هحكيلك قصة ممكن تكون طويلة كدة عن الناس اللي عندها مهارة الهروب وتحويل الحقائق لأكاذيب بعبقرية!
للكاتب الفلسطيني غسان كنفاني رواية، كان بيحكي فيها إن في ناس بتعرف تحول المنطقي لحاجة مش منطقية، والحقيقة لكذب، والقصة باختصار لصبي كان مع أبوه وأمه وكان عندهم مُساعدة تنظيف للمنزل

كانت فتاة ريفية تقترب منه في العمر، في يوم رجع من مدرسته وكان لسة أبوه وأمه موصلوش البيت، وشافها بتمسح البلاط وكل شبابيك البيت مفتوحة عشان تنشف الأرض المبلولة.
استغل الوضع ده عشان ينقض عليها ويعمل اللي عمله، وبعدين كان مُنتظر عقابه أكيد من والديه لإنها أكيد هتحكيلهم

البنت حكت لهم اللي حصل، واستدعوه قدامهم -محاكمة بسيطة- وهم مذهولين إنه يعمل كدة!
قدامهم وقدامها، وقف يتفاخر بنفسه مُشددًا على كلمة "أنا" ومُشيرًا لها "هذه" عشان يرفع من شأن نفسه ويقلل منها، وبكدة تكون وسيلة تصديقه أكبر.
والحجة اللي هي استخدمتها ضده كانت وسيلة دفاعه عن نفسه!

"الشبابيك"
إزاي هيعمل كدة في عز الظهر ومش خايف أبوه وأمه يرجعوا البيت فجأة؟ وإزاي مش خايف حد يطل من أي نافذة فيشوفه؟
من هنا أبوه وأمه، اللي كانوا شاكين فيه؛ صدقوه، وكذبوها هي، ورغم إن الواقعة حصلت وكلامها منطقي هو حوله ومبقاش منطقي، والحقيقة مبقتش حقيقة! والأمر انتهى بطردها

القصة العبقرية دي هي خير مثال إن في بشر عندهم مهارة نادرة، تحويل كل اللي إنت عملته كدليل ضدك، وتبرئة نفسهم بطريقة بسيطة وسلسلة، واستخدام أدلتك للدفاع عن نفسهم.
ودول مش شرط يكونوا وحشين، ممكن يكونوا مستوى وتعليم عالي بس عمرهم ما شافوا تربية عادي