حين يكون النجاح نقمة و يجذب كل مختل ليقتات عليك ! قضية مقتل المودل الصينية آبي تشوي
آبي تشوي بنت عمرها 28 سنة تنحدر من عائلة صينية ثرية أم لأربع أطفال اثنين منهم من زواجها السابق و اثنين من زواجها الحالي
أبو عيالها الأول آليكس كان حبيبها بالثانوية و رغم الفرق المادي الكبير بينهم إلا إنها تزوجته و أهلها ما كانو مخالفين عشان الفرق المادي لكن كانو يقولون توك صغيرة و مع ذلك أصرت و تم الزواج ، أليكس وأهله أجتماعيا لهم مكانتهم لأن أبوه كان رئيس شرطة بهونغ كونغ
آبي لما أنفصلت عن آليكس رجعت تزوجت وهي بعمر 22 سنة لواحد كان يحبها بالثانوي وهي ميب يمه هالرجال أسمه كريس و الفرق إن كريس من مواخيذ آبي و أهلها ولد أسرة غنية وتقدر ثروتهم بنص مليار دولار لكن زواجهم هذا كان صوري فقط سوو حفلة و معازيم و كلش لكن الزواج ما له إي أوراق رسمية
و فيه كلام إن السبب يرجع إن آبي و آليكس ما تطلقوا رسمي لأسباب ماديه،رغم الإنفصال و الزواج الجديد آبي ما زالت علاقتها زينه بحمولتها الاولى و عزمتهم على زواجها و كانو يحضرون عزايمها مع زوجها و أهله و زوجها كان متفهم الوضع بما إن فيه أطفال هالعائلة بيظلون يحياة آبي للأبد هذا غير انه يعرف آليكس من الثانوي
الحمولة الأولى وضعهم بداء يرقل الأبو أنطرد من منصبة بعد ثبوت تهمة أعتداءه على بنت جته مركز الشرطة تقدم شكوى ان شخص اعتدى عليها و بما انه الرئيس قدر ياخذ معلوماتها و بياناتها و راح بيتها و اعتدى عليها بعد عساه الموت و رغم ذلك ما واجه إي عقوبات مجرد فصلوه !!!
الأم أعلنت أفلاسها عام 2016 و عم عيالها يقاله أنثوني كان بمشاكل مالية عويصه و أبو العيال كان هاج من الشرطة بقضية نصب و أحتيال
آبي بنت حلال بهالظروف ما تركتهم - ماكانت تدري عن جريمة الاعتداء - و أعطتهم شقه بأحد أرقى أحياء هونغ كونغ قيمتها تساوي ملايين كان ودها ترز أهل عيالها و تضمن إنهم إذا راحوا لعمامهم يكونون بمكان آمن و الدعم ما وقف على مجرد إنها عطتهم شقه لا البنت كانت مخلصة لهم و تعطيهم وش ما يبون
كانت قريبة من ولدهم أنثوني و ساعدته يدخل كذا مشروع لعله ينفع نفسه و يسدد ديونه أنثوني كان معنى المتسلق الاجتماعي كان يكشخ بآبي بالسوشل ميديا و كل أنستقرامه صوره معها و يكتب أنها أخته !
هذا غير إنه ما ينزل صور إلا بأماكن فخمة و سيارات فارهه و ملابس ماركة رغم أنه بالحقيقة ماهو قادر على حق كل هالأشياء بس من بيعلم الأنترنت أنه يكذب ؟
آبي بهالوقت بدأت بالظهور بالسوشل ميديا و البنت من دخلت و هي ضاربه صح إنها بالأنستقرام متابعينها حول 200 ألف بس يقولون فيه برامج خاصة بالصين آبي مره مشهورة فيها و صارت تحضر عروض الأزياء و تجلس بالصف الأول و طلعت بالمجلات الكبيرة مثل فوغ و هاربر بازار
و بدأو يسمونها بالأيقونة و البنت عز الله ذويقه و تقول إذا جاء الموضوع على لبسي ما أذخر شي ولا أخاف أغامر أبد
الحمولة الأولى كانت قاعده تشوفها و هي قاعده تكبر و تنجح و بدال ما يفرحون لها كانو يقولون خير إن شاء الله هذي وراها قاعده تبعزق فلوسها و كانو ينتقدونها بوجهها لوين فلوسها قاعده تروح ! قاعدين ياكلون من فتاتها و لهم وجه ينقدون ادارتها المالية !
آبي كان عندها نظام وهو إن عيالها اللي من آليكس لهم سواق خاص و عيالها اللي من كريس لهم سواق خاص و ببداية هالسنة واحد من هالسواقين ترك الشغل و بلشت آبي هنا حمولتها الأولى قالو لها ورا ما توظفين أنثوني هو كذا كذا ناشبن بحلقك و معك بكل مكان آبي شافت أنها فكرة جيده و وافقت أنها توظفه
آنثوني استلف مبلغ كبير منها ومن زوجها و فتح مطعم و خسر و كانت تدري إن الفلوس ما عاد هي راجعه هذا غير إن الأسرة تصرف آلاف يوميا و كله على حسابها و مره صرفوا 40 ألف دولار بليلة وحده!فيه اللي يقول إن آبي بهالفترة آخيرا عقلت و شافت إن هذولا قاعدين يستغلونها و حبت إنها ترسم حدود خلاص
قررت أنها تبيع شقتهم لكن الشقة كانت باسم أبو زوجها لأن وقت شراءها للشقة كانت عندها ممتلكات و لهالسبب ضريبة الشقة بتكون عاليه جدا بينما لو أنكتبت باسم الأبو الضريبة بتكون منخفضة لأنه أول بيت يملكه و آبي كانت واثقة أنه ماراح ياكل حقها لكن مثل ما أنت متوقع عزيزي المتابع الأبو جحدها
آبي عينت محامي وقال لها إذا أثبتي أنك أنتي اللي دافعه الفلوس حتى لو هي باسم الأبو تقدرين تبيعينها الحموله أنجنت و الأبو قال لآبي والله إن ما سنعتيننا و وفرتي لنا بديل عن هالشقة إن أذبحك!واضح أنهم ما يشوفون مساعدة آبي لهم فضل لا كانو يشوفونه حق من حقوقهم وهي تظل مقصرة!
آبي وعدتهم أنها توفر لهم شقة لكن الواضح إن الشقة الجديدة ما أعجبتهم و هنا الأب قعد يرسم الخطة اللي مخليتني أسولف معاك الحين آبي طلعت من بيتها و مرها أنثوني على أساس تروح تجيب بنتها من المدرسة لكن أهلها أستبطوها و يدقون ما ترد !
و كل مامرت ساعة كل ما أدركوا إن البنت صار عليها شي و أخيراً بلغوا الشرطة اللي تواصلوا مع انثوني يسالونه وين البنت بما انه سواقها ! هنا اتصل آليكس زوجها السابق على أهلها يهاوشهم وراكم ما علمتوني قبل تبلغون الشرطة !
الشرطة بدورها رجعت لكميرات المراقبة وبدات تتبع خط سير آبي مع أنثوني و شافو إن بنص الطريق أنثوني مر أخوه أليكس و ركب معهم ثم توجهوا للشقة بعدها طلع أنثوني و أبوه وراحو أشتروا أغراض من مكان مخصص لحرق الأموات هنا الشرطة قالو لا عاد كذا الموضوع كبر و قرروا مداهمة الشقة
و شافوا اللي ما كان أحد يتوقع أنه يشوفه مهما طال فيه الزمن حصلوهم طابخين رأس آبي و ضلوعها مع جزر وبهارات ! و رجولها بالثلاجة و جذعها ما زال مفقود
حسب الأصابات اللي بجسد آبي يعتقد إن أنثوني ضربها على راسها و فقدت الوعي و بكذا قدروا ياخذونها لشقة مستأجرها الشايب له شهر بمكان نائي بدون ما تصارخ و تلفت أنتباه أحد💔
الشرطة ألقت القبض على الأبو وعياله بتهمة قتل آبي بينما الأم تهمتها الكذب على الشرطة و فيه طرف خامس و هو عشيقة الشايب إيه هالشايب الشين المطفر عنده وحده تعشقه و أنتم لا
ام آبي راحت للشقة اللي قتلت فيها بنتها 💔
طبعا هم عندهم اعتقاد ان الشخص اذا مات بمدينة ثانية لازم يسوون طقوس قبل يعدي على موته ٧ ايام عشان روحه ارجع لاهله !
آبي بذاك الوقت كانت لحالها من غير زوجها و من غير أهلها ثروتها تقدر بـ 17 مليون دولار ففيه اللي يقول دافع هالجريمة إن الشايب يدري إن زواجها هي و كريس ما هو مثبت قانونيا فبحال وفاة آبي الفلوس بتروح لأحفاده اللي لانهم تحت السن القانوني بتصير الفلوس لهم !
بس شخصيا ما أدري ! أحسهم سوو اللي سووه بسبب الحقد لا أكثر و إلا بأي سيناريو بالعالم كانو حاسبين أنهم ما راح ينمسكون !
الأب وعياله كانو بمصايب مع القانون وغارقين بالديون فقرروا ينهون حياتها دامهم طايحين طايحين !
الأب وعياله كانو بمصايب مع القانون وغارقين بالديون فقرروا ينهون حياتها دامهم طايحين طايحين !
القضية ما زالت مفتوحة اي جديد عنها راح اكتبه لكم ان شاء الله
القصص السابقة بالملف التعريفي بالسناب
t.snapchat.com
و تحت هذه التغريدة
القصص السابقة بالملف التعريفي بالسناب
t.snapchat.com
و تحت هذه التغريدة
جاري تحميل الاقتراحات...