واحد اعرفه ابوه حلف عليه ان لازم ولابد انه يتجوز بنت عمته " هو عارف اني هكتب الكلام دا " ؛ بيقولي مبيحبهاش واتجوزتها مُضطر ، وانه من بداية جوازهم وهو معندوش قبول تجاهها ؛ انت متخيل يا بني انك متجوز واحده شبه عمك ؛ بس هعمل اي حكم القوي !
جيت ف يوم متأخر من الشغل فتحتلي وعملت تصرف غريب قشعرلي بدني ، "باست ايدي وقالتلي وحشتني" ؛ انا حسيت اني قليل اوي ف نظر نفسي ، قررت اكتبلها جوابات حب واعلقها عل التلاجه ؛ اهو افرحها بكلمه حلوه وخلاص حتي ولو مبحبهاش ، اجيبلها هديه او ورد وانا جاي ، اعملها شاي !
بعدها بيقولي ان البنت بدأت ربنا يحليها ف عيني ، وشها بدأ ينور ؛ كُل لما اقولها كلمه حلوه الاقي شكلها يبقي اجمل ، بقيت احافظ علي مشاعرها واحسس عل الكلمه قبل لما اقولها ، كأنها وردايه وعماله تفتح من جديد ، واهتمامي بيها زي الميه اللي بترويها وتخليها تفتح اكتر !
اخدها اخرجها ، ابصلها احس اني شايف قدامي قمر مش بنت عمتي خالص ؛ من الواضح الكلمه الحلوه والمحافظه عل المشاعر مفعولهم جبار يا اخي ! انا حبتها ، اقسملك بالله حبتها !
سيدنا أنس بن مالك خادم النبي ﷺ ، كان ليه أخ يتيم اسمه عُمير ، ف النبي جاب لعُمير طير صغير يلعب بيه وسماهوله " النُغير " ، المُهم ، النبي كل يوم يعدي علي عُمير يلاقيه بيلعب مع الطير بتاعه !
ف يضحكله ويقوله : يا عُمير ! ماذا فعل النُغير ! اخبار الطير بتاعك اي ! يقوم عمير ضاحك ، كل يوم النبي يقوله كدا ، وف ليله النبي معدي علي عُمير وقاله يا عمير ماذا فعل النغير ! عمير بكي وقال للنبي ، يا رسول الله ؛ مات النغير ؛ الطير بتاعي مات !
فـ النبي قعد جنب عمير علي الارض وربع رجليه وفضل يلعب معاه ، ف الصحابه شافوا النبي واستغربوا ! ماذا تفعل يا رسول الله ! اي اللي بتعمله دا ! ، قالهم مات النغير ، فجلست ألاعب عُمير ! ، شايف كمية مراعاة المشاعر وجبر الخواطر ! ، والنبي مكتفاش بكدا لاء
تاني يوم راح لعُمير بيته وقعد معاه يعزيه ويواسيه ويقوله كلام حلو يخفف عليه الحُزن بسبب موت الطير بتاعه ، ومش بس كدا ، دا النبي قام صلي ركعتين وهو في بيت عُمير ودعي ربنا انه يصبر قلبه ويهون عليه !
إديسون مخترع المُصباح الكهربي ، اترفد من مدرسته والحجه انه طفل غبي " كتبوا جواب لامه يقولولها ابنك غبي جدًا وزمايله هيتعلموا الغباء منه و فصلوه ؛ اديسون امه بدأت تمنعه من المرواح للمدرسه ، سألها عن السبب ! ، قالتله لانك أذكي من جميع زمايلك وانت مش محتاج لمدرسه ، انت عظيم !
إديسون بيقول انا صدقت كلام امي واني ذكي وعظيم ، كانوا شايفين ان عقله مظُلم مينفعش للتعليم ، لكن بكلام امه الحلو ومراعاة مشاعره ، نور العالم باختراعه !
سيدنا عكرمه بن أبي جهل ،ابوه " أبو جهل " من اكتر الناس اللي كانوا بيكرهوا الاسلام ، لما سيدنا عكرمه أسلم ، النبي نهي الصحابه انهم يجيبوا سيرة أبو جهل بأي سوء قدام سيدنا عِكرمه ، وقالهم ان الشتيمه هتوجع ابنه ومشاعره ، ومُش هتوصل لابو جهل ! ف حافظوا علي الفاظكم !
الخليفه العباس ، كان بيتمشي مع زوجته ف حديقة القصر بتاعه ، ف وهُما واقفين علي البير سوا ، وضح ان الخاتم بتاعها كان واسع عليها ، وفجأه فلت من ايدها وقع ف البير ، الخليفه العباس فورًا قلع الخاتم بتاعه ورماه ف البير !
فقالتله لماذا فعلت ذلك يا امير المؤمنين ! ليه رميت الخاتم بتاعك ! ، قالها خِفت ان يشعر خاتمك بالوحده فأردت ان اجعل خاتمي رفيقًا له ! ، بتقول زوجته انها طول حياتها منسيتش حلاوة كلام الخليفه ليها في الليله دي !
مراعاة المشاعر والكلمه الحلوه يا جماعه الله يحلي أيامكم ، الست ممكن يكون طالع عينيها ف شغل البيت ، ولما راجلها يطبطب عليها ويقولها شايلاني وشايله عني الله يديمك نعمه ويبوس دماغها ، وربي بتنسي كل تعبها !
ابنك بيذاكر متقولوش انت مش نافع ؛ اعمله القهوه بايدك وقوله انا معتمد علي الله ثم عليك وكل اللي يجيبه ربنا كويس !
الحب عامل زي السبرتو ، لابد تحافظ عليه بانك تغّلفه " بالاهتمام " بدل لما يطير منك !
دا النبي قال ان الكلمه الطيبه بتتحسبلك صدقه ؛ وربنا بيقول وقولوا للناس حُسنًا !
الحب عامل زي السبرتو ، لابد تحافظ عليه بانك تغّلفه " بالاهتمام " بدل لما يطير منك !
دا النبي قال ان الكلمه الطيبه بتتحسبلك صدقه ؛ وربنا بيقول وقولوا للناس حُسنًا !
امدح ف لبس اصحابك واذواقهم ؛ ابعتلهم رساله دلوقت مضمونها كلمتين أنا بحبك !
الكلمه الحلوه بتلزق ف القلب زي طابع البوسطه !
راعوا المشاعر وقدروها ؛ في تصرفات بنشوفها تافهه جدًا الا انها بتفرق عند غيرنا ومبتتنسيش ، الواحد لو حب واتحب بيحلو ، ووشه بيفتح زي الوردايه !
الكلمه الحلوه بتلزق ف القلب زي طابع البوسطه !
راعوا المشاعر وقدروها ؛ في تصرفات بنشوفها تافهه جدًا الا انها بتفرق عند غيرنا ومبتتنسيش ، الواحد لو حب واتحب بيحلو ، ووشه بيفتح زي الوردايه !
في يوم قولت لوالدتي تعرفي ان اجمل شئ ف الدُنيا ان الانسان يحب ! قالتلي تعرف اي الاجمل !
ان الانسان اللي بتحبه يبادلك نفس الاحساس ؛ ف يراعي مشاعرك ويحبك !♥️
ان الانسان اللي بتحبه يبادلك نفس الاحساس ؛ ف يراعي مشاعرك ويحبك !♥️
جاري تحميل الاقتراحات...