رتبها

( ولا يوم من أيامك يا حرامى )
⬅️ قرأت تعليق علي منشور لفساد القطاع العام في عهد مبارك
شهادة مهمة لمدرس فى مركز تدريب مهنى داخل شركه النصر لصناعه السيارات بوادى حوف وأنقلها كما هي بدون زيادة أو نقصان👇

👈..( بما انى بطبيعه عملى كنت بزور مصانع كتير سيدى الفاضل زي شركه النصر لصناعه السيارات والشركه المصريه لصناعه وسائل النقل الخفيف كان عدد العاملين فيهم يتخطى 20 الف وده غير مقراتهم بالهرم كان معظم عمال الشركه النصر لصناعه السيارات دايما نايمين فى الشمس..

وكانت الشركه بتخسر خسائر فادحه وكان اعتماد الشركه على مبيعات السياره شاهين ودواجن واتوبيسات النقل العام وطبعا كان فيه فى نفس الوقت شركات بتجمع سيارات ماركات اخرى وصيانتها وضمانها اقوى وكانت الشركه تتعرض للسرقه المنظمه..

فمثلا كانت تيجى المقطورات محمله اجزاء السيارات من اسكندريه للهرم او حلوان فكانت تدخل فى طرق جانبيه من الصحراوى ويتم سرقه محتويات الصناديق ووضع حجاره بدل منها ده غير الارباح والمكافآت والحوافز الضخمه اللى كانت بتصرف دوريا للعاملين كل ثلاث شهور واقل نسبه كانت 100 يوم..

يعنى اكثر من ثلاث شهور مرتب للعامل غير المناسبات والاعياد وكان فيه عمال شغالين سواقين بيطلعوا يجربوا العربيه بعد انتاجها وكانوا يتعمدوا يخبطوها علشان تتباع معيبه للعمال بالقسط والعامل يخدها بسعر بخس ويجددها فى الشركه ببلاش وأسأل اى عامل كان شغال ايام " عادل جزارين" رئيس الشركه..

اما المصريه لصناعه النقل الخفيف كان ايرادها من عنبر المواسير فقط لاغير وكان انتاج المواسير هو اللى بيصرف على شركه فيها اكثر من خمس عنابر انتاج متوقفه زى انتاج السياره الميكروباص الرامى والمتوسيكلات والعجل اللى كان بيصدى فى المخازن ويترمى فى الجبل

👈اما الشركات التانيه والمصانع اللى كانت تحت يد العامل المصرى وانا بكلم حضرتك على القطاع العام فكلها على نفس المنهج يعنى مثلا شركه مصر للالبان وبسكو مصر فى العاشر من رمضان دخلت لجنه عليهم والله العظيم كميه فيران الفأر الواحد فيهم يعمل وزن نص كيلو ده غير الصراصير..

ومفيش عامل موجود فى المصنع وكله نايم فى بيته وبيروح يستلم المرتب والارباح كل شهر اما قها وادوفينا شركات العصير ذات العلب الصفيح اقسم بالله اشتريت علبه عصير جوافه ولستر ربنا شوف العصير قبل ما اشربه كان اسود بسبب ان العلبه صدت عليه..

وكذلك شركات الحديد والصلب والاسمنت فى حلوان كان العمال زياده عن المطلوب وكانوا لا يعملون ويتحصلون على ارباح وحوافز ومكافات هائله وانتاج قليل وسعر عالى فى الوقت اللى كان مصنع زى يوسف علام للورق فى العاشر من رمضان بيشغل العمال بالمراقبه والنظام والالتزام..

مقابل اجور ضعيفه جدا وانتاج عالى الجوده والكميه انا عشت وشوفت وعاصرت بعينى وبنفسى وانا عن نفسى كنت اتمنى اولع فى المصانع دى كلها باللى فيها لكن مبارك باع صح وشفط الفلوس غلط ولو كان عمل مصانع قطاع عام اكبر واحدث كنا هانفضل برضو فى نفس المشكله..

👈 تعالى لشركه صناعه البطاريات كانت بطاريات نسر فى دار السلام بالتحديد بين دار السلام والزهراء فى عزبه خير الله كانت بتنتج بطاريات سوده وسخه معفنه ثقيله فى حين ان كانت شركات بتستورد بطاريات بيضاء خفيفه نظيفه وعليها ضمان وسعرها اقل..

وكان الحراميه فى عزبه خير الله بينطوا على الشركه اللى كان بيحرسها غفير عجوز كهنه ويسروقوها وفى القوميه للاسمنت اعرف عمال جوه الشركه كانوا بيعرضوا عليا ادوات واجهزه وعدد ولوحات كهربائيه خاصه بالماكينات لعرضها على محلات ناس فى التوفيقيه انا اعرفهم لبيعها وتصريفها وطبعا كنت برفض..

وكنت اسألهم عن وضعهم فى الشركه يقولوا ولا شغله ولا مشغله ومرتبات حلاوه ومفيش صيانه والدنيا خربانه وتعالى وارنا نخدك لفه على الموتسيكل
👈شركات القطاع العام طالما العامل ضمن ان مرتبه ثابت وان مفيش اى حد هايقدر يفصله اعرف ان المصنع اللى بيشتغل فيه راح فى الكازوزه..

نفس العامل دا اللي نايم طول النهار لو راح اشتغل زى حالاتى عند يوسف علام ب 90 جنيه مش هاياخد غير نص ساعه غداء ويقوم زى البهيم اللى فى الساقية يطلع انتاج فيه ربح يومى اكثر من 5 الاف جنيه من منتج واحد.

وفى نفس الوقت قانون القطاع الخاص ممكن يقولك بالسلامه روح وانت شغال على الماكينه.
وده اللى بيخلى العامل يدى انتاج وعالى الجوده فى القطاع الخاص زى عز و كليوباترا وغبور.
عيب مبارك انه كان سايب الصراعات شغاله بين مصانع القطاع الخاص يعنى عز دمر بشاى للصلب وقوطه..

وغبور دمر مصنع تجميع دايو وكليوبترا دمر الفراعنه واسيكو وهكذا...
مبارك غلطته انه سلم اقتصاد واعلام وصحه وتعليم لجمال ابنه واستولى هو على الجيش والمخابرات فقط لاغير وارجع اقول لحضرتك مهما كان مبارك حرامى وفاسد ولص فلا يجوز القاء اللوم...

الا على الشعب والعامل المصرى واداره هذه الشركات من قبل مصريين لا ضمير ولا اخلاق والدليل ادى اى شركه لخبير اجنبى يديرها هانمشى زى الجزم وهاننتج.
والله الذى لا اله الا هو انا اعرف مهندسين ما يعرفوش الفرق بين العطل الميكانيكى والعطل الكهربائى وللاسف مديرين..

⬅️فهمتوا القطاع العام باظ من إيه
إدارة فاسدة ومديرين لصوص ونظام عمل يفسد أي عامل ونظام قذر يعمل لتخريب تركة عبد الناصر المقدرة أصولها بقيمة 1400 مليار دولار
كل ده علشان أسيادة يرضوا علية ويسيبوة في الحكم ويقدر يورث ننوس عين امة
سيبك من الكلام ده ( ولا يوم من أيامك يا حرامى )..

مهند فايد

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد