اليوم كمّلت أسبوع مع " القرآن " فجرًا !
بقول لكم وش صار معي هالأسبوع بشكل مُختصر،لما بديت بِحفظ "القرآن" كانت الرحلة بالبداية ممتعة جدًا ومع مرور الأيام لاحظت اني اسوّف كثير،كمثال: اقول بخلص هالشغلة وبعدين ابدأ احفظ او اراجع ورد اليوم وينتهي بي الحال إلى أنّي احفظ في آخر اليوم!

كنت احس بالراحة لكن في شي ناقص، وكنت ادري اني مُقصّرة وجدًا وعشان كذا ماتركت الدعاء بأن الله يجعل القرآن ربيع قلبي، قبل اسبوع جا وقت الحفظ بالليل، قلت بنام واقوم بعد صلاة الفجر ابدأ بالحفظ والمراجعة بإذن الله، قمت وكنت احس بالنعس ولكن جاهدت نفسي وبدأت بالحفظ، اقسم لكم بالله..

اني حسيت براااحة ماحسيت فيها من قبل ابدًا وما ابالغ، حتى الحفظ كان أسهل عليّ بكثير، خلصت وبديت يومي وكان من أجمل الأيام في حياتي! ماسويت شي مميز فيه ولا طلعت مكان وكنت قاعدة بالبيت طول اليوم ومع ذلك كنت احس براحة عجيبة وانشراح في الصدر وكأني ملكت الدنيا ومافيها! اي والله،

قلت بجاهد نفسي كل يوم على مراجعة محفوظي بعد صلاة الفجر بإذن الله، والله العظيم ان كل يوم يصير اجمل من الثاني وان اموري تتيسر واحس يومي طويل وفيه بركة عجيبة وانشراح في الصدر، اقول انا كيف كنت غافلة عن هذا النعيم؟ ..

ياجماعة القرآن سبب الفلاح في الدنيا والآخرة لاتتركونه وخلوا عندكم ورد يومي بعد الفجر والله ان الله بيفتح عليكم وتتيسر كل أموركم صغيرها وكبيرها ولاتقدمون اي شي دنيوي على القرآن! واجعلوه أول أولوياتكم.