يعني هي الحكومة مش عارفة تستورد أعلاف علشان الدولار، بس عارفة تستورد فراخ برازيلي بنفس الدولار عادي؟
سؤال وجيه من إنسان محترم، بس غالبا ماتابعش أخبار بقاله 3 شهور
هي مشكلة الفراخ دلوقتي مشكلة دولار يا عزيزي؟
أزمة تكدس البضايع اللي كان سببها أزمة الدولار، اتصفت من شهر تقريبا،

وفي بضايع خرجت بأكتر من 10 مليار دولار خلال آخر 3 شهور، والبضايع الجديدة بتدخل عادي.. فأصلا مشكلة الدولار انتهت والعملة بقت موجودة..
الدولة المصرية مابتلجأش لحل الاستيراد أو التدخل بزيادة المعروض عادة إلا في حالتين: إن يكون في أزمة أكبر من قدرة السوق فمطلوب "زقة"،

وإن يكون في مبالغات من بعض التجار بتضر المستهلك..
احنا في أنهي حالة؟
مش أنا اللي هجاوبك، اللي هيجاوبك هو الأستاذ عبد العزيز السيد رئيس شعبة الدواجن في الغرفة التجارية اللي قال إن في مبالغة من بعض المربين في أسعار الفراخ، علشان يعوضوا خسائر الفترة اللي فاتت..

فبالتالي، حتى لو في مشكلة علف أو لسه الحل ماسمعش في السوق بشكل كامل، لكن في عامل بشري محتاج تدخل بشري بردو، وده اللي خلى الدولة تستورد علشان تزود المعروض فتسيطر على الأسعار..
وبالعقل والمنطق، لو افترضنا جدلا إن في جهات في الدولة قررت "تمصلح" من ورا الأزمة،

تفتكر هيمصلحوا في حاجة كل الناس شايفاها وبتمس الأمن الغذائي؟ ده لو افترضنا يعني إن الاستنتاجات النبيهة دي ليها أي أساس من الصحة..
المشكلة إن في ناس بتستقي معلوماتها من "التعليقات" اللي على السوشيال ميديا، مع إنه لو دور هيلاقي كل المعلومات متاحة عادي جدا!