مره كدا اشتغلت مع واحد قريبنا عندو جزاره كبيره وهو زول جلابي وربنا راضي عليهو وعاتي ليهو فقره عاد كيفن ماببقي عاتي ومقفل تقفيل ومصمت تصميت وهو جزارتو في اليوم بتبيع 5تيران و15 خروف دا غير الكمونيه والكبده والكلاوي واللحمه المفرومه فا البفضل كلو بديهو كرشتو الزي الدولاب دي
يشيل ويردم فيها لمن اتورم ورم واتنفخ نفخ ووصل مرحله بقي ينوم وهو واقف وهو قاعد وهو سايق كمان عادي بنوم الشبع كعب يااخوانا الله يتوب علي ساي. بس الزول دا ربنا ابتلاهو بالشراب بعد يضرب لحمتو دي بسكر بقيف النبق وماهو براهو اغلب الجزارين ديل بسكروا عشان يهضموا اللحوم دي
فاااا اشتغلت معاهو والشغل عجبني شديد انا من طفل وكانوا بسالوا الاطفال لمن تكبر ح تبقي شنو البقول ح ابقي دكتور والبقول مهندس والبقول طيار الا انا كنت بقول لمن اكبر عايز ابقي جزار وقد كان. ف نفسيات ساي كدا كونك تكون وسط اللحوم دي معنوياتك بتترفع وقلبك بتقل ويطمن
اها بقيت وانا شغال الحته البتعجبني كلها بدسها في التلاجه سن البرق وسنكيته وفخده صافيه ومعاها قطعة كبده وقلب وكم كلوه كدا واخر اليوم لمن امشي بيتنا بشيلو كيس مكتف كتيف فيهو قريب 3كيلو ف بوصل البيت وبملص هدومي جت عليهن واقعد بالفنيله الداخليه
واجيب كانوني اولعو في نص الحوش واعزل سن البرق والفخده واعملها شية جمر مسافة تجهز شية الجمر بدخل جوه في البتوجاز بلم العضام وباقي اللحم وبشدها شوربه تقييييييله لو قالوا ليك شيلها مابتشيلها بخليها تجقجق وتغلي قبلها وفي عين البتوجاز التانيه بخت الطوه
واقطع الكبده والقلب والكلاوي دقاااااق واكب زيتي وارمي فيهو الكبده اديها قليبه والحقها ب بهاراتا وتوما وصلصتها وبجدع معاها قرن شطه وبرخي ليها النار عشان تتسبك ع نار هاديه وبجري الحوش اقلب شية الجمر مسااااااافه واقوم جاري المطبخ تاني اظبط شطتي الخدراء بالدكوه والليمون واحش البصل
واغسل سلطتي الخدراء واحشها واجهزها وبخليها وبجري الحق الكبده بنزلها وبخت مكانا حلة رز افلفلو بسرعه عشان ارشو مع الشوربه المركزه القاعده تجقجق دي اهاااا لمن الحاجات دي كلها تجهز بجيب كيس عيشي واجي افرش فرشتي واقول كدا اتفرجخ ليك فيها واقول بسسسسسسسسم الله هبشك الماضراك
وابدا العزف ياااه يااه يااه امانه انا ماعزفت عزف في الحياة الدنيا دي عديت معاهو شهرين ونص انا كل يوم بالبرنامج دا ومرات بجيب الكوارع كمان اربعه كرعين تور بظبطن واديهن قرني وحات الله الفتره ديك انا بقيت اشخر براي زي الركشه ودمي وصل 98 نسبة تدخل الطب وسمنت واتبقبقت وبقيت نااااااير
وجسمي دا نازي نزوزه من الدهون دي ويسالني الله تغيت تغي عديل كدا بقيت احدر للناس واحمر ليهم بلا سبب ماخلاص بقيت متوحش وسعران وعايش في نص الدم والضبح والسلخ وكمان شبعان والله بقيت افتش للمشاكل فتيش ومالاقيها اها شفتوا ابوي البكرهني هسي وماطايقني دا
وحات الله شبعتو شبع بقي مابتغدا مع ناس البيت يرجاني لمن انا اجي الساعه 10 واظبط اموري واناديهو ياكل معاي شوف عيني دي ابوي دا بقي يتريض بالعصريه وياخد ليهو جكه لحدي الزلط ويجي راجع الشبع بعمل بعبعبه يااخوانا وماهو براهو ناس البيت البمغرزوا فيني ديل برضو شبعتهم
بجيب ليهم كمونية التور قااااااافله بلهطوا فيها اسبوع وهاك ياكوارع وهاك ياجقاجق وهاك يالسان بقر فيهو 2كيلو ونص وهاك لحمه صافيه من الورك الوراء وهاك ياام فتفت ياخ ديل بقوا ينروا براهم زي الكدايس وبعد دا ماطمر فيهم اكلوا خيري وحبوا غيري بس مافي عوجه تب بجي الخريف واللوراي بتقيف
بس نان انا تاني بعبرهم؟ وحات الله البلقاهو واقع في الشارع دا من الجوع ماارفعو اهاااا الامور طيبه وباسطه عديل كدا ف يوم اسود واكلح واغبر وماعندو ملامح كدا وانا خلاص عبيت كيسي وداير اقفل الجزاره واتخارج يجيني ليك سيد الجزاره زاتو سايق عربيتو قال لي قفل وارح اركب اوصلك البيت
ف قفلت وجيت ركبت معاهو ومشينا قام نزل من الزلط ودخل بي اتجاه المزراع حته خلاء كدا ومقطوعه والدنيا ليل قلت ليهو انت ماشي وين ياخال؟ قال لي غاشي المزرعه دي عندي قروش عجول داير اديهن سيدن ونمشي طوالي يلا ونحنا ماشين وهو سايق قام طلع قزازه كرستاله من الدرج شربا كلها وجدعا فاضيه
وتاني طلع واحده شربا وجدعا وبقي مكشر وشو زي العندو امساك وكاضم وانا ساكت ساي قلت اخير اسكت منو عشان السكره ماتربط معاهو يلا فجأه قبض فرامل ب كلو لمن انا دقيت في الطبلون ب راسي ومسافة رفعت راسي من الطبلون لقيتو خاتي لي المسدس في مضاغتي خشم المسدس ساااااااااقط
طبعا خلاص عصبي كلو مات وحيلي انبتا ورقدت دلقون بحاول ارفع يدي بتقع مني بحاول اجر كراعي ف كأني بجر في كراع زول تاني ماكراعي انا عباره عن شلل رباعي حاولت اتكلم لقيت شلاليفي يابسات كاويقه ومسمغات وملصقات ومخيتات خياطه وخشمي شبك شبكة العدو يالله ويا مين قدرت فكيت حنكاتي
وقلت ليهو وانا مخنوق خنق بالعبره صلي ع النبي ياخال وزح مني المسدس دا السلاح معاهو الشيطان ياخال انعل ابليس قال لي بصوت زي الرعده انا معرسك؟ عاقد عليك انا؟ والدك وناسيك؟ كل يوم بتملي اكياسك لحم وكبده وكوارع 4كيلو انت داير ترثني وانا حي؟ انت قايلني انا ماعارفك ولا ماشايفك؟
ذنبي شنو انا كل يوم خسران 4كيلو و5 كيلو بسببك انت؟ انت زول ولا سحار؟ بس خلاص الليله بفرطق مخك وارتاح من قدومك الزي قدوم التمساح دا تبلع سااااااااااي لواكه مابتلوك الجزاره دي حقة ابوك؟ وقال كدا عمر لي المسدس في اضاني كرج رج طبعا الزول سكران راقد طينه وماواعي
اها والله وبالله لمن سمعت تعميرة المسدس دي كرج رج في اضاني ماح اقول ليكم انا عملت شنو في هدومي بس الساتر الله ساي وخلاص العصبه انشحطت لي من صرتي من تحت وماشه طالعه لمن وصلت قلبي انا اصلي لمن اتوتر ولا اخاف قاعده تنشحط لي العصبه دي واكيد يوم ح تنشحط لي شحطة تلحقني امات طه
دا اذا مالحقتني طه زاتو مش اماتو اها تعال شوف البكا والتحانيس طقيت الكوراك التوووووووبه ياخال اعفا لي ياخال وحااااات الله تاني مابشيل لحم يلا هو بقي يجعر زي المرفعين ويكورك اووووووووووووا ويكورك انا ود اب كروق خراب السوق انا الجرقندي ود شندي انا تور عطبره الحارس القنطره
انا الجعلي السم البغلي اوووووووا وانا بهنا خلاص الا اغتسل غسل جنابه واتعقم تعقيم عديل كدا بقي يلولح لي في رقبتو الغليده دي ويقول لي بتاكل لحمي انت يافار التبس ولادة المغس؟ اثناء لوليح رقبتو دي المسدس وقع من يدو دنقر يفتش ليهو واقول كدا افتح الباب واقع بهناك واقوم ع حيلي بسرعه
وانطلق ليك جري بالخلاء دا ودقيقه مافي الزخيره الحيه دورت وراي عليك امان الله قولة طراخ دي لمن وقعت ع قدومي في الواطه انغزيت بقدومي زي الابريق في الطين وتاني قمت ابحت واكربش وانطلقت جري والحمدلله الواطه مضلمه وهو ماشايفني وسكران مابقدر يجري يكورك لي اقيف ياكلب شارد وين؟
الليله بخليك غربااااال وتاني فكا ليهو طلقه طراااخ وتاني اندرشت ع خشمي لمن حنكي اتزلط وقمت اكربش وانطلقت جري جريت جري الوحوش لمن وصلت الزلط مسكتو من نصو زي الاسعاف واقول كب وحات الله ماوقفت الا في باب بيتنا دفرتو وانحشرت اوضتي قفلت الباب وطفيت اللمبه ورقدت واتغطيت ب بطانيتي
عيني مالاقت للصباح بقول بجي لاحقني يديني طلقه في نص جبهتي يبقيني زي شاروخان اها الحمدلله ماجا لاحقني وطبعا مامشيت الشغل جاني في البيت اعتذر لي واتأسف لي قال لي انا كنت ماواعي وماقاصد واعفا مني و تعال راجع شغلك قلت ليهو انا تاني لو شحدت الكرامه بالجوامع بشتغل معاك؟
يشتغلوا فيك الدكاتره بركة الله....وبكدا انتهت احلي ايام عز وشبع عديتا في حياتي ...
[سليمان الجعلي]
[سليمان الجعلي]
جاري تحميل الاقتراحات...