت بتروح للشرطة ميشيل قعدت تصيح و تقولها انتي مب مستوعبه هذا وش ممكن يسوي بعدين ترا الشرطة معاه يعني ما راح تستفيدين شي
و الأم صدقت إن هالرجال فعلا وراه طائفة و مسؤولين و جون نفس ماسوا مع كيرستن كان يجي و يوقف قدام بيتهم بالساعات وهذا اللي أقنع الأم بأنهم فعلا بخطر !
وبعد سنه قرر انه ينتقل لضحيته الثالثه و كالعاده طلع يحوم و حصل امراه فيتناميه اسمها تينا و عمرها ٥٣ سنة و جون بدال ما يكلمها و يأخذ ويعطي كالعاده انقض عليها و دخلها غصب بالسيارة ومع تينا صار اللي صار مع الي قبلها لكن لان تينا ما كانت تفهم إنجليزي كويس جون زاد العيار شوي !
كان حاط جنب سريرها هيكل عظمي و كان يشغلها اصوات ناس تصارخ و تصيح عشان يوهمها ان فيه وكان عنيف معها و يضربها لدرجة أنه ضربها ضربه على اثرها انفقعت طبلة اذنها 💔
وبعد ٩ شهور تركها و هالمره أخيرا فيه وحده منهم راحت للشرطة لكن للاسف الشرطة ما سوت شي لأن لغتها كانت ركيكه فاغلب كلامها ما كانو فاهمينه و اللي قدروا يفهمونه منها شافو أنه غالبا من وحي الخيال و مستحيل شي زي كذا يصير ! و للمره الثالثه جون ما يواجه اي عواقب لافعاله
و للأسف للأسف جون بعد ثلاث سنوات طلع يدور ضحية رابعه و هالمره كانت الضحية أم عزباء عمرها 26 سنة أسمها جينيفر وقتها كانت تعاني من مشكلة بالأدمان فكانت هدف سهل و زياده على كذا جون جاها بلحظة ضعف كانت قاعدين يلاحقونها شباب و وقف لها جون و قال أركبي معي
جون يقول جينفير لفت أنتباهي لأنها تشبه زوجتي أيه زوجته اللي كان يصيحها اذا شغلت اللمبة و حاسب عليها اللقمة يوم ماتت طلع يدور اشباهها بالشوارع ! جينفير خدرها وهي بالسيارة صحت لقت نفسها بالزنزانه جينفير ما كانت مثل الباقين كانت تصارخ و تصيح و تضربه
جون كان عارف إن نقطة ضعف جينفير عيالها فقالها لو ما هجدتي ترا ببيـ 3ـك لواحد برا البلد و تراه والم يبي يشتري جينفير بدأت تخطط لفْتله و هو أنتبه لهالشي و ذكرها أنه لو مات ما فيه طريقة راح تخليها تطلع و هي بعد راح تموت !
جينفير أستمرت تصيح و تضرب و هالشي ما ترك لجون خيار إلا أنه يطلق سراحها بعد شهرين جينفير مثل تينا على طول راحت للشرطة و علمتهم عن كل شي حتى و صفت لهم الزنزانه و وصفت جون و علمتهم عن سيارته لكنها أخطت بموديل السيارة بفرق سنة بس !
و لما بحثوا الشرطة عن سيارة بالمواصفات و الموديل اللي تقوله جينفير ما حصلوها و هذا عطاهم سبب أنهم يكذبونها و يقضبونها الباب جون أستمر بحياته مافيه دروس تعلمها ولا فيه عواقب واجهها فهل تتوقعون راح يوقف ؟ لا طبعا
جون الآن بعام 2002 وهو بدأ بالخطف من عام 1987 يعني 15 سنة و هو فالت من العقاب و عمره وقت هالحادثة 67 و لا تاب و طلع يدور ضحية جديده و فعلا حصل مراهقه عمرها16 سنة أسمها ميكا جون ناداها و عرض عليها فلوس لو ركبت ميكا كانت برضو هاربه من اهلها و كانت محتاجة فلوس و للاسف وافقت تركب معه
و صار عليها مثل اللي صار مع اللي قبلها بس هالمره جون حب ميكا حبها حب حقيقي و ميكا قررت تستغل هالنقطة بالبداية أستغلت هالشي بتحسين ظروف حياتها و قدرت تخليه يجيب لها تلفزيون و يسمح لها تطلع تشم هواء شوي بالحديقة
بعدين أقنعته تطلع معه السوبرماركت و هاللحين وداها ماكدونالدز و كان هالشي عنده قمة الدلع حتى أنهم راحوا لبار و غنوا كاريوكي مع بعض طبعا ميكا ما حاولت تهرب لأن كانت للحين تحت تأثير فكرة أنه ضمن طائفة و مافيه فكه منه و كانت تبغى المركب يمشي بس
لكن جون صدق أنه فعلا بعلاقة مع ميكا و أنهم حبايب و كان فيه حفل منظمينه دفعته بالثانوي عشان يجتمعون ويشوفون وش أخبار بعض ووش الدنيا سوت بهم و جون فرحان مره بميكا و ميت يبي الحفل يجي يبي يكشخ بهالمراهقة عند الشيبان و بتكون دليل حي أنه قاعد يعيش أحسن حياه !
و بأحد الأيام جون كان يبي يأخذ علب لمركز تدوير إيه للحين ما ترك هالعاده يعني عمرك 67 متى ناوي تصرف فلوسك يالدبشه !
المهم ذاك اليوم أستثقل يشيل العلب لحاله و نادى ميكا عشان توصلها معه الحين لها ست أشهر مخطوفة و البنت قفلت معها وراه طائفة ما طائفة وش بيسوون يعني مافيه عذاب أقوى من شوفة وجه جون كل يوم
فلما وصلوا المحل ميكا قالت له ابغى استخدم التلفون قالها وشوله ؟ ولانه متدين هي عارفه مفتاحه قالتله ابد بدق على الكنيسة عندي سؤال جون يوم سمع هالاجابة انثلج صدره و قال ياشيخه روحي انا اشهد ان اللي رباك رجال و حس انه احسن الاختيار بالخطف هالمره
ميكا دقت على اختها و علمتها عن كل شي و علمتها عن المحل وسكرت اختها رجعت اتصلت على المحل و علمت الموظفين و الموظفين على طول اتصلوا على الشرطة وقتها جون و ميكا قد طلعوا من المحل بس الشرطة قدرت توصلهم
جون أنهار يمكن أنهار لأن ما كان متوقع هالشي من ميكا أكثر من إن خلاص الشرطة مسكته طبعا الشرطة أعتقلته و أخذوا ميكا عشان ياخذون أقوالها و هي تتكلم الشرطة أدركوا إنهم قد سمعوا هالقصة من قبل و إن جينفير و تينا اللي كذبوهم كانو يقولون الحقيقة !
الشرطة راحت للبيت و صورت الزنزانه و نشرتها بالإعلام عشان لو فيه ضحايا ثانين يجون و فعلا كيرستن و ميشيل أخيرا تكلموا مع الشرطة كيرستن كان عمرها 29 سنة و هذي أول مره تتكلم عن اللي صارلها مع أي أحد كانت شايله السر 15 سنة خوفا من جون و طائفته !
جون بالمقابل ما ظهرت عليه اي مظاهر الندم و بالعكس كان يدافع عن نفسه و طلع بالتلفزيون و يقول انه شخص طيب و ما قد اذى احد !
وقعد يبرر اللي سواه بان زوجته كانت مريضه و كان مضطر يشوف حياته هذا الأستحقاق العالي و ما يسوي , و بعدين راح يعدد كيف ان القبو كان مكان مثالي !
و المذيع سأله لو عادي هو يسكن بالقبو ؟
و لما ساله ليش كان مقيدهم بالسلاسل لو كان الوضع حلو و البنات راضين جون قال عادي مافيها شي و شبه سلاسله بالخلاخل اللي يلبسونها الناس للزينه بالاوضاع العاديه !
و قعد يحاول يقول انه هو الضحيه و انه صرف عليهم دم قلبه و كان يركلهم ستيك و يجيب لهم احسن انواع الصوص ! ياساتر يا عقلية البخيل كيف تشتغل
بالنسبة للمحاكمة رغم ان فيه ادله كثير على جون الا ان الضحايا قالو انهم ما يقدرون يطلعون يشهدون لان ما يقدرون يشوفون وجه جون مره ثانيه
و بناء على هالشي الادعاء قدموا عرض لجون انه يعترف بالذنب و اذا اعترف راح يكون حكمه من ١٨ سنه الى مؤبد و انه يتنازل عن كل املاكه و امواله للضحايا و جون وافق و فعلا قسمت ثروة جون على البنات،البنات ما يبون ترتبط اسمائهم بهالقضية حتى ان الاسامي اللي وردت بالقصة ممكن ما تكون اسمائهم…
جون للحين حي و السنه اللي فاتت كان ممكن يطلع من السجن لكن تم رفض طلبه
جاري تحميل الاقتراحات...