اقاشي 3
طبعا ابوي في اوضتو نايم بعد عملوا ليهو غسيل معده وركبوا ليهو كم درب وانا راقد بجاي مع العقد الفريد ومع السهر والتعب نمت ولا غمرت ماعارف لحدي صحيت مخلوع بالجوطه والكواريك لقيت ابوي حاجزنو اربعه انفار جمب الباب وهو هايج هيجه من الله خلقني ماحصل شفت ابوي هايج كدا
طبعا ابوي في اوضتو نايم بعد عملوا ليهو غسيل معده وركبوا ليهو كم درب وانا راقد بجاي مع العقد الفريد ومع السهر والتعب نمت ولا غمرت ماعارف لحدي صحيت مخلوع بالجوطه والكواريك لقيت ابوي حاجزنو اربعه انفار جمب الباب وهو هايج هيجه من الله خلقني ماحصل شفت ابوي هايج كدا
لدرجة نفسو قايم وشنبو منفوش كل صوفه قاعده براها ومن تلقي ابوي شنبو منفوش كدا اعرف انو وصل اعلي ليفل في الغضب والافظع من كدا شايل الفرار بتاع الضحيه الكسرنا بيهو اللحم زاتو ويكورك فكوني خلوني انجر ليهو راسو الزي حلة البرما دا بالفرار دا زي نجر ماكبدي ومصراني وامي تحنس فيهو
انعل ابليس ياراجل واحمد ربك انك حي خليهو كرامه وسلامه البقيت طيب قال ليها انا يوم امي ماتت مابكيت ولا اتجرست يبكيني هسي ولدك المبدل دا؟ انا بعد شيبتي دي امسك بطني وابكي واقول احييا انا يايمه؟ كسر هيبتي وودر وقاري والليله بكسر راسو وافقشو ليهو نصين زي البطيخه
وبقي يناتل فيهم وخاميهم علي وانا مضمضم ومكوم في اخر السرير زي ود الطهور ومخلوع ومصدوم ختوا نفسكم مكاني يااخوانا زول عيان ومساهر وفاقد سوايل ونايم منهار فجأه يتهجم عليهو زول شايل فرار ويتحلف الا ينجر ليهو راسو شعورو ح يكون شنو في اللحظه دي؟ و دا كلو ليه؟
عشان عملت ليهم اقاشي وسممهم؟ طيب انا زاتي اتسممت معاكم وشفت الموت بعيني واتفضحت في مشارق الارض ومغاربا لدرجة الناس عافتني وبقت تجري مني وماتهبشني بيدها اقسم بالله الموضوع مابستاهل بس ابوي اداهو اكبر من حجمو ومصر يفرج فينا امة محمد بالكورايك ف بقي يكورك وشابكني كسرت هيبتي
كسرت هيبتي كأني قبضتو في وضع مخل بالاداب وفضحتو هيبتك مالها ياابوي؟ انا عملت ليها شنو؟ انت اكلت براك وبرغبتك مافي زول جبرك وعادي الناس بتتسمم وبجيها اسهال ليه محسسني اني كفرت بالله ورسوله؟ اها الجماعه وقعوا ليهو تحت كرعيهو وبقوا يحنسوا فيهو وبالجلاله قدروا يهدوهوا
قال ليهم انا خليتو بس قدامكم كلكم وخليكم شاهدين الزول دا لو لقيتو حايم ب اتجاه المطبخ دا تاني اقسم ب رب الكعبه انا ارتكب فيهو جريمه ومويه من الحفاظه دي مايديني ليها دا زول رمه وبطيني ودني ونفسو ساقطه همو كلو بطنو جنو رمرمه ولحوسه الاولاد كلهم القدرو والاصغر منو نجحوا وعرسوا
واغتربوا وشقوا طريقهم ونفعوا روحهم واهلهم وهو مباري بطنو ياكل الليل والنهار زي الضان شفتوا ليكم زول بياكل وهو نايم ياناس؟ ع الطلاق شفتو بعيني البياكلها الدود دي هو نايم ويلوك ويكوضم الله يلوك مصارينك وكلاك بتلوك في شنو انت؟ شوف هنا يابني ادم عايز تعيش معانا في البيت دا
تقعد ب ادبك وتحترم نفسك اهلا وسهلا عايز تعمل لي امورك دي اتفضل اختانا الباب يفوت جمل انت عارف بسببك انا خسران كم في علاجنا انا وامك واخوانك واخواتك؟ انا دفعت اكتر من حق الخروف دا تاني بسببك ياكلب وتاني بقولها ليك اقسم بالله اشوفك حايم بجمب المطبخ دا ساي ماتلوم الا نفسك
تف عليك وع وشك الشوم دا من يومك شوم ع الطلاق يوم سمايتك بضبح في الخروف قطعت يدي بالسكين خيتوها لي اربعه غرز والخروف شرد وهو مضبوح دمو كابي لحدي هسي مالقيناهو الله يعوضني فيك ياخ وفي ولدي البكر القلت ينفعني ويسندني طلعت لي بتاع رمرمه ولقاويس همك كلو كرشك انعل ابو كرشك ل ابو اهلك
المهم ابوي مسح بكرامتي الارض وساقوهوا اولادو ختوا ليهو حبه تحت لسانو ونموموهوا غايتو الحمدلله بس لكن والله دي ماحاله انا ذنبي شنو ياناس اذا كان عندي موهبة الطبخ وحاسي اني ح اكون اضافه حقيقيه في مجال الطبخ والطباخين؟
انا ماح اشكر نفسي بس بالجد انا حاسي اني ممكن يكون عندي شان في المجال دا انا بعرف اعمل جميع انواع الملاحات لدرجة في رمضان انا البعمل ليهم التقليه والنعيميه وبعرف جميع انواع الحلويات كيك وبسبوسه وكستر وكنافه وابوي الزعلان دا زاتو ياما طلب مني اعمل ليهو بسبوسه مكرمله
قال لي بتعملها احسن من امك واخواتك وياما عملت ليهو عصيدة دخن باللبن لغفها لمن شنبو المنفوش دا بقي ينقط لبن ليه هسي اتنكر لي ونسي اي حاجه جميله انا عملتها ليهو بكل رحابة صدر وماهو براهو كلهم انا اكلتهم وشبعتهم بقروشي وبيدي ولحم اكتافهم من خيري ليه اكلوا خيري وحبوا غيري؟
ويقولوا ليك الدم ماببقي مويه ياخ والله الدم بقي بول عديل كدا مش مويه اذا كان اقل حالة تسمم ينسوا ليك القديم والجديد ويطلعوك بطيني ودني ونفسك ساقطه وبتاع رمرمه اي ياخ انا بطيني وبتاع رمرمه انا زول متصالح مع نفسي وعايش حياتي ببساطه مابهمني البغترب ولا الببني عماره ولا البشتري عربيه
انا زول في حالي وبسيط بعشق الاكل والطقه النضيفه وبحب ابتكر واجرب اكلات جديده انا اول زول في السودان اكل الطعميه بشاي اللبن واول من اكل الفول بالطحنيه ماعندي شغله ب زول عايز اكل واستمتع وربنا بعزتو وجلالو قال كلوا واشربوا هنيئا مريئا انا ماذنبي اذا كان نفسي فاتحه ش
وباكل اي شي في البلد البتسد النفس دي ياخ الناس عندهم مليارات وماقادرين ياكلوا قرن شطه خدراء اي انا بقولها للكل انا بطيني وبحب الاكل وبحب الناس البحبوا الاكل وبحب الناس السمان لانهم بمنحوني احساس بالطمأنينه والشبع ويحسسوني انو لسه الدنيا بخير والخير مترادم والافران فااااااضيه
والعيش حار عكس الناس الضعاف البحسسوني بالجوع والمجاعه وانو اي شي معدوم ومافي ووصيتي ليكم اكلوا ياناس كل ماتلقوا اكل قداكم اكلوا اقسم بالله الدنيا دي تافهه جدا واخرها كوم تراب اهلك يكبوك في حفره نص جوه ونص بره ويجوا جارين يدقوا ليهم صيوان ويملوا الحفاظات تلج ومويه بارد
ويعدوها ليك دمعه وبيض مسلوق وانت بهناك في قبرك وشك ينعل قفاك مافي زول ماخد منها حاجه دي حقيقتا ليست ب دار بقاء ولا مستقر نحنا ضيوف فيها وراحلين اي زول عندو قروش داسيها لليوم الاسود ينكتها ويمشي ياكلها في افخم مطعم ويعز روحو لانو مافي ايام اسود من العايشنها دي
وفي الختام بحب اشكر جميع افراد الشعب الطيب دا السالوا مني وعايزين يطمنوا علي انا بخير الحمدلله اتجاوزت المرحله دي بس ابوي جرح خاطري وكرمش مشاعري وترك اثر بالغ في اعماقي وعافي ليهو لوجه الله مهما كان ابوي وبوعدكم انو مسيرتي ماح تتوقف وح اواصل ابداعي في مجالي البحبو
وهسي فضل راس الخروف في التلاجه مسلوخ وموضب جاهز سلختو ووضبتو بيدي وح اقوم عليهو اعمل ليهم شوربة لحم راس تحففففه
(للكاتب سليمان الجعلي)
(للكاتب سليمان الجعلي)
جاري تحميل الاقتراحات...