رتبها

● مصر دي أغنى دولة في العالم ، بس الحرامية بيحكموها وبيسرقوها
● مصر هي سلة غذاء العالم ، بس طول عمرها منهوبة
● مصر بقالها سبعة آلاف سنة بتتسرق ، ومع ذلك لسه عايشه
🔴 دي شوية الديباجات والأكليشيهات ال كلنا اتربينا عليها وسمعناها حتى في الأفلام والمسلسلات..

فنشأنا وكبرنا واحنا بنتعامل معاها على انها حقيقة مطلقة لا تقبل النقاش
📌 بس يا ترى هل الكلام ده صحيح فعلا ؟؟
🔵 بص كده على الصورة دي وقول لي انت شايف إيه ؟
★ أي طفل في أولى اعدادي هيقولك دي خريطة «قارة أفريقيا» كما تصورها الأقمار الصناعية..

وأي طفل في أولى اعدادي برضه هيقولك ان اللون الأخضر ده هو مناطق الغابات الاستوائية المطيرة حيث تتغطى الأرض بالأشجار والنباتات والحشائش والمحاصيل الزراعية طوال العام تقريبا
وعشان كده تربية المواشي في دول جنوب الصحراء بيتم بشكل شبه ذاتي ومن غير مجهود ولا مصاريف ضخمة في تربيتها..

لأن ملايين الأبقار والأغنام هناك بترعى طول السنة في المراعي الطبيعية الكثيفة بدون مصاريف أعلاف وكُسب ومكثفات غذائية والكلام ده كله
بينما اللون الأصفر اللي بيغطي كامل شمال أفريقيا بيمثل المناطق الصحراوية شديدة الجفاف واللي بتشمل من ضمنها منطقة الصحراء الكبرى وهي الاكبر في العالم.

🔹 ومع الأسف لما نبص تاني على الخريطة هنلاقي «مصر» موجودة في شمال افريقيا ضمن المنطقة الصحراوية الجافة ، وكما هو متوقع و واضح من الخريطة ، فمصر كلها بلد صحراوي باستثناء شريط ضيق جدا لا يكاد يُرى من الخضرة بمحاذاة مجرى نهر النيل..

🔹 ونفس الأمر ينطبق على كل دول شمال أفريقيا (ليبيا- تونس -الجزائر - المغرب) باستثناء شريط ساحلي ضيق من الخضرة بامتداد جبال اطلس على سواحل كل من الجزائر والمغرب نتيجة الأمطار الموسمية. الكلام اللي بقوله ده مش وجهة نظر ولا رأي ولا تحليل ، ده حقيقة جغرافية علمية معروفة للجميع..

وموجودة في كتاب الدراسات الاجتماعية بتاع أولى اعدادي ، يعني مش جايب حاجة من عندي.
ولو كملنا شوية مع درس الجغرافيا الغلس ده هقولك بص كده بالمرة على خريطة قارة أوروبا في الصورة ، هتلاقيها كلها تقريبا خضراء طوال العام ، وكلنا عارفين وفاكرين صور سهول ومرتفعات جبال الألب الساحرة..

اللي بتمر بأغلب دول أوروبا وكلها مناظر طبيعية خلابة ..
المناظر الساحرة دي محدش عملها ولا بذل مجهود ولا صرف عليها مليم واحد عشان تبقى بالشكل الجميل ده اللي انت شايفه حشائش ونباتات طبيعية بتطلع لوحدها كده بشكل عفوي وطبيعي بعد موسم الجليد..

لدرجة انه احدى مشكلات البيوت في أوروبا هي نمو الحشائش والنجيلة في الشوارع وحدائق المنازل بتاعتهم اللي بتلاقيها بتطلع كده في الفواصل والشقوق حتى بين الأحجار والأسفلت بشكل عشوائي ، ولو أهملوها فترة بتنمو لوحدها و تبوظ منظر الشوارع والحدائق والمتنزهات..

شوارعهم مليانة لون أخضر لوحدها من غير ري و أسمدة و اعتناء ..
عكسنا احنا في مصر .. انت لو عايز تعمل جنينة في بيتك بتصرف عليها فلوس كتيرة عشان تشتري نجيلة وبتعمل مجهود جبار عشان تحافظ عليها ، وأحيانا بتضطر تجيب لها تربة طينية من مكان بعيد ، وممكن تضطر تستعمل سماد عضوي كمان..

ومع ذلك كل شوية تبوظ منك و تقعد ترقع فيها ..
حتى نهر النيل اللي هو شريان الحياة بتاعنا هنا في «مصر» يعتبر واحد من أفقر الأنهار العالمية في تدفقاته المائية (الايراد السنوي للنهر) رغم انه يعتبر أطول الأنهار في العالم (6671 كيلومتر) ، لكنه رغم ذلك فهو نهر فقير مائيا..

يعني طويل على الفاضي ، حيث لا يزيد ايراده السنوي بكل روافده عن 1600 مليار متر مكعب عند المنابع ، بيضيع الجزء الأكبر منها في المستنقعات الشاسعة المنتشرة على طول المجرى خصوصا عند جنوب السودان ومنطقة بحر الغزال وبحر الجبل وغيرهم ، دا غير بخر المياه نتيجة درجات الحرارة المرتفعة..

ومروره في وسط مناطق صحراوية شديدة الجفاف ، ومش بيوصل لك من المنابع دي هنا في مصر اللي هي دولة المصب من الإيراد السنوي ده غير 84 - 91 مليار متر مكعب عند بحيرة ناصر ، يعني قبل السد العالي ، ودول بيتقسموا بيننا وبين السودان بحيث يكون نصيبنا منها 55.5 مليار متر مكعب..

مقابل 18.5 مليار متر مكعب للسودان - بصرف النظر حتى عن موضوع سد النهضة ، بينما عندك نهر زي «نهر الكونغو» بيرمي فوائض مائية عند مصبه في المحيط الأطلنطي تقدر بـ ألف مليار متر مكعب من الماء سنويا ، لدرجة ان المياه العذبة تمتد لتصل إلى مسافة 30 كيلو متر داخل المحيط..

ويكفي أن تعرف أن غزارة تدفقاته المائية تقدر بـ 41700 متر مكعب من المياه في الثانية ، في مقابل نهر النيل اللي بتبلغ غزارة تدفقاته المائية 2830 متر مكعب في الثانية ، أي أنه أغزر من نهر النيل بخمسة عشر مرة..

عندك مثلا دولة زي «الـهنـــد»، اللي فيها أكتر من 45 نهر باجمالي تدفقات مائية أكثر من 8200 ملياااااار متر مكعب، بل ان بعض هذه الأنهار بتتكون فيه أمواج مثل أمواج البحر من شدة التيارات المائية فيه وبيصل عمق بعضها الآخر لحوالي 120 متر..

ودا بيخلي نصيب الفرد من المياه في الهند أكثر من ألف متر مكعب سنويا ، يعني أكتر من ضعف نصيب نظيره المصري ، رغم الفارق الهائل بين تعداد سكان الهند الملياري (1400 مليون نسمة)، وبين تعداد مصر السكاني اللي هو 105 مليون نسمة ، يعني أكبر من تعداد مصر بـ 14 ضعف..

🔸دا غير طبيعة الأرض في الهند واللي أكتر من 70% من أراضيها هي أراضي خصبة وصالحة للزراعة طوال فترات السنة، بل ان بعضها بتتم الزراعة فيه على مياه الأمطار الأستوائية الغزيرة بدون أي مجهود يُذكر ، وكفاية عليهم بس سفوح جبال الهيمالايا اللي هي من أخصب أراضي العالم..

و جاهزة للزراعة بالمياه الناتجة من ذوبان جليد الجبال بدون سماد أو مخصبات أو أي اضافات
الهند دي فيها غابات بمساحة بلدك كلها ، لدرجة ان الفيلة والقرود هناك بتأكل يوميا أعشاب وفواكه تساوي مجموع ما يأكله سكان الوطن العربي في شهر كامل..

نفس الكلام ينطبق على دولة زي «البرازيل» اللي بتبلغ مساحتها 8.5 مليون كيلومتر مربع ، يعني أكبر من مساحة مصر 8 مرات ، وأغلب هذه الأراضي الشاسعة هي أراضي خضراء ومراعي طبيعية نتيجة وجود موسم الأمطار الاستوائية الغزيرة ووجود «نهر الأمازون» اللي هو واحد من أكبر الأنهار في العالم ..

وعنده 1100 رافد بيغذيه بالمياه العذبة ، لكن الأهم من طوله انه يعتبر واحد من أغزر الأنهار من حيث التدفقات المائية ، حيث تبلغ غزارة نهر الأمازون حوالي 206 ألف متر مكعب في الثانية ، أما نهر النيل فيبلغ 2830 متر فقط في الثانية ، أي أن نهر الأمازون أغزر من نهر النيل بـ 68 مرة ..

انت متخيل الفرق الرهييب ده شكله إيه ؟
وده اللي بيخلي عرض نهر الأمازن عند المصب 11 كم ، أي أعرض من نهر النيل بعشر مرات كاملة ، وبيؤدي لتوافر الأراضي الخصبة الشاسعة اللي تقدر بعشرات الملايين من الأفدنة..

العوامل الطبيعية دي اللي محدش له يد فيها جعلت من البرازيل سلة مراعي العالم بلا منازع ، وعشان كده الثروة الحيوانية فيها من مواشي ودواجن مزدهرة جدا وبأقل التكاليف ، لأنهم يزرعوا ملايين الأفدنة سنويا بفول الصويا والذرة اللي بيستخدموا كعلف للمواشي والدواجن..

والزراعة دي بتتم في مراعي طبيعية على مياه الأمطار ، وبالتالي فتكلفتها منخفضة جدا.
❇️ الناس مش قادرة تفهم اننا دولة صحراوية و عندنا فقر مائي شديد ، وحتى النهر الوحيد اللي عندنا نهر فقير مائيا وضعيف في الايراد بتاعه..

وانه لولا شوية المياه القليلين بتوعه دول مكانش هيبقى فيه فرق خالص بينا و بين جغرافية ليبيا والجزيرة العربية و كل دول الصحراء الكبرى، بدليل ان معندناش أي غابات أو مراعي طبيعية؛ والدليل الخريطة المرفقة بالسرد واللي بنشوف فيها اللون الأصفر الصحراوي بيطغى على كل منطقة شمال أفريقيا..

ومن ضمنها مصر طبعا ، بعكس وسط أفريقيا المغطى تماما باللون الأخضر نتيجة كثرة الغابات الاستوائية المطيرة فيه.
نفس المشكلة برضه بالنسبة للثروة السمكية .. صحيح انت عندك سواحل طويلة طولها آلاف الكيلومترات ، بس سواحل فقيرة جدا في الثروة السمكية ،،

بدليل اننا كل شوية نسمع عن مشكلة صيادين مصريين اتقبض عليهم لأنهم كانوا رايحين يصطادوا في تونس أو ليبيا أو الجزائر أو اليمن والصومال على بعد آلاف الكيلومترات منا
فيا ترى الصيادين بتوعنا بيسافروا المسافات الطويلة دي كلها ليه لو كانت سواحلنا غنية بالأسماك زي ما بيحاولوا يوهموك ؟...

غاويين شحططة وبهدلة مثلا ؟ واللا هما بيسافروا كل المسافات دي عشان بيدوروا على كنز القرصان مرجان ؟
حظنا ان السمك مابيحبش الموقع ده خالص و بيفضل أماكن أخرى في العالم .. وتفسير الوضع ده بيرجعه البعض نظرا لكون مصر لا تقع في مسارات التيارات البحرية «Ocean Currents»..

التي تساعد على تجمع وتكاثر الأسماك زي إللي موجودة عند المغرب واليابان وروسيا ، مثل تيار «كمشتكا» البارد في المغرب على سواحل الأطلسي و الذي يتسبب في توافر المواد المغذية للأسماك «البلانكتون» ، وهو ما يؤدي لتجميع كميات كبيرة جدا من الأسماك..

و لهذا مثال تجد أن«المغرب- Morocco» من أكبر الدول العربية والأفريقية في الثروة السمكية وخصوصا سمك «السلمون» الذي يتواجد في أسراب ضخمة للغاية تصل لعدة ملايين في السرب بسواحل المحيط الأطلسي المغربية لذلك نجد «المغرب» تصدر85% من إنتاجها و تحتل المركز الـ13عالمياً في مجال صيد الأسماك

و فيه تفسير تاني انا مش متأكد منه بيقول ان وجود مصر في مسار السفن التجارية العملاقة نتيجة وجود قناة السويس هو السبب في الظاهرة دي .. الله اعلم ، إنما ده الواقع أيا كان التفسير
بدليل ان اجمالي إنتاج مصر من الأسماك 2 مليون طن في عام 2022..

منها 1.6 مليون طن من المزارع السمكية ، بنسبة 80%من الإنتاج
ونحو 400 ألف طن من المصايد الطبيعية ، بنسبة 20% من الانتاج
يعني 80% من انتاج الأسماك المصرية بتكون أسماك مزارع ، ودي محتاجة أعلاف مستوردة ورعاية بيطرية وتربية زريعة وصيانة للأحواض السمكية..

وتزويدها بالأكسجين عبر مضخات وتنظيفها من المخلفات ، وكل ده عايز أيدي عاملة وميكنة وخلافه
بعكس مثلا السمك اللي بييجي من «روسيا» ودول شمال أوروبا ، واللي بيعيش في مصايد طبيعية وبيتغذى على الطعام البحري الطبيعي المتوافر بكثرة وببلاش تماما..

يعني مش بيحتاج نديله أعلاف ولا لقاحات بيطرية ولا كل الحاجات دي اللي بترفع سعره من المنبع ، دا غير تكلفة الأيدي العاملة وتكلفة انشاء المزارع السمكية وصيانتها زي ما شرحنا ، وعشان كده السمك الروسي والصيني وغيره بيبقى سعره أرخص من سعر مثيله المحلي في مصر..

حتى بعد اضافة تكلفة النقل والشحن والتبريد..
📌 يعني انت بلد موارده الطبيعية شحيحة جدا ..
● أمطار قليلة ..
● نهر ضعيف وفقير مائيا..
● أراضي زراعية محدودة ..
● صفر مراعي وغابات ..
● سواحل بتطل على بحار فقيرة بالسمك..

● السكان متركزين في منطقة ضيقة وبيتزايدوا بمعدلات رهيبة تفوق أي معدلات للتنمية..
فأرجوك تبطّل تفكير بطريقة القروي الساذج البسيط وهو قاعد ومدلدل رجليه على الترعة فى بلدهم .. افتح كتاب الجغرافيا بتاع أولى اعدادي واعرف شوية الحقائق البسيطة دي قبل ما تتكلم وتهبد
محمد حافظ

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد