امبارح بالليل كانت في حفله في حلتنا وطبعا الواطه كاتمه وسخانه وباعوض وزهج وقرف ومافي نوم بالوضع دا ومع الحفله المزعجه دي فقلت النمشي اعاين فيها حبه واجي راجع احاول اتخمد انوم ف مشيت لقيت الاعمي شايل المكسر الحوش ضيق والخلق مردومه فوق بعض زي الشوالات
والعريس والعروس قاعدين هنااااك براهم كأنهم مطردوين من حفلتهم دي وزعلانين لمن وشهم محمر من الزعل انا ماعارف المزعلهم شنو في اسعد يوم في حياتهم اما النسوان كانوا حاتنو قرض برقصوا ب اهمال ورقيص كلو اشتر الواحده بتفرفر وترتر وعاوجه خشما ومنططه عيونا ماتعرفا بترقص ولا كافتا شيطان
ودا طبعا غير لبسهم الماعندو علاقه ب لبس الحفلات اطلاقا نوعية البتلقاها لابسه فستان اصفر ومعاهو طرحه حمرا عباره عن كبسولات مضاد حيوي دا غير التياب الفيها البتاع البرقش وبلمع براهو داك تحس بيها فضية عده ملانه فناجين وصحانة بايركس والفنانه واحده كدا عااااااتيه ومنفوشه
عباره عن صيوان وفيها حلقوم يااعوذ بالله صوتا زي الرعده لمن تقول هييييييي الصفقه فووووق بحس بمصاريني كلها جات وقفت لي في حلقي ورجعت تاني فجأه جا واحد سكران اسمو عبدو لابس برمودا وفنيله داخليه فقط وشايل سكين نص متر في يدو وماشي سبعه تمانيه يترتح وقف في نص الداره ورفع سكينو فووق
وقال هوووووس ولابغم ولا تررم لا حلفة بعد اليوم ياقوم طبعا الفنانه الجهامه دي خافت وسكتت ومفروض هي ماتخاف اصلا لو الناس دي كلها خافت لانو زي عبدو دا ممكن تركسفو وتعجنو وتختو تحت اباطا عادي فااا الجو التهب التهاب حاااد ناس الحله كلهم عارفين انو عبدو دا زول شر واهوج ومجرم
وممكن يرتكب جريمه عادي فمافي زول اتجرأ ومشي طلعو بره يلا انا الشليق ورشيق ودايما بخت نفسي في مواقف بايخه قلت امشي اتفاهم معاهو بالهدواه واحاول اطلعو مايخرب للناس حفلتهم ساي هم براهم العريس والعروس زعلانين وبطنهم طامه وماعارفين المزعلهم شنو ف مشيت ليهو قلت ليهو اووووو عبدو الكلس
اتلفت عاين لي وتف لي في وشي قلت الصبر كويس مسحت التفاف من وشي وحاولت ابتسم ليهو واحسسو بالامان قلت ليهو شنو ياعبدو ياخ انت ماعرفتني ولاشنو؟ قال للاسف عرفتك والله عشان كدا تفيت ليك في وشك انت وشك دا مخلوق اصلا عشان يتفوا فيهو قلت ليهو لالا دا ماعبدو حبيب الكل الانا بعرفو
انت اتغيرت شديد ياعبدو ولازم يكون في سبب مزعلك احكي لي ياعبدو انت مالك؟ فجأه قعد يبكي ويتشنهف قال لي امي ماتت وخلتني يتيم ماعارف الواو الضكر من النتايه طبعا امو الببكي عليها هسي دي ماتت من سنة 88 مع الفيضان والله وهو اصلا ماعارفا ولا بتذكرها بس هفت ليهو ساي
قلت ليهو الله يرحما ويغفر ليها ادعي ليها ياعبدو ماتبكي البكا مامنو فايده قال لي انت اهبل؟ اقول ليك ماتت تقول لي ادعي ليها؟ قلت ليهو ايوه ادعي ليها ياعبدو اصلو الميت اهلو بدعوا ليهو قال لي انت حمار؟ دا شنو الزول الحمار دا؟ انت عارف انو انا بكرهك ولا ماعارف؟
قلت ليهو عارف قال لي طيب وقت عارف بتقول لي ادعي ل امك ليه؟ انا حصل يوم واحد جيتك قلت ليك ادعي ل امك ؟ قلت ليهو لا ماحصل قال لي خلاص ماتتحشر بيني وبين امي قلت ليهو تعال دايرك بره دقايق قال لي انا مادايرك ومابطلع من هنا ومافي حفله ح تشتغل ولو عايزني اطلع شيلوني في كتوفكم لفوا بي
سبعه مرات خلوني ابشر في الجماهير قلت ليهو كدا بس؟ غالي والطلب رخيص ياعبدو نشيلك ونص ناديت واحد معاي وشلناهو في اكتافنا وبقينا لافين بيهو وهو يبشر في الناس بدون اي غنا او موسيقي قال ودوني ع العرسان عشان ابارك ليهم وديناهو للعرسان وهو محمول ع الاعناق
قال للعريس سالتك بالله الجابرك ع العروس الوشها محفر زي طبق البيض دي شنو؟ اشهد عليك انك عارض وربنا غضبان عليك طبعا العروس من حلتنا وهو بكره ناس الحله كلهم من طرف ف قمنا اتخارجنا بيهو من قدامهم قبل يجيب ليهو هجيمه اكبر من دي وطلعنا بيهو الشارع نزلناهو بره وخليناهو مشي ع بيتهم
وجينا راجعين والحفله اشتغلت تاني والناس هججت وانا قاعد في كرسي وفرحان ومفتخر غاية الفخر انو حليت المشكله دي وكبرت في نظر الناس وفجاه اسمع ليك دزززززز في راسي لمن ضقت طعم الدم في خشمي اتلفت عليهو وانا ماسك راسي لقيتو دا عبدو جا راجع وهرس لي كرسي بلاستيك في راسي
يلا بقيت اشوف ليك خيوت خيوت وحاجات تنطط كدا والكراسي كلها لافه والكشافه ضاربه في وشي سامع الناس يكوركوا لي انت كويس؟ قلت ليهم انا كويس بس ودوني ع الضل من الشمس قالوا لي ضل شنو وشمس شنو؟ الدنيا ليل ومافي لاشمس ولا ضل اصلا ودي اخر حاجه متزكرها غمرت ع كدا
ولمن صحيت لقيت نفسي في بيتنا وراسي ملفوف ب ملايه و وارم وينتح ويشح براهو ومااطول الليل ع الانسان حين يكون راسه وارما ...
(سليمان الجعلي )
(سليمان الجعلي )
جاري تحميل الاقتراحات...