@mbinaltheeb وحمود وابو حمود والهجر ممقوت
وغويرين راسه تحت خشم دله
يا حمود نفسي عايفه طايب القوت
وأُبيك ابراهيم علته عله
شرحتله ظرفي قبل عمري يفوت
وفضيتله وقتي لكن ما استغله
انجيدياً طيبه مع الناس مثبوت
لكن له عامين خربان دله
يدل شارع شارع فوسط بيروت
وان قلت له وين الحرم ما يدله 2️⃣

@mbinaltheeb ويموت فالرمان والتين والتوت
وليا لقا فيروز وسط المجله
يعلق الصوره على ظهر كبوت
نيسانه اللي كل ما ضاق تله
سلم عليه وقله يرجع الكوت
ولا تراني بشتكيه ل عطالله
وان قال ماهي من شيم كل منعوت
قله يسجلها علي في سجله
انا معي عين لكن عين سربوت
ماهي بعين مطوعاً يذكر الله 3️⃣

@mbinaltheeb والثانيه خبره والصوت مخفوت
وان قلت وش عندك بعد قلت قله
المجد ماهو يصنعه كل هلفوت
يصنعه شاعر ما يعرف المذله
اللي ليا منه كتب خمسة بيوت
يغير التاريخ وهو ف محله
يابو حمود الحبل ماهو بمسموت
اما اسمته ياخوك ولا فخله
لو ان جدودك طوعت كل طاغوت
الشعر يبقا حاجتن مستقله 4️⃣

@mbinaltheeb مشاعري ماهي تحرك بريموت
على تناقضها تراها جبله
علمتك ان العنبره من بطن حوت
وتقول صادق بس وين الادله
وجدي على راكان ولا ابن شفلوت
يوم الخليل استودع الله خله
اصواتهم واجد لكن ما بقا صوت
يشن فأسماعي وانا منصت له
يا طيبهم طيباه يوم انهم سكوت
شر الكلام اللي على غير حله 5️⃣

@mbinaltheeb لو ادري اني بعد يومين بموت
قلت الكلام اللي على البال كله
وخليت شرهتهم على ظهر تابوت
والروح تسبح في مسابح الاهله ✋🏻