رتبها

هل فعلًا قارة إفريقيا هتتقسم لقطعتين زيّ ما بيقولوا ..؟
إزّاي يعني ..؟
طب وإحنا ..؟
ولو آه، هل نبدأ نخاف دلوقتي ..؟
هنا هحكيلك كل حاجة بس بما إنّك جبت النيسكافيه بتاعك ومستنيني، فخلّيني الأول أفرشلك الفرشة العلمية التاريخية الچيولوچية للموضوع من قدم الأزل ..

وهبدأ إنّي أقولك إن من حوالي ٣٠٠ مليون سنة تقريبًا كانت اليابسة كلها عبارة عن قارّة واحدة فقط، مجرد كتلة واحدة لازقة كلّها في بعض وأُطلق عليها (بانجايا) ودي كلمة يونانية قديمة بمعنى (كل الأرض)، وكانت (بانجايا) دي مُحاطة بمُحيط واحد هائل اسمه (بانثلاسّا)..

ونفس الكلام، دي كلمة يونانية قديمة تعني (كل المياه)، ودي اللّي جه منها بالمُناسبة (ثلاسوفوبيا) اللّي هو (الخوف من المُحيط/البحر)، المُهم إن المُحيط الهائل دا هو أصل المحيطات الحالية، وفي الفترة دي كانت أغلب يابسة الأرض متمركزة في النصف الجنوبي منها..

قبل ما تبدأ القارات دي في الإنفصال والتباعُد عن بعض من حوالي ٢٠٠ مليون سنة .. طب إليه اللّي حصل خلّى العالم يوصل للمنظر الحالي اللّي كلّنا عارفينه في الخرائط دا والقارات بعيد عن بعض كدة ..؟
بكل بساطة وبدون الدخول في تفاصيل علمية قد تكون مُعقدة هحكيلك واحدة واحدة ..

الأرض بتتكوّن من ٤ طبقات، هيهمنا منهم أول طبقتين بس هقولك عالـ ٤ من باب العلم بالشيء، وهم بالترتيب كدة الـ Crust أو (القشرة الأرضية)، ودي اللّي إحنا عايشين عليها ودي في منها نوعين نوع (مُحيطي) تحت المُحيطات ونوع (قاري) تحت اليابسة..

تحتيهم الطبقة التانية اللّي تُسمى الـ Mantle أو (الوشاح) ودي بتكوّن حوالي ٨٤% من إجمالي حجم الكرة الأرضية، بسُمك يقرُب إلى الـ ٣٠٠٠ كم، ودي مقسومة لطبقتين فرعيتين تحت بعض، الأولى (وشاح علوي) واللّي بعدها (الوشاح السُفلي)..

بعدهم الطبقة التالتة ودي مقسومة لطبقتين رئيسيتين الأولى تُسمى Outer Core (لُب الأرض الخارجي) والأخيرة هي الـ Inner Core أو (لُب الأرض الداخلي) ..
تعالى بقى نمسك الطبقتين اللّي قُلنا عليهم دول ..

(القشرة الأرضية) دي من اسمها تخيّلها زيّ قشرة بيضة مسلوقة، طبقة رفيعة جدًا وباردة مُقارنةً باللّي تحتها وعشان كدة إحنا قادرين نعيش عليها، وسُمكها متفاوت حسب موقعها فتلاقيها على اليابسة بتصل حتّى ٦٠ كم عُمقًا، بينما تحت المُحيطات مُمكن يصل سُمكها حتى ٥ كيلومتر بس ..

تحت الطبقة دي زيّ ما قلنا بتبدأ طبقة النص العلوي من (الوشاح) اللّي اسمها (الوشاح العلوي) ودي اللّي عليها العين بقى ..
الطبقة دي نفسها بردو مقسومة إتنين، القسم اللّي فوق الأقرب للقشرة عبارة عن (غلاف صخري) شبه (القشرة الأرضية) كدة..

واسمه Lithosphere بس مُرتكز على النص التاني اللّي بيُطلق عليه اللّي هو الـ Asthenosphere أو (الغُلاف المائع) أو (الغُلاف الموري) ودا درجة حرارته بتبقى أعلى من اللّي فوقيه بتصل إلى درجة إنصهار الصخور نفسها، فبالتالي حالتها بتبقى شبه سائلة مش صلبة أوي زيّ طبيعة الجُزء اللّي فوقيها.

تخيّلها عاملة زيّ عجينة الكيكة كدة بعد ما تخلطها وقبل ما تحطّها في الفُرن بالتالي تُعتبر المنطقة دي هي الأضعف بعُمق قد يصل إلى ٢٠٠ كيلومتر، وفي بعض الأحيان لأعمق من كدة حتى ٤٠٠ كيلومتر بحالهم ..

الغلاف الصخري اللّي تحت القشرة على طول دا بقى بيتقسم إلى ٧ أقسام كبار و١٢ قسم صغيرين، وكل قسم بيُطلق عليه (لوح) أو (صفيحة) فيما تعرفه إنت باسم (الصفائح/الألواح التكتونية) أو Tectonic Plates ..

الصفائح التكتونية دي زيّ ما خدت بالك إنت إنهم حرفيًا (بيعوموا) على الطبقة شبه السائلة دي اللّي اسمها (الغلاف الموري)، فبالتالي بيتحركوا مع حركة السائل اللّي تحتيهم دا، بس هل الحركة دي سريعة ..؟ يعني نقدر نحسّ بيها ..؟ هقولك لأ، دي حركة شديدة البُطئ..

لدرجة إن الألواح أو الصفائح دي بتتحرك بمُعدّل متوسط ٢ إلى ٣ سم وحتى ١٠ سم وأحيانًا حتى ٤٠ سم في السنة، مُتخيل ..؟ والحركة ي بتحصل إمتى ..؟ قولتلك إن الحرارة عالية جدًا تحت فالصخور والمعادن بتنصهر فكثافتها بتقل فبتطفو لأعلى وينزل مكانها الصخور والمعادن اللّي لسّه صلبة..

فالحركة دي بتعمل تيار كدة شبه تيار الميّاه اسمه (تيارات حمل) والتيارات دي بتحّرك السائل دا فبالتالي بتحرّك الصفائح اللّي بتطفوا عليه دي ..
.
بس بردو هقولك إنّ بالرغم من إننّا مش بنحس بحركة السائل دا ولا الحركة الطبيعية للألواح دي، بس أحيانًا بنقدر نعرف إنّهم إتحرّكوا، ودا ليه ؟

عشان الحركة بتاعتهم دي هي اللّي بتُسبب الزلازل وخاصةً المُدمرة منها، يعني كل البلاد والمُدن اللّي بتُقع فوق نقاط إلتقاء الصفائح التكتونية دي هي الأكثر عُرضة للتعرض للزلازل والبراكين لمّا الألواح دي بتتحرّك تحت ..

عايز أوضحلك بقى إن الصفائح السبع الرئيسية دي متسمّين غالبًا بموقعهم، وهم الصفيحة الإفريقية، والقطبية الجنوبية، والأوراسية، والهندو-أُسترالية، والأمريكية الشمالية، وصفيحة المُحيط الهادي، والأمريكية الجنوبي، الصفائح دي هي اللّي الكوكب متشال عليهم بقاراته كلها..

ولمّا الصفائح دي بتتحرك، مش بتتحرّك عشوائيًا كدة،لأ دي بتتحرّك في ٣ أنواع رئيسية، هيهمنا أول نوعين بس عشان مصدّعكش بالباقي ..
.
الأولى اسمها حركة (مُتقاربة) أو Convergent ودي من اسمها، لمّا صفيحتين مُتجاورتين بيقربوا على بعض..

فلو واحدة مُحيطية وواحدة قارية، المُحيطية بتنزل تحت القارية عشان كثافتها النوعية أعلى فبتنزل لحد طبقة (الوشاح) المُنصهرة اللّي قلنا عليها، فتنصهر هي كمان ويتكّون مكانها فوق على السطح هبوط كدة أو أخدود ومثال عليها أخدود (بيرو - شيلي) في أمريكا الجنوبية..

ولو الصفيحتين زيّ بعض، مُحيطيتين فاللّي كثافتها أعلى بتنزل تحت اللّي كثافتها أقل، وبتعمل فوقيها (صدع) زيّ (صدع سان أندرياس) اللّي في فيلم بنفس الاسم بتاع (دواين چونسون) أو The Rock لو شوفته وصدوع (البحر الميت) ..

طب لو الصفيحتين قاريتين بقى ..؟ هتلاقي إن الإتنين بيخطبوا في بعض وواحدة بردو تنزل تحت التانية وترفعها لفوق والجُزء اللّي بيرتفع دا بيرفع كل اللّي فوقيه، صح؟ صح، عشان النوع دا من الحركة بيكوّن الجبال والتلال والهضاب وكل التضاريس المرتفعة..

ومن الحركة دي إتكوّنت أغلب الجبال المعروفة زيّ (الهيمالايا) و(الأورال) و(الإنديز) وغيرهم، ولو الحركة دي دفعت أجزاء مُنصهرة كمان لفوق بنلاقي البراكين اتكّونت والصهارة دي خرجت من فتحات التنفيس لتتخفيف من الضغط العظيم اللّي تحت، اللّي هي بتبقى عبر فوهات البراكين نفسها..

زي براكين (اليابان) و(إندونيسيا) و(هاواي) وهكذا ..
الحركة التانية اسمها حركة (مُتباعدة) أو Divergent وبردو من اسمها دي لمّا صفيحتين بيبعدوا عن بعض ودي في الغالب بتبقى عند الصفائح المُحيطية والأماكن الفاصلة بين القارات وعليها لمّا الحركة دي بتحصل بيتكّون فراغ ما بينهم..

فكل اللّي فوقيه بينزل وبالتالي بتتكوّن أحواض مُحيطية بتتملي بالميّاه اللّي فوقيها بما إنّنا قولنا إن في الغالب دا بيحصل عند المُحيطات صح؟ ودا تفسير وجود خندق (ماريانا) الشهير في المُحيط الهادي، أعمق منطقة معروفة لينا على سطح الكوكب بعُمق حوالي ١١ كيلومتر تحت سطح الميّاه..

ودا حصل لمّا الصفيحتين اللّي تحت المُحيط الهادي (تباعدوا) وحصل هبوط فيما بينهما على مدار ملايين السنين، وزيّ (الأخدود العظيم) في الولايات المُتحدة، بس الأشهر بالنسبة لنا هو (بحر القلزم) سابقًا أو (البحر الأحمر) حاليًا اللّي إتكّون بنفس الطريقة من ملايين السنين..

واللّي يومًا ما هيُصبح مُحيط هو كمان لمّا (إفريقيا) تنفصل تمامًا عن (آسيا) ..
إيه السُرعة دي؟ وجت منين تنفصل دي بقى ..؟
هقولك إنّك لو فهمت الكام التويته اللّي فوق دول خلاص إنت فهمت اللعبة وبنظرة سريعة على التضاريس هتقدر تخّمن إيه اللّي ممكن يحصل، فـ (البحر الأحمر)..

هو أخدود عميق بين قارتين إتكّون من ملايين السنين من حركة (تباعدية) بين صفيحتين تكتونيتين بعدوا عن بعض فالأرض هبطت ما بينهم واتملا بالمياه من (المُحيط الهندي) وعمّال يتسّع من وقتها واحدة واحدة، طب ليه مش حاسين بدا ..؟ أيوة بالظبط، مركّز معايا إنت، عشان الحركة شديدة البُطئ..

وبتاخد ملايين السنين بمقدار كام سم كل سنة، لدرجة إن في رأي بيقول إن (شبه الجزيرة العربية) هي جُزء من (إفريقيا) وصدع (البحر الأحمر) هو اللّي فرقهم عن بعض من ملايين السنين ..
طب ما تيجي نبقى نجمّع كل اللّي فوق دا ونجاوب على السؤال الرئيسي اللّي إنتشر فجأة دا ..؟

(إفريقيا)، القارة السمراء فيها (صدع) أو (شق) أو (خندق) إلى الشرق منها اللّي الناس عمّالة تحكي عنه دا، والصدع دا إتكّون من بداية العصر (الميوسيني) للأرض، يعني من حوالي ٢٢ إلى ٢٥ مليون سنة، ودا حصل نتيجة (حركة تباعدية) للصفائح التكتونية دي..

والصدع دا نُسخة من اللّي كوّن (البحر الأحمر) كدة، بس إحنا هنا وفي الحالة دي بنشوفه من بدايته خالص مش زيّ (البحر الأحمر) اللّي إحنا جينا بعد ما إتكّون وإتملا ميّا، يعني الصدع دا تقدر تعتبره إمتداد للصدع بتاع (البحر الأحمر)..

وجُزء ممّا يُطلق عليه باسم (الشق السوري الإفريقي) أو الأشهر يعني (الوادي المتصدع الكبير) أو (الأخدود الإفريقي العظيم) أو Great Rift Valley ..

الوادي دا جايّ من فوق خالص من غرب (آسيا)، فبيبدأ من جنوب (تُركيا) في الشمال، وبيمُر عبر (بلاد الشام) و(البحر الأحمر) زيّ ما قولنا فخليج (عدن) لحد ما يصل إلى (كينيا) فتلاقيه بيتقسم لجناحين كدة بيكمّلوا حتى (زيمبابوى )..

والسبب الرئيسي في تكوينه هو إن الصفيحة اللّي عليها (شبه الجزيرة العربية) بتتحرّك أسرع بمقدار ٤ مم من المُعدل اللّي بتتحرّك عليه الصفيحة الإفريقية المُلاصقة ليها فبالتالي الأرض هبطت ما بينهما بالشكل دا، فبالتالي كل الأراضي القريبة من الصدع دا عُرضة لزلازل أكتر..

بمّا إن صفائح هنا تتحرك وبيبعدوا وعشان كدة فوق في (الشام) في مدينة (أريحا) مثلًا بتتعرّض لزلازل ضعيفة دلوقتي بس في حفرياتها ما يدُل إنّها إتدّمرت كذة مرة بزلازل قديمة أقوى من كدة ..
.
فدا معناه إن لمّا ربنا يّأذن والصدع دا يكبر هيحدث إنفصال للجُزء اللّي على يمينه..

اللّي هيُسمى بالصفيحة (الصومالية) عن الجُزء الأكبر اللّي على يساره اللّي هو باقي (إفريقيا) اللّي هيبقى على الصفيحة (النوبية)، فدا معناه بردو إن بلاد زي (إثيوبيا) و(كينيا)، و(الكونغو) و(تنزانيا) و(أوغندا) و(رواندا) و(موزمبيق) وغيرهم قد ينتهي بهم الحال إلى قارة جديدة لوحدهم..

بعيدًا عن باقي البلاد وبالتالي دا هيأثر على نهر النيل عندنا بما إن منبعه من (النيل الأزرق) و(النيل الأبيض) في كلّا من (أوغندا) و(إثيوبيا)، بس إيه اللّي هيحصل بالظبط ..؟ في علم الغيب .. إمتى ..؟ في ملايين السنين من دلوقتي زيّ ما إتفقنا، يمكن من ٥ إلى ١٠ مليون سنة في المتوسط ..

يعني مشغلش بالي؟ والله لو ناوي تعيش ملايين السنين أو ذريتك تكمّل فإشطا اشغل بالك، يعني متخافش زيّ الناس ما بتقول ..؟ أديني حكيتلك بالتفصيل، والحكم في الآخر ليك تخاف أولأ ..

وبكدة أنا خلّصت، والسرد طويل ومليان معلومات أنا عارف وآسف، بس حبيت أحكيلك الحكاية كلّها بالتفصيل.
فأتمنى تكون إتبسطت والأهم فهمت، وأنا بردو تعمّدت أسيبلك كام مُصطلح بالإنجليزية عشان تدوّر أكتر لو حبيت، لأن الموضوع حرفيًا مليان تفاصيل وإخواتنا اللّي بيدرسوا جغرافيا أدرى منّي..

بما إني مش دارسها وكل دي معلومات عامّة فقط فأتمنى مينطّوش في كرشي دلوقتي ..
أنا كدة حكيتلك الحكاية من ملايين السنين لحد دلوقتي وإنت قاعد بتقرا السرد على شاشة موبايلك، فمنشن لصحابك اللّي بيحبوا الحاجات دي أو اللّي بيسئلوا عن الموضوع بس مكانوش فاهمين عشان يفهموا معاك..

وقولي إيه رأيك في طريقة عرض الموضوع ومدى سهولته وسلاسته ومتنساش لما تجيب اصحابك تعرّفهم إن اللّي فوق دا مش كل الناس تعرفه، بس دلوقتي إنت مش منهم ..
محمد عبد المحسن

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد